"Aram nepan enggau kami seduai indai,"kenu ku
Sulan.

"Nibuh mih,ka ngena bas aja kami duai,"ku saut
Ethan.Mata pan lalu gegining ngiga Indai iya.

"Tan sapa indu nya tadi?"

"Heh,sulu aku."

"Ethan!! Aku nanya nuan memanah tu."
"Ya baka ni saut ka didinga nuan dih?"

"Tan ,nuan agi pedis ati agai aku?"

"Nama gaga aku ka pedis ati ke nuan agi?"

"Enti nuan amat enda pedis ati agi ,meri aku
peluang kedua ga."

"Enti nyema aku meri nuan peluang nya ukai
peluang kedua, tang peluang ketiga"

"Tan ,nuan enda nemu keadaan aku maya nya,aku
sigi amai agi keran ke nuan baka suba,ati aku
enda kala berubah.Penyayau aku ke nuan agi
mengkang baka selama datai ke sehari tu."

"Kati baka nuan dih? Nuan kala nemu baka ni
keadaan aku? Sulan,nuan udah kelalu suah
ngemulaka aku!"

"Aku ngaku, sigi amat salah aku laban beduan
nuan dulu,aku nesal enggau ulah aku empu.
Kebuah aku mai nuan betemu ba taman suba
laban ka minta ampun ngagai nuan.Tang mih aku
bisi penangul maya nya."

"Penangul laban nuan betemu enggau lelaki
bukai?"

"Nama reti jaku nuan munyi nya Tan?"

"Nuan ngumbai aku enda nemu? Mata aku empu
meda nuan di dalam kerita enggau lelaki nya,
enti orang nusi engka enggai aku pechaya tang
mih enda patut mata aku bula."

"Tan,aku enda nemu baka ni ka nerangka utai ti
nyadi suba.Maya nya aku sigi amat bisi pansut
tang mih talipun aku tinggal.Udah nya....udah
nya..aarrhh pedis amai aku ka nerangka ngagai
nuan,"Sulan lalu nundukka pala,nyu nitik seleka
dua ai mata nesal ngemasahka kuyu.

"Ditu endur seduai pia,"kenu ku apai Paran datai
nyapa.Bisi indai Ethan enggau indai Paran mega
entudi belakang apai Paran.

Meda apai iya datai Sulan lalu berumban nguingka mua iya ke bukai.Ngendas ai mata ke nitik tadi.

"Aram mupuk pulai kitai.Enggau nepan ba kami
mih seduai meindai,"kenu ku apai Paran madahka
Ethan.

Enggai enda nyau ga Ethan nepan kerita sida Sulan.Di dalam kerita seduai iya bela enda bemunyi.Sulan ti duduk muak ke depan besepiak enggau apai ya lalu mutarka lagu..

??Nyema nuan bisi tepansa ke jalai
Bekau tua betundi begagai
Aku arapka ati nuan ambai
Bebali nikal pulai
Aku meruan baka tu
Siang malam aku nganti ditu
Nuan enda diganti aku
Idup matiku sayau selalu??

Ethan ti duduk di belakang terus mejamka mata ninga lagu diputarka Sulan.Tak nyu berasai nyilu telih lama ketegal Sulan suba.

Datai di rumah malam nya Ethan terus mandi meresi diri lalu beradu deka ngelelapka mata.Udah ngalika diri ba tilam iya nyu ingatka Lahung.Ethan angkat baru lalu ngiga talipun.Puas rerigau ngiga, nadai ga talipun ditemu dalam bilik.Nyau iya ke dapur ka ngelawa bilik mandi .Datai di bilik mandi Ethan terus meresa kuchik tancut nyangka talipun agi ditaruh dalam kuchik.Abis kuchik dikebuk nadai ga talipun ditemu.

Nyau berunding baru iya ,kada enda teberayan ba kerita sida apai Paran.Malam nya mega Ethan lalu ke rumah sida Sulan deka nanyaka talipun iya engka tak amat bisi teberayan ba dalam kerita.

Ditatuk iya pintu rumah sida Sulan,enda lama aja lalu telenga pintu.Ayan Sulan di mua pintu beseretai enggau tuchum manis di mulut.Talipun Ethan sigi udah ba jari iya..

"Nuan ngiga tu?"ku Sulan betanya lalu ka nyuaka
talipun Ethan.

Ethan enda nyaut.Talipun iya ba jari Sulan terus dijengkau.Udah nya iya lalu nguing mulaika diri ke rumah.Datai di rumah ,ati nyu enda sabar ka nganjung SMS ngagai Lahung.ON iya talipun ngiga numur Lahung,tang mih nadai ditemu.Ukai numur Lahung aja nadai tak semua numur di dalam talipun nya nadai agi.Puang phone book.

"Arrrhhh dihhhh Sulan!"kenu ku Ethan bejaku
enggau ati geram.

Semalam-malam nya Ethan nganti talipun bemunyi.Ngarapka Lahung bisi ngiga iya.Tang talipun terus sunyi.Seminggu pengudah nya Ethan nyu dikangauka orang gawa ke menua Bintulu.

??

Pejam enchelak enda berasai nyu setaun udah Ethan netap gawa di Bintulu ba Company Graphic Press.Sdn.Bhd. Berasai mujur iya gawa dia taja gaji enda tentu besai iga.Sigi baka mih iya ga fresh graduate.Semua orang pan bepun ari baruh magang.Pia ku dalam runding Ethan meransang ati diri.

Lebuh maya ujung minggu Ethan selalu mulaika diri ke menua.Nyamai ka pulai ninting minggu ngundang indai iya laban damping menua endur gawa.

Hari beganti ,bulan beganti pengawa Ethan makin mujur.Diatu iya pan nyu udah bisi kerita diri empu. Kerita Viva. Nyamai dikena iya barang maya jam ka pulai ngundang indai iya di menua.Lebuh empai bisi kerita enggai enda pan nitihka pejalai jam bas aja mih suba.

Ujung minggu siti tumu Ethan mulaika diri.Datai di rumah baka selama mih lalu meda mua Sulan nya dedugau nganti penatai iya.

Enti enda ngenatika indai iya sigi enda Ethan pulai ke rumah.Semadi amat asai ka betemu mua enggau Sulan.Nya ka pan enda pulai indai diri empu mesti di abas belama.

"Duduk ditu Jang enggau kami duai Sulan makai
penyaram,"kenu ku indai Ethan.

Mansang ga Ethan kia nunga indai iya.Tang iya sigi enda bejaku enggau Sulan.Kuih penyaram enda mih dijingkau.Nadai ati ka makai penyaram digaga Sulan agi.

Maya sida tiga benung dedugau,datai ga Asun kia.

"Tan,bisi dia nuan?" ku Asun rerangau ari tengah
laman.

"Ditu mih aku.Niki arr.."

Asun lalu beguai niki pengudah ninga Ethan nyaut iya.

"Ooo ibu nama berita?"ku Asun nanya indai Ethan.

"Manah Igat,lalu mih Igat ..duduk enggau kami
ditu."ku indai Ethan ngelaluka penatai Asun.

Gamal Asun dipeda tampak amat dia.Berupai endar benung gaga.

"Ujung minggu tu jadi kami duai Chumang."ku
Asun madahka Ethan.

"Pia, dini seduai rami?" ku Ethan betanya.Nadai ga
asai nenama ati iya maya ninga berita ti
dipadahka Asun.Engka nyu udah nadai agi nama
Chumang di dalam ati iya dia.

"Ba hotel Goldenbay Bintulu kenduai ngaga
pengerami." ku Asun nyaut.

Ninga nama util nya lalu mulaika pengingat Ethan ngagai Lahung .Dia mih endur seduai iya Lahung betemu suba.Ninting hari ninting malam iya nganti Lahung betalipun ngiga iya ,tang mih Lahung lalu nadai meri berita datai ke sehari tu.