Enda berasai taun nyau beganti. Ethan pan udah nembuka sekula iya abis pom 5.Tu nyau ketiga bulan iya udah diau di rumah.Diatu iya semina nganti pemutus peresa SPM aja.

??

Maya hari ke penudi peresa SPM,

"Ethan,aram begelumu makai di kantin kitai,"ku
Asun madahka Ethan.

"Aram mih," ku Ethan nyaut.Seduai iya lalu bejalai
seretai ngelawa kantin sekula.

Sehari tu keretas ke penudi SPM,sehari tu mega hari ke penudi nembiak pom 5 di sekula nya begulai dia.Ari jauh maya pejalai nuju ke kantin,
mata Ethan lalu tepedaka Chumang benung duduk dedugau ba bangku kantin nganti penatai Asun.

Asun seduai Chumang pengudah ti besulu endang sigi selalu makai begempuru enggau orang di kantin.Bungai pengerindu antara Chumang seduai Asun nyu makin nyerumbuk.Enti suba ati Ethan semampai keketap laju lebuh meda Chumang.
Mata ti keran deka merening Chumang pan enda kala ulih ditagang.Tang diatu Ethan udah ulih mupuk muai semua pengingin ati iya nya.

Chumang pan nyau deka mantaika senyum ngagai iya, laban iya ke bekaling enggau Asun.Ethan nemu senyum ti diukir ba mulut Chumang nya semina diayanka enggau ati semadi laban ba penemu Ethan,Chumang sigi enda kala bisi ati rindu meda iya ari suba.

Di kantin sekula,

Bala nembiak pom 5 bela bekedugau duduk makai enggau bakih diri.Mayuh macham utai dikerandauka sida.Bisi nya lalu minta pengampun ari pangan diri laban ngira maya sepemanjai begulai ba sekula nya engka tak bisi ngemediska ati pangan diri.Sepengudah tu ila enda ditemu kemaya agi sida ke ulih begulai baru.

Enda jauh ari kantin bisi sepasang mata rindang nengkilaka Ethan ari tadi.Tang Ethan enda nemu diri benung ditengkilaka orang.Orang ti nengkilaka iya nya ingin amai asai di dalam ati deka duduk betunga mua berandau enggau Ethan dia.Tang pemerani ba ati bangat kelalu nadai dianjung.Iya enda berani mansang damping Ethan.Ari pom 1 nyentukka abis pom 5 pengawa iya semina nengkila ari jauh aja.

Empat bulan pengudah nya,

Di rumah, indai Ethan benung bepandukka lauk ke dempa seduai menyanak malam legi.Ethan duduk di bangku meda TV sambil lalu berundingka pengawa ti deka digaga iya di kebun pagila.
Pemuas berunding nyu bisi pengingin ati ka nginti ga iya,lama udah enda ngayam ginti.

Pengudah abis sekula pom 5 ,Ethan lalu gawa nulung indai iya di kebun sawit aja.Semua pengawa niang apai iya kelia nyu di kereja iya magang diatu.Ethan endang sigi rajin enti gawa di tanah.

Pemutus peresa SPM iya empai lama pan chukup manah.Enda disadang bala pengajar di sekula nya Ethan ulih lulus ba semua mata pelajar iya.Enti nitihka pemutus peresa nya Ethan sigi ulih nampung pelajar iya ngagai tikas ke tinggi agi. Tang ati iya enda kempang deka ninggalka indai iya kediri.Dia iya lalu ngambi pemutus deka ngibun indai iya serta gawa bekebun aja.

Chumang enggau Asun sama nampung pelajar ba IPG di Johor dedin.Bela betitih mih seduai iya.Maya Ethan tekenang ke dua iku nya iya lalu ngarapka pelajar seduai nya mujur.Asun kaban ti paling mentas,Chumang orang ti kala dikerinduka iya.Enda patut ga aku enda ulih meri sukung ngagai seduai iya.Pia ku Ethan betelai di dalam ati.

"Ethan!!"

Munyi nyawa orang indu didinga Ethan ngangau ari tengah laman rumah,lalu nyenguk mih iya ke mua pintu deka meda sapa ti ngempu sura nyawa nya tadi.

Di tengah laman Sulan benung tuchum lelinsum lebuh seduai iya Ethan betemu perening mata.Di mua iya ngayanka tuchum tang di dalam ati nyu keketap kesal nya dia.Ethan endang semampai ngasuh ati iya kesal belama! Ba jari Sulan ti benung dedegi dia mega bisi migai siti kontena.

"Tu kuih penyaram gaga aku tadi,"ku Sulan lalu
ngulurka kontena ka nyuaka Ethan.

Ethan enda nyaut.Sulan dilakka iya pia aja.
Ngangau niki pan enda.

"Ooo..Sulan niki dulu mih.Enggau aku ngirup
kupi," ku Indai Ethan bejaku maya nyenguk ari
jenila dapur rumah sida.

Sulan pan lalu beguai niki.Laju singkang kaki taja betubuh gemu.Gaga mih anak ati dikangauka indai Ethan niki.Seduai iya indai Ethan lalu duduk betunga ba beranda rumah.

"Mayuh diri penyaram gaga aku tadi ibo,"ku Sulan
ngepunka randau.

"Berapa kilo gaga nuan?"ku tanya Indai Ethan.

"3 Kilo dilumai aku tadi ibo,sekilo da empai di
panduk dia,"ku Sulan nyaut.

Rindang mih Sulan berandau enggau Indai Ethan.
Ethan enda kiruhka penatai Sulan.Enda lama udah nya datai kia anak tuai rumah sida,nganjungka Ethan sampul surat.Sampul lalu dikerebakka Ethan tekala nya.Bisi ati gaga,bisi ati tusah iya pengudah macha isi di dalam surat nya.

"Surat nama nya Ethan?" ku indai iya nanya.

Sulan lelengu aja duduk nunga seduai nya meindai dia.Gegenung nganti Ethan ke bejaku.

"Surat ari UiTM tu indai,aku bulih tawaran ngambi
Diploma Graphic Design & Digital Media," ku saut
Ethan.

Indai iya enda tentu nemu nama reti course ke disebut Ethan.Tang ninga Ethan bisi nyebut UiTM lalu gaga mih ati iya.Laban nya siti sekula ti manah endur Ethan nampung pelajar ba runding tudah tuai.

"Apuu..manah amai nya Jang,anang nulak nya
nuan.Ingatka jaku niang apai nuan kelia Jang,
ngichaka nuan bulih penyenang dudi ari ila,"kenu
ku indai iya.

Seraya ke bejaku lalu bisi ka belaie ai mata tudah tuai.Asal bisi besebutka niang Apai Ethan sigi lalu ka naya meh ai mata Indai Ethan.Bangat kelalu enda betah mih asai ati iya pengudah ditinggalka laki ti dikesayau.

Sulan ti sedarka Indai Ethan nyau baka ti deka nyabak,dia iya lalu beguai mayuk belakang siku nya.

"Sabar meh Ibo,anang kelalu tusah ati nuan.
Enggai niang Apai Ethan meda nuan tusah ati
baka tu,"kenu ku Sulan ka ngelantangka ati Indai
Ethan.

Malam sepengudah makai Ethan lalu tama ke dalam bilik peninduk iya.Puas iya berunding ke surat ari UiTM nya tadi.Di dalam ati iya sigi ingin deka nerima tawaran nya,tang iya bangat enda kempang deka ninggalka indai iya nguan diri.Nambah ga indai iya bisi penyakit darah tinggi.
Nyu serba salah mih asai di dalam ati Ethan dia.Ku pemutus ati iya endang sigi enggai mih nampung pelajar agi.Tang peluang ke datai sekali tu bisi narit ati iya mimit.

"Jang,dah tinduk nuan?" ku munyi sura nyawa
indai iya bejaku seraya ke lalu natuk pintu bilik.

"Empai aku tinduk indai,tama mih,"ku Ethan nyaut.

"Jang,anang entu mayuh runding nuan.Terima aja
tawaran nya.Anang irau ke aku,nemu aku ngintu
diri ditu," ku indai Ethan meri jaku peransang.

Taja pia di dalam ati iya tetap bisi berasai kakang deka ngelepaska anak ti dikesayauka iya belelang jauh ke menua orang.Tang pengasai ati enda tau kelalu dititih.Ku dalam runding indai Ethan deka meransang ati diri empu.

Ati org indu ti nyadi indai sigi baka nya mih, jampat sinu sereta siru.Tang Indai Ethan enggai kelalu ngira diri,pemujur pengidup Ethan dudi hari ila penting agi ba iya.Pengudah seduai meindai berandau malam nya,Ethan pan meri pemutus ati deka nampung pelajar iya baru ba UiTM Kota Samarahan.

June 2007,

Ethan nurun ngerejista diri ba UiTM, lalu berengkah mih pengidup baru iya sehari nya.Diau di menua baru,besekula baru, serta bulih kaban baru.

Bulan beganti hari beganti,taun beganti,enda berasai nyau genap dua taun udah Ethan belajar di UiTM.

??

Di menua Ethan,

"Ibo ,bisi di rumah nuan?"ku Sulan ngangau ari
tengah laman rumah sida Ethan.

Ndai ga orang nyaut ari rumah.Kini meh Ibo tu?
Ku Sulan betanya di dalam ati.

"Tu raga enggau kasut kebun iya bisi ga di kaki
tangga,enda patut iya ke kebun." kenu ku Sulan
bejaku kediri.

Nyau irau ati Sulan meda Indai Ethan lalu nadai nyaut iya.Tambah mega iya nemu Indai Ethan sigi enda tentu bepengerai endar.

Sulan meh indu ti chukup mentas begulai enggau Indai Ethan,iya suah ngabas siku nya kia ninting lemai.Datai ngerandau deka merindang ati Indai Ethan.Tudah indai Ethan laban ke diau kediri sekumbang Ethan ti udah nampung pelajar,dia iya endang berasai gaga ati tiap kali Sulan datai kia.

Laban ti nyu suah amat ke begulai kaul seduai iya pan nyu makin rat.Sakit tauka gerai Indai Ethan sigi Sulan mih ngintu iya.Sida Sulan sebilik nyau ngambu indai Ethan nya baka bala sida iya empu.

Nambah ga sida sebilik kasih meda tudah ti diau kediri nadai kaban belayan di menua nya.
Kekadang ngangau ngemai Indai Ethan enggau sida begempuru makai.Maya bejalai ke pasar selalu dibai sida iya meh Indai Ethan betawing enggau sida ke pasar.

Chukup manah sida Apai Paran nya sebilik enggau Indai Ethan.Ni ke engka utai dempa ke bisi sigi enda kala enda bebagi enggau Indai Ethan.Ya ga sida Apai Paran endang sigi orang pemisi.Mayuh sawit laban sida ke mayuh tanah endur nanam.

"Ibo,ni nuan??"

Nyau majak irau ati Sulan.Iya bejalai ngelingi tengah laman rumah, tang lalu nadai ga meda ayas Indai Ethan sebelah nya.