Di rumah, Helen benung duduk nunga cheremin. Lama diri iya udah dedugau betinjau dia. Tilik iya jam ba kuan jari baru nunjukka pukul 6:30 lemai. Ethan kira nyau ka datai da ngambi iya enda lama agi. Iya kebendar agi empai pechayaka Ethan ngemai makai malam di rumah. Lebuh  ditelai Ethan ba pending pagi tadi nyau ngerenjang magang bulu pegu. Asaika benung bemimpi taja jaku Ethan nya endang amat nyata didinga.

Urung pukul 7:00 lemai Ethan pan datai ngambi Helen ke rumah baka ke didanji pagi tadi.Tama Helen ke dalam kerita seduai iya lalu bebalas tuchum.

“Meli lauk ke supermarket dulu tua,” ku Ethan.
"Ni ku pemai nuan aja aku tu," ku Helen nyaut.

Ka ya dibai Ethan ngagai menua sebayan sanggup mih aku.Ku dalam ati Helen dia. Iya ga sigi udah lama amat rinduka Ethan.Ukai tak dua tiga taun, nyau manggai berbelas taun pengelama udah.

"Helen, nuan enggai nemu nama kebuah aku
ngemai nuan makai malam ba rumah aku?” ku     
Ethan betanya.

Helen enda nyaut.Di dalam ati iya enggai kiruh ka nemu kebuah.Utai ke penting diatu Ethan udah ka ngemai makai ke rumah!

"Nyau ka dua taun nuan nyadi secretary aku.Ketegal  
nuan aku bulih pengawa dia suba, diatu nyau udah
datai maya aku patut meri besai terima kasih
ngagai nuan."

"Oooo…sama-sama bos!" kenu ku Helen.

"Eh! Ukai ba opis anang ngangauka aku bos."

Helen terus tuchum.Iya sigi sengaja ka nundi Ethan. Dijeling iya Ethan ti benung deriba, diperatika iya buk Ethan, pisin buk  nya endang agi baka suba. Baka maya di sekula pom. Udah meratika buk, diperatika iya ga mua Ethan. Dup! Dap! Dup! Dap! Meratika tisi mua Ethan aja udah balat ngasuh ati iya keketap kesal. Pengasai ati ti keketap laju sigi ngasuh dada berasai enda nyamai tang dalam enda nyamai nya mih bungai pengerindu nyu makin balat agi ngerembai. Asaika dunya empu Helen kediri aja maya tu.

"Sigat aku peda nuan?" ku Ethan betanya.

Nyu tekenyit tudah Helen ninga jaku tanya Ethan. Ya ga benung rindang amai mata iya ngayam mua Ethan tadi. Nyu malu asai ati iya pengudah nemu Ethan sedarka diri diperatika iya ari tadi.

Sigat!! Ngasuh aku mawa belama nuan!! Ku Helen nyaut di dalam ati. Tang ba mulut iya lain agi ga utai disebut.

"Nadai jalai sigat. Nyau tuai amai gamal," ku Helen.

Ethan terus ketawa  ninga Helen ngumbai iya tuai.Datai seduai iya ba supermarket lalu bejalai ngelawa endur bejual lauk. Maya ti benung bepilihka lauk,

"Ethan!"

Ethan enggau Helen bela merening ngagai penatai sura nyawa. Dia mih Lahung enggau Ethan terus besabung perening mata.

"Nama berita nuan?" ku Lahung betanya.
"Manah. Nyau ka bebini da aku tu," ku Ethan nyaut.
"Amat nuan? Anang ka bejaku bula neii," ku Lahung.

Enda iya pechayaka Ethan ka bebini. Tang meda bisi indu ba tisi Ethan dia nyu ngasuh ati Lahung berasai berasai lantang.

"Ukai jaku bula, sigi amat ka jadi da kami duai," ku
Ethan.

Iya lalu maut punggung Helen.Tekala nya Helen terus berasai malu, tang enda ga iya ngenggaika pengawa Ethan nya. Jauh ba sukut ati iya ngandalka jaku Ethan tadi ulih nyadi nyata taja iya nemu Ethan benung ngelakun diri ba depan mua Lahung. Lahung pan lalu ninggalka Ethan enggau Helen ngemai mua reredu. Udah mih aku tu nadai peluang ka ngempu Ethan agi ku Lahung muchau di dalam ati. Pengudah Lahung nadai dipeda mata agi, berumban Ethan ngelengkaka lengan iya ari punggung Helen.

"Sorry," ku Ethan.

Iya empu tak berasai malu mih dia.Tang nya aja chara dikena nyeliahka diri ari Lahung.Iya laban nemu ulah Lahung sigi tusah ka dibai berandau manah.Nya kebuah iya ngelanjurka Lahung sekali tadi.

Maya Ethan benung kiruh milih lauk sayur dia dih Helen ninggalka iya lalu bejalai ngelawa endur nyual wine. Dijingkau iya dua butul wine lalu dibayar iya empu. Tembu Ethan beplihka lauk ti ka dibeli iya pan terus berbayar ke kaunter. Udah nya seduai lalu pulai ke rumah Ethan.

??
Di rumah Ethan.

"Nama lauk ka dipanduk nuan?" ku Helen betanya.
"Ikan duai tu ka di’steam. Ka nuan makai ikan
panduk  steam?" ku Ethan nanya Helen.

Bisi irau ga asai ati iya nangika Helen enggai makai lauk dipanduk iya.

"Nuan empu manduk tauka aku manduk ke tua?" ku
Helen ga betanya.

"Aku empu mih, nuan duduk aja di bilik besai din," ku
Ethan. Seretai ti bejaku munyi nya iya lalu ngijapka
mata  sepiak ngagai Helen.

Nyu makin rindang amai mih asai ati Helen begulai enggau Ethan dia. Enti ninting hari baka tu naka mih pengelantang asai idup di dunya. Enda mayuh utai dipinta, asal mih ulih begulai enggau Ethan belama udah chukup mih nya ba aku.Ku dalam ati Helen betelai.

Urung pukul 9:00 malam, sepenembu Ethan bepandukka utai iya lalu ka ngangauka Helen makai. Datai di bilik besai sekali tak meda Helen nyu udah tinduk manah dibangku sofa. Mansang Ethan ka ngerak Helen, empat sempat iya ngerak Helen dia iya tedingaka talipun Helen bemunyi nandaka bisi SMS datai. Jari Ethan asaika diansak ka nyengkau talipun nya. Ati iya mega sesengit ka macha SMS ti dianjung ngagai Helen. Nadai tentu ka mayuh runding lalu dijengkau iya sekali talipun nya.

?? "NAMA PENGAWA NUAN MALAM TU KUMANG? UDAH TINDUK NUAN?"

Pia ku SMS datai ari orang enda ditemu nama. Numur orang nya nadai disimpan Helen di dalam phon. Ethan enda kakang ati deka malas SMS orang nya tadi. Tunjuk jari iya lalu ngenyakka keypad talipun.

??"SAPA NUAN?"
?? "LAKI INJAU NUAN DI PASAR LEBUH NYA, SIMPAN NUMUR AKU TU KUMANG. NGAMBIKA NYAMAI TUA BEGIGA“

Pengudah macha SMS nya tadi lalu dipadamka Ethan tekala nya mih semua SMS iya enggau orang nya. Nemu iya orang nya sapa. Di dalam ati ya tak nyu berangat ngapa asai maya macha SMS tadi. Eihh...nama kebuah aku baka tu? Ku Ethan betanya ngagai diri empu.

Iya duduk ba mija di tisi bangku sofa lalu nengkilaka Helen ti benung tinduk. Dia mata Ethan nyu tepedaka ba tisi kaki bangku nya dia bisi wine sebutul. Butul wine dijingkau iya, tang butul nya udah puang.

"Puu...ulih ga nuan nembuka tu tadi," ku Ethan
bejaku enggau Helen ti udah enda nemu diri agi.

Ethan nyu tegenung lelengu kediri.Enda nyamai asai iya dedunga ngapa dia. Iya pan nguji deka ngerak Helen. Tandan bahu Helen digusak iya begadai.

"Helen, dani."

Pengudahka digusak Ethan ba tandan bahu nyu tedani mih Helen. Enchelak mih mata iya pan lalu merap tubuh Ethan. Ethan ngetat aja, mimit pan iya enda kekebut bai ati ke nyu tekenyit laban enda ngadang diri diberap Helen.

"Ethan, lapa nuan lalu enda ulih meda pengasih enggau penyayau aku ngagai nuan?" kenu ku Helen.

Mua Ethan diperatika Helen enggau perening mata ti chukup siru. Seduai iya betunga damping amat, idung besatup, kening betemu. Lengan Helen mega agi dipanggaika iya ba tandan bahu Ethan.

"Enda nuan nemu pengelama aku udah nganti. Ethan lapa nuan lalu enda ulih meda aku?"

Ethan meragam Helen sigi udah mabuk. Iya pan lalu nulak tubuh Helen begadai, Helen disandihka iya ke bangku.

"Ethan, nama bangat nadai penuduk ungkup aku ba
ati nuan?"

Ethan tetap enda nyaut. Ba penemu iya semua leka jaku ti pansut ari mulut Helen nya semina jaku mabuk aja. Enda datai beberapa sikin pengudah nyandih ba bangku Helen pan nyu lelap baru. Meda baka nya Ethan pan ngatung Helen lalu dibai iya tama ke dalam bilik peninduk iya empu. Helen digalika iya ba tilam lalu dibap iya enggau pua.

Sebedau deka pansut ari bilik, sempat ga Ethan meratika mua Helen ti benung tinduk jenak, diiiarka iya buk Helen serambar dua ti bisi labuh ke tisi kuyu, dikayam iya kuyu Helen. Diperatika iya kening Helen, ari kening perening mata iya nyau labuh ngagai idung Helen.Udah nya labuh ke mulut Helen ga perening mata Ethan, enda berasai iya nelan ai liur diri maya meratika mulut Helen.Bisi begetar mimit asai ati iya dia.Pengudah puas ngayam mua Helen, tuchum pan lalu ayan ba mulut Ethan. Disium iya begadai kening Helen.

Pansut ari bilik peninduk nya Ethan lalu bejalai ngelawa dapur. Ku jaku ka makai enggau Helen tadi, diatu nyu kediri aja ga iya makai. Tembu makai nyau iya mandi. Maya ka begari tama baru ga iya ngagai bilik peninduk, peda iya Helen benung jenak amai tinduk. Engka lalu lanjur tinduk datai ke pagi pagila nya ku dalam ati Ethan meragam. Pengudah begari, Ethan mansutka diri baru. Baru enda lama iya udah nudukka diri ba bangku bilik besai, talipun Helen didinga iya bemunyi nandaka bisi orang betalipun kia. Talipun terus dijingkau Ethan.Ba skrin nya ayan nama Roy.Tanda dikena nyaut talipun pan ditekan Ethan.

Ethan?? Hello…

Roy    ??Sapa nyaut tu? Kini ke Helen?

Ethan??Udah tinduk iya.

Roy   ??Ya nuan tu sapa?

Ethan?? Ethan

Roy    ?? Apuu...nyau ngayap baru ga talipun Helen tu, tauka Helen empu sigi bisi dia? Nama iya ba rumah nuan ka Ethan?? Bemalam enggau nuan dia? Seduai aja ka??

Ethan?? Au

Roy   ?? Apuu nih...utai udah nyadi baka tu manah aku terus mesan nuan. Anang nguji deka beduan Helen nuan enti agi ka idup lama. Aku tu kering enda, tang bisi ga tulang tu ka dianjung kena bebukut.

Ethan nyu senyum kediri ninga jaku disebut Roy.

Roy   ?? Lapa nuan enda bemunyi Ethan? Lama amat Helen nya udah naruh pengerindu ngagai nuan, kenyau ari sekula suba datai nyentukka diatu. Anang nguji deka beduan iya nuan, anang ka nyadi lelaki enda bertanggungjawab ninga!

Ethan?? Ermm…kati nuan nemu Helen bisi naruh pengerindu ngagai aku kenyau ari sekula?

Roy   ?? Nemu mih aku arr, nuan nya aja ti enda nemu diri. Ni bup suba agi ingat nuan? Aku tu ke nyuaka Asun bup nya.Nya bup pemeri ari Helen enggaika nuan lalu enda  nemu.

Ethan??Oohhh…

Roy   ?? Anang be ohh aja nuan, nya enti nama-nama nyadi ba Helen anang deka ngelarika diri nuan, sigi aku giga nuan ila.

Ethan??Ha… ha… ha.( ketawa geli ati) Au mih...bah ka tinduk aku tu.Ka ngimbit Helen dulu.

Roy   ??Peii…nuan ingat nuan Ethan! Anang enda betanggungjawab!

Ethan??Au...au.

Tutttttt…..Randau Roy enggau Ethan ngetu naka nya aja.

Enda lama udah nya bemunyi baru ga talipun Helen. Peda Ethan ba skrin tak apai Helen ke betalipun. Entara dua ati iya ka nyaut talipun nya. Diperening iya jam dinding udah mangkung pukul 11:00 malam.Ethan pan nadai pemerani ka nyaut talipun meda jam ti nyu udah kelalu laun. Dilakka iya aja talipun nya bemunyi. Maya talipun udah ngetu bemunyi iya pan lalu beguai betalipun ngagai Roy.

Tut…Tut…Tut….

Roy    ?? Hello…

Ethan?? Nulung aku berandau enggau apai Helen dulu nuan. Nuan teleba iya gi...apai iya bisi betalipun kitu tang enda disaut aku. Enggai nyadi ga aku madahka Helen bemalam ditu arr.

Roy   ?? Apuu....salah baka nya.Lapa ga enda berani berandau enggau bakal entua?

Ethan?? Haihhh…nulung aku sekali tu aja.

Roy   ??Lapa enda ngerak Helen sekali aaa .Asuh iya empu bejaku enggau apai iya.

Ethan??Udah jenak amat iya dia, enggai aku ngachau iya.

Roy   ??Apuuu...jaga seduai ila enti aku enda duduk ba meja VIP maya seduai rami.Sigi ditungkupka aku mija kek.

Ethan??Au au.Ila nuan duduk ba mija VIP.

Tembu berandau enggau Roy, Ethan lalu tama ke bilik peninduk siti da. Bilik nya selalu endur indai iya tinduk enti nyema bisi nemuai ke Bintulu.Pengudah ngalika diri, enggai nyadi dibai lelap ga mata iya. Bekalih kiba kanan iya gali, iya nyu berundingka jaku Helen tadi. Jaku amai ari ati Helen tauka jaku mabuk iya aja nya? Udah nya nyu ingatka jaku Roy tadi ga Ethan.

"Arrgghhh!!" Ethan lalu ngeraup mua enggau kedua iti tapak jari .Sesiti utai digaga Helen dikeingatka iya magang.Bepun ari bup, bup nya mayuh meri jaku peransang .Tambah mega apai Ethan baru udah nadai maya nya suba.Udah nya gambar sida maya kem pom 4 suba.Tiap kali maya sida begambar, Helen semampai damping Ethan. Taja pan semina bediri di belakang aja.Ketegal Helen enda kala ngayanka diri nyengenda ba depan mua iya nya mih ti ngujungka Ethan susah ka nemu diri semampai damping enggau Helen.

Amat pan Helen kala ngemai iya bekelala maya ba pengerami Chumang enggau Asun suba tang mih Ethan enda nemu kebendar ya Helen sigi udah lama ngelala iya! Agi siti pengawa ti diulih iya diatu pan semua nya asil ari bantu Helen magang. Maya iya tusah nadai kerita suba Helen sanggup ngasuh minjau kerita sepengelama sebulan. Bungai? Ohh bungai rose urin ti di dalam opis nya mih ti semampai ngelantangka ati selama tu.Bungai pemeri ari Helen! Ethan bedemuh pengudah semua semua pengingat nya sesiti singgah ba pala.Panjai sintak seput ditarit.

Arrgghh...nama kebuah aku enda meda ngelama tu? Lapa laun amai aku sedar? Helen, ukai aku ngaga diri enda nemu ngelama tu, tang aku kelalu buta ati buta mata tambah mega utai ti kala nyadi ba pengidup aku suba balat ngajar aku ngambika bejimat maya ka labuh pengerindu ngagai orang. Nya mih kebuah aku semampai nagang ati aku.Pia ku Ethan betelai di dalam ati.

Pagi hari siti...???

"Bisi mimpi manah nuan demalam?" ku Ethan
betanya.

Seduai iya Helen benung betunga ngirup pagi nya.Helen enggai nyaut, pagi tu tak berasai enda ulih betemu mua enggau Ethan sepi iya.Maya dani tadi nyu tegepang ati iya meda diri tinduk ba bilik peninduk Ethan.Ukai malam tadi aku tinduk ba luar? Ku Helen betanya ngagai diri empu.

"Ermmm…aku bisi ninga nuan nyebut nama aku ba
mimpi nuan demalam. Asaika ninga nuan nyebut
jaku pengasih enggau penyayau," kenu ku Ethan
bejaku enggau mua ti terit.

Tang kebendar ya mulut Ethan nya ari tadi puas ngetatka diri ka senyum.Helen nundukka pala iya aja dia.Malu amat asai ati iya diatu.Pengasih enggau penyayau? Amai jaku disebut aku kini nya? Tauka Ethan semina nundi aku? Ku iya betanya di dalam ati.Helen lanjur enda nyaut Ethan, iya beguai ka ngangkatka diri ari bangku penuduk.

Ethan lalu ngetanka iya, ditarit Ethan lengan Helen. Seduai iya sama bediri.Ethan merening ngagai mata Helen.Tang Helen ngelarika perening mata iya kebukai. Asaika berumban iya pansut ari rumah nya diatu.Mua nyu berasai ngaba angat bai kelalu malu ke Ethan.Ethan nungaka mua iya ngagai mua Helen. Tang  Helen majak nundukka pala.

"Helen, perening dulu mua aku.”Mata seduai iya pan
besabung maya Helen ngangkatka pala.

"Ka nuan nyadi bini aku?" ku Ethan betanya.

Helen nyu bebengap.Iya ngetil isi diri engka tak benung bemimpi diatu.Empai sempat iya nyaut tang Ethan nyu ngenyit merap iya.Lama diri Ethan merap Helen, asaika enggai melengka.Bechampur asai utai di dalam ati.Gaga, sinu, nesal pan bisi mih. Nesal ketegal kelalu laun nemu Helen ti lama udah nyimpan pengerindu ngagai iya.Enti iya tumu nemu ari suba nadai iya ka ngiruh diri masau hari nanggam pengerindu enggau Sulan seduai Lahung kelia.

Helen enda bemunyi maya diberap Ethan, ati iya agi majak ngumbai diri benung bemimpi.Maya Ethan meleka merap Helen, iya lalu tegenung nunga mua Helen.

"Lapa nuan enda beterus terang enggau aku ari
suba?" ku Ethan betanya.

"Aku nadai pemerani deka beterus terang ngagai nuan,” ku Helen nyaut lalu nundukka pala iya baru.

Ethan maut dagu Helen, perening mata seduai iya pan besabung baru.

"Terima kasih laban udah nganti aku," ku Ethan.

Helen terus senyum.Senyum Helen ti dipeda Ethan diatu chukup ngelantangka ati iya, ati pan nyau majak berasai gaga.Seduai iya bela nudukka diri baru lalu nembuka ai kopi ti agi belaluh tadi.Duduk betunga enggau Helen sekali tu meri asai ti chukup lain ba ati Ethan.Enda asai betunga mua baka  ngelama tu. Ethan enggai badu merening Helen, mulut iya mega enggai bebadu ngukir tuchum.

"Nyu bajik aku dipeda nuan diatu?" ku Helen
betanya.

Ethan terus ketawa, iya lalu migai jari Helen ke dipanggai ba atas mija. Dikayam iya jari Helen ba mija nya.Amat tak asaika enggai dileka sekali.

"Enda kala ati aku gaga asai tu," ku Ethan.

"Aku lebih ari gaga laban pengerindu aku udah
disaut nuan. Jam, hari, bulan, taun ti dikena aku
nganti nuan ngelama tu pan enda tebasau ngapa,"
pia ku Helen.

"Enda aku ngelakka nuan nganti lama agi udah
tu.Kemaya nuan ka nyadi bini aku dIh?" ku Ethan
betanya.

Mulut iya agi mengkang senyum baka tadi.Helen ti ninga jaku tanya Ethan seretai enggau senyum ti dibantaika Ethan diatu nyu ngasuh ati iya kekebak laju.Senyum ba mulut Ethan nya mih ti semampai ngasuh ati iya bebungai belama ari suba, iya pan nyu enda tesautka jaku tanya Ethan.

"Saut arr...kemaya? Diatu? Pagila? Lusa?" Ethan
betanya baru laban Helen lalu enda bemunyi.

"Eihh...betemu eggau daddy aku dulu nuan, legi
nuan madahka iya," ku Helen nyaut sambil lalu
malas senyum Ethan.

"Aram mih diatu," ku Ethan ga.

"Hah? Amat nuan?" Helen betanya baru laban ti agi
enda pechaya.Baka ti semina nundi iya aja Ethan
nya dia.

"Amai arr…aram, ehh demalam daddy nuan bisi call
tang aku enda berani nyaut iya," ku Ethan.

"Baka ni nuan ka betemu enggau daddy enti iya call
pan nuan enda berani nyaut?"

"Ukai nama, laban salah endar jam iya call.Nama
nuan legi ka aku madahka iya nuan tinduk ditu?" ku
Ethan deka nguji ati Helen.

"Enti nuan berani, beterus terang sekali mih legi," ku
Helen ga.

Pengudah ninga jaku Helen munyi nya nyau kesal ga ati Ethan. Baka ni iya ka bejaku enggau apai Helen legi ku iya betanya di dalam ati.

"Aram meh nganjung aku pulai, legi nyu laun tua
nurun gawa," ku Helen.

Tang Ethan nya agi tegenung.Mayuh utai di dalam runding, mikirka tusun leka jaku ka dikena iya ngerandau apai Helen legi.

??
Di rumah Helen...???

Penatai Helen seduai Ethan pagi nya sigi udah disadang apai Helen.Ukai nya iya enda nemu Helen pansut enggau Ethan malam tadi.Tama  Helen seduai Ethan ke rumah, lalu meda apai enggau indai Helen benung duduk dedugau duduk ba bangku bilik besai.

"Daddy, mummy Ethan bisi utai ka dikerandauka
enggau seduai," ku Helen.Seduai iya Ethan lalu
nudukka diri ba bangku.

"Nama utai ka dikerandau nya dih?" ku Apai Helen
betanya lalu merening Ethan.

"Aya, aku tu ka ngambi Helen ke bini," ku Ethan.

Di dalam ati iya dia nadai temu tunga agi asai pengudah beterus terang.Ati tak enggau bebadu kesal.Nangi endar Ethan dia, nangika salah tusun leka jaku.

"Pia mih Igat, lama endar aku tu udah nganti.Irau
aku ngelama tu, nangika nuan beduan Helen.Udah
ninga jaku nuan munyi nya nyau lantang endar asai
ati aku," ku Apai Helen nyaut.

Ethan dia nyu alit ati ga ninga saut apai Helen munyi nya. Nama tak muntang endar apai Helen terus setuju ku dalam ati iya betanya.

"Seduai suah endar begulai kin kia, irau aku nangika
Helen dikeduan nuan. Ya ga aku meda nuan lama
amat lalu enda ngambi iya ke bini," ku indai Helen
ga bejaku.

Naka pengaga mih ati Ethan ninga jaku apai enggau indai Helen munyi nya.Enti nemu baka tu nibuh aku kiruh mayuh utai dirunding tadi.Kenu ku iya di dalam ati.

"Au, nyamai ga ati aku udah ninga seduai udah 
besetuju," ku Ethan nyaut enggau ati gaga.

"Ya kemaya seduai ka berami? Enti nya bulan tu
ngambi nyamai kita lalu ngatur pengawa," kenu ku
Apai Helen.

"Minggu siti mih aya, hari Enam minggu siti.Minggu
tu kami duai ngerejista diri ba JPN dulu.Aku pan
lalu ka ngambi indai aku ke Bintulu kitu pagila," ku
Ethan nyaut.

Helen ti duduk disepiak nyau lelinsum senyum, gaga amai asai anak ati dia.Tang mih semua utai ke nyadi nya agi berasai semina mimpi.Kelalu enda pechayaka Ethan udah nyaut pengerindu iya.

??

Di Opis Posim Petroleum.

Jarum jam ba dinding udah nunjukka pukul 12:00 ngalih hari. Ethan pan nyu deka ngemai Helen pansut makai.

"Aram kumang, pansut makai tua," ku Ethan nyapa
Helen.

Helen ti benung ngaga pengawa ba mija gawa nyu tekenyit dikangauka Ethan kumang.

"Anang guai dulu, mimit da agi pengawa aku tu."

"Eihh…legi nuan nyambung iya baru," ku Ethan ga.

Mansang Ethan damping agi ngagai Helen, lengan Helen lalu ditarit iya deka ngasuh Helen angkat ari bangku.Helen pan senurut aja.Jauh ba sukut ati  iya mega chukup berasai gaga enggau chara Ethan ngaul iya diatu.Seduai pan lalu seretai pansut ari opis.

Di dalam kerita Ethan??

Talipun Helen bemunyi nandaka bisi SMS datai.

?? Udah ngetu makai tengah hari nuan kumang?

Kening Helen ngeredut pengudah macha SMS nya.Iya enda nemu sapa orang nya.

"Mesej sapa nya?" ku Ethan betanya.

"Enda nemu, enda dikelala aku numur tu," ku Helen
nyaut.

"Meda ya," ku Ethan.

Helen lalu nyuaka talipun iya ngagai Ethan.SMS nya tadi  lalu dipadamka iya tekala nya pengudah dibacha.

"Enggai aku ninga iya nya ngangauka nuan
kumang," ku Ethan.Talipun Helen terus ditaruh iya
ke dalam kuchik tanchut.

"Nama dih?" ku Helen ga betanya.

"Laban nuan kumang ati aku diatu, aku aja tau
ngangauka nuan kumang," kenu ku Ethan.Iya lalu
ngijapka mata sepiak ngagai Helen.

"Hurmm…nuan nemu sapa orang nya?" ku Helen
betanya.

Meda ari gaya jaku Ethan diatu baka ti dikelala Ethan orang ke nganjung SMS tadi.Pia ku dalam runding Helen.

"Entah, enda aku nemu.Engka salah numur kini
orang nya, nibuh kiruhka mesej baka nya nuan," ku
Ethan.

Helen ti duduk di sepiak nyau tetuchum meda ulah Ethan baka nya.Gaya Ethan bejaku berupai nandaka iya bisi ngembuan ati chemburu.

Pengudah pulai makai tengah hari nya seduai iya lalu belabuh ngaga pengawa diri empu ba opis.
Helen meresa email ti bisi dikirum tengah hari nya sekali tak bisi  bulih email ari Headquartres company sida di Kuala Lumpur.Ba email nya madahka ngasuh Ethan nurun kursus kin sepengelama sebulan.Panjai sintak seput ditarit  Helen pengudah macha email nya.Minggu siti Ethan sigi mesti nurun kursus kin.Helen neruska aja pengawa iya.Pulai gawa lemai legi mih aku madahka Ethan pasal tu.Pia ku pelin di dalam ati iya.

Tuk! Tuk! Tuk!  Munyi pintu bilik opis Ethan ditatuk.

Ditelengaka Helen pintu peda iya Ethan benung kiruh ngaga pengawa.Meda Helen tama, Ethan pan lalu ngetu ngaga pengawa iya, pail ka dibaca lalu dileka. Iya lalu ngangkatka diri ari bangku gawa.
Seduai iya Helen pan bela nudukka diri ba bangku sofa panjai di dalam opis Ethan.

"Bos, minggu siti nuan dikangauka sida Hq kursus
ke KL kin," kenu ku Helen.

"Ouhh…enti kenya lemai legi ga aku pulai ke menua
ngambi indai aku kitu.Pagila tua lalu ngagai opis
JPN ga kumang," ku Ethan nyaut.

"Hemm…sebulan nuan kursus din ila," ku Helen
bejaku baru.Mua iya lalu bisi bebali sinu.

"Hah? Sebulan pia?" ku Ethan betanya.

"Au arr…" ku Helen nyaut enggau mua ti majak sinu.

Nyu ngeredut mih kening Ethan dia, kumbai iya tak seminggu aja kursus ku Helen nya tadi.Enda nyadi mih aku tu ka berami bulan tu kenu ku iya sebana di dalam ati.

"Enda ngawa ga tua laun rami.Amat mih udah register ba JPN," ku Ethan. Jari Helen dijingkau lalu dikayam iya.

"Nya mih nadai ga nya ngawa.Enda lama sebulan nya dih, enda berasai pejam enchelak apus ga bulan," ku Helen.Iya pan nyau rindang ati nengkilaka Ethan ngayam jari iya dia.

"Ku aku lama nya, kada aku betah nuan ila dih? Nuan enggai enggau aku kin?"

"Eihh, nadai orang ngangauka aku kin. Ditu aja mih aku nganti nuan, enda nya berasai dih.Nih aku ti nganti bertaun-taun suba asai nya mih," ku Helen nyaut.Tembu bejaku, Helen lalu ngangkatka diri ari bangku sofa.

"Ka kini nuan dih?" ku Ethan betanya.

"Endai…pulai aram.Nyu udah pukul 5:00 lemai jam tu," ku Helen nyaut.

"Nama aku tak berasai nyamai agi ba opis ari ba rumah?" ku Ethan betanya baka orang empelah.

Iya lalu angkat ga ari bangku, bediri betunga mua enggau Helen.Dagu Helen lalu dipegai iya, mata seduai iya pan besabung.

"Makai malam ba rumah aku baru nuan legi," ku Ethan.

"Nuan enda nyadi pulai ke menua legi?" ku Helen betanya.

"Ohh…amat endar.Hermm….agi ka aku nunga nuan kumang. Nuan enggau aku pulai ke menua ga legi," kenu ku Ethan ka meraya.

"Eihh...malu aku," ku Helen.

"Indai aku aja di rumah din, nadai orang bukai.Nama ka ngasuh nuan malu?" pia ku Ethan.

"Ermm…au mih,"ku Helen nyaut.

Pedis endar iya ka mantah peminta Ethan.Enti ulih sigi ka disenurutka magang. Iya empu pan meseti bekelala enggau indai Ethan dulu.

Ethan dia berasai gaga ninga Helen setujuka peminta iya.Enggai amai iya jauh ari Helen diatu.Nambah ga nyau ka dianjung kursus sebulan ke Kuala Lumpur.Ni enda nyau makin enggai jauh asai ya.

??

Urung pukul 8:00 malam baru seduai iya datai di rumah Ethan di menua.Indai Ethan ti meda penatai Ethan malam nya nyu bebengap.Ethan nadai madahka diri pulai, tu ngenyit datai ke rumah ngemai indu enda dikelala.Lalu mayuh mih utai diperagam ati indai iya dia.Taja pia penatai Helen kia tetap disambut iya enggau tuchum manis di mulut.

"Aku tu Helen,"kenu ku Helen madahka nama diri lalu nyurungka jari ka betabi enggau indai Ethan.Jari Helen pan lalu disambut indai Ethan.

"Lapa nuan enda madahka diri ka pulai tadi dih Jang? Udah makai seduai? Enti empai ngambi aku manduk utai kedempa," kenu ku indai Ethan.

"Udah kenduai makai, nibuh ngiruh diri nuan.Pagila aku ka ngemai nuan ke Bintulu," ku Ethan.

"Nama pengawa aku kin dih Jang? Lembau endar aku ka enggau nuan kin, sapa ke nengkani jelu tupi kitai ti aku mindah?"

"Helen tu ka diambi aku nyadika menantu nuan indai. Nya kebuah aku ngemai nuan ke Bintulu.Kenduai ka ngaga surat kawin ba JPN pagila,"pia ku Ethan beterus terang.

"Au mih ti pia, pagila aku enggau nuan ke Bintulu."

Indai Ethan berasai tegepang ati ninga Ethan madahka diri ka bebini.Sigi dikearapaka iya mih Ethan nya bebini.Tang mih iya ka bemenantuka Sulan, diatu kira udah nadai jalai agi semua pengingin ati iya nya.Ngenangka Sulan bendar amat ka jadi enggau Ethan nyau ngasuh ati iya berasai sinu endar, nambah ga Sulan nya benung sakit raya. Pia ku anak ati iya betelai.

Malam tu naka pengelantang mih ati Ethan. Apai indai Helen udah setuju, indai iya empu udah ga setuju.Kira nadai mih penangul seduai iya Helen ti deka jadi.Bendar sida tiga berandau, enda berasai hari nyau berinsur jauh malam.Belabuh rindu ati indai Ethan meda Helen, tekala nya penatai Helen bisi meri pengelantang ngagai ati iya.Enda mih anak aku salah pilih kenu ku ati siku indu ti begelar indai betelai.

Malam nya sebedau tinduk, Ethan nyu kiruh meresi bilik peninduk iya.Balat bedebu bilik nya, maya iya kiruh meresi utai dia datai ga Helen tama kia.

"Tu bilik peninduk nuan?" ku Helen betanya.

"Au...mayuh debu ditu kumang.Anang guai tama kitu nuan.”

"Eihh...aku nulung nuan meresi utai ditu," ku Helen lalu ka nyingkau penyapu ti disandih di tisi dinding.
Ethan pan lalu beguai nagang Helen, ditangkap iya jari Helen ti ka nyingkau penyapu.

"Enda ibuh kumang, uji mandi nuan alai.Tembu aku meresi utai ditu ngambi nuan lalu tinduk ga legi," ku Ethan.

"Sapa tinduk ditu legi?" ku Helen betanya.

Ketemu iya semina bisi dua iti aja bilik peninduk di rumah nya.Enda patut iya enggau Ethan tinduk sebilik dia legi.Mupuk irau ati iya.Amat pan nyau ka jadi tang iya agi berasai malu amat ke Ethan.

"Tua tinduk ditu," Ku Ethan nyaut.

Helen enda dapat engkebut agi pengudah ninga Ethan bejaku munyi nya.Nyu asaika nikal pulai ke Bintulu baru mih iya dia.Takut, kesal, malu nyu bechampur magang asai di dalam ati.

"Lapa nuan enda bemunyi dih kumang? Nuan enggai tinduk enggau aku?" ku Ethan betanya enggau kening ti sengaja digaga ngeredut.

Mulut Ethan nya ari tadi ka ketawa meda gamal Helen nyau bebali masam baka cuka.Helen lalu enda tesautka Ethan.Ethan nyu majak ga ka ketawa.Pemuas nyu enda alah ditatka iya agi. Ketawa Ethan pechah ba bilik.

"Nuan aja tinduk ditu legi, aku tinduk di luar. Alai mandi diatu nuan," kenu ku Ethan sambil tuchum.Puas ati iya udah nundi Helen.

"Eeeee…nuan tu sengaja nundi aku!"

Nguing Helen lalu nyau iya ninggalka Ethan.Maya Helen nyau mandi, Indai Ethan ga tama ke bilik nya, iya lalu nudukka diri ba bangku belajar Ethan kelia.

"Jang, abas nuan Sulan pagila.Nyu raya amat iya diatu," ku Indai Ethan.

Nemu mih iya Ethan sigi enggai betemu enggau Sulan, tang ati iya enda nyamai enti nyema Ethan lalu enda datai ngabas Sulan.Irau nangika enda sempat.

"Pagila mih aku ngabas iya," kenu ku Ethan. Nyebut pagila ngapa, tang dalam ati sigi nadai asai ka ngabas Sulan.

Ninga saut Ethan munyi nya lalu berasai lantang mih ati Indai Ethan. Iya pan pansut ari bilik nya.
Ethan nyambung pengawa iya baru.Tusun iya keresa di dalam bilik nya, ka disegulka iya ke baruh katil mih sekeda barang.Dia iya nyu tepedaka tungkat ti dibeli Sulan ke iya suba.Lalu tegenung Ethan meda tungkat nya.

"Uitt, dah tembu nuan?" ku Helen nyapa ari mua pintu.

Tekenyit tudah Ethan ninga sura nyawa Helen laban iya ti nyau anyut ngenang Sulan tadi.Pagila mih aku ngabas Sulan kenu ku dalam ati iya ngaga pemutus.Ngenangka pemanah budi Sulan ngagai indai iya ngelama tu nyu berasai besalah ga iya ti lalu enda datai ngabas Sulan.

"Pansut dulu nuan alai.Aku ka begari," Kenu ku  Helen.

Ethan pan lalu mansutka diri. Malam nya Helen tinduk di bilik peninduk Ethan, Ethan tinduk di bilik besai tang seduai iya sempat beranjung SMS, nyau baka ti jauh ari pangan diri.Rindang amai mih ati nya dia.

Ethan?? Ka tama kia aku tu, enda betah nuan.
Helen?? Udah kunchi aku pintu.
Ethan??Aku bisi kunchi spear.
Helen??Eee...udah nya tinduk tua aram.
Ethan??Nuan ngemai aku tinduk enggau nuan kia?

Lama Helen enda malas SMS, nemu mih Ethan Helen dah nindukka diri tauka Helen nyu enda tan ditundi iya.Sebedau lelap panjai garis senyum ba mulut Ethan malam tu.

Pagi hari siti Ethan ngemai Helen ngabas Sulan dulu sebedau deka mupuk pulai ke Bintulu.Sulan ti meda penatai Ethan nyu ngelabuhka ai mata.Naka pengelengau ati iya ke Ethan ngelama tu.Tang meda bisi indu enggau Ethan kia, iya pan lalu belabuh enda nyamai asai.Nambah ga indu nya sigi kala dipeda iya begulai enggau Ethan.

Ethan tekenyit meda Sulan nyu kurus amat, sebuti enda ayan tulang kerigai.Mata iya ngerung, buk pan nadai serambar ba pala.Enda berasai nyu sinu amai asai ati Ethan meda pendiau Sulan.Sulan nadai tentu ka dibai berandau.Meda baka nya Ethan pan ngemai Helen mupuk.Maya ka mupuk dia dih lengan Ethan lalu dipaut Sulan.

"Aku bisi utai ka dikerandau enggau nuan, aku ka berandau enggau nuan siku aja,"kenu ku Sulan.