7 bulan pengudah nya.

Ethan nyu udah meli rumah di Bintulu.Pengerindu iya ke Lahung mega nyu makin dalam sedalam.Lemai tu legi iya deka ngambi Lahung ke airport laban Lahung bisi pulai peremisi Gawai.

Di Airport Bintulu.

Lahung lalu deka merap Ethan maya meda Ethan udah datai di depan mata iya.Tang Ethan beguai nagang tubuh Lahung.Kedua iti tandan bahu Lahung terus ditangkap iya sebedau tubuh siku nya sempat damping ke dada iya.

"Isskk....enda lelengauka aku nuan? "ku Lahung lalu
mantaika mua enda puas ati.

"Lelengau aku dih, aram arr...tama kerita dulu,"kenu ku  Ethan.

Luggage Lahung terus dikatung iya tama ke dalam bonet kerita.Lahung entudi ari belakang.Bisi telih mimit asai ati iya meda Ethan enggai diberap tadi.Meda Ethan nepu luggage iya ngagai bonet kerita Volkswagen Tinguan nyu melut mata Lahung dia.Berumban iya bejalai ngelawa Ethan.

"Tu  baru ya kerita! " kenu ku Lahung.

Panjai garis  tuchum iya meda kerita baru Ethan.Tama ke dalam kerita seduai iya pan lalu mupuk bekejang ninggalka airport Bintulu.

"Ka kini nuan udah tu,"ku Ethan betanya.

"Kini nuan kia mih aku.Ka enggau nuan aja aku tu."

"Enggau aku kini?"

"Enggau nuan pulai ke rumah."

Terus bebali kelat gamal Ethan ninga Lahung ka enggau pulai ke rumah iya.Ukai nya kala ditama indu bukai rumah Ethan kelimpah ari Indai iya enggau Sulan.

"Pedis amai pala.Ka belelak dulu aku tu," ku Lahung
sambil lalu mechal-mechal kulit kening.

Ngichaka Ethan beguai ngemai pulai ke rumah.Ku pelin dalam ati iya.

"Ke klinik dulu ga tua enti nuan pedis pala."

"Isskk... pulai ke rumah aja.Nyamai agi belelak ba rumah,"kenu ku Lahung.

Nyu ngeriut kening Lahung baka orang ti benung pedis pala amat-amat mih iya dia.Ketegal ati Ethan ti chukup sayauka Lahung nyu alah ga iya diumbuk  Lahung.Enggau ati semadi mih Ethan ngemai Lahung pulai ke rumah.

Datai di rumah Ethan lalu nyuruh Lahung diau belelak di bilik peninduk ti enda dikena dia.Lahung enda disagi iya pansut.Nyu malam hari nya baru Lahung dikemendarka iya pansut ari bilik.

"Mandukka  tua utai dempa nuan.Nyu lapar perut aku  tu,"kenu ku Lahung merintah Ethan.

Lahung empu benung dedugau meda drama ba TV di bilik besai.Ketegal penyayau ke Lahung lalu nyau mih Ethan manduk utai kedempa  seduai iya malam nya.

Tembu makai, tembu mandi apa semua seduai iya lalu masau jam meda movie di bilik besai.Lahung nyandihka pala iya ba tandan bahu Ethan.Maya Ethan enda sedar, jari Lahung lalu  belubah-lubah merap perut Ethan.Ethan nyu enda nyamai asai digaga Lahung baka nya.Iya lalu beguai ngangkatka diri ari bangku.

"Empai ngantuk nuan?"ku Ethan betanya.

"Au...nyau ngantuk mih aku tu,"ku Lahung nyaut.

"Tinduk enti ngantuk.Ba bilik endur nuan belelak tadi nuan tinduk."Tunjuk jari Ethan terus nunjukka pintu bilik  endur Lahung tinduk.

"Enggai aku tinduk kediri.Ka enggau nuan,"ku Lahung  bejaku enggau sura nyawa ti alus serta lembut.

Pia aja pan  udah chukup ngasuh ati lelaki Ethan begetar.Enggau naka ulih iya nagang ati diri.

"Lahung, entu tua udah jadi ila mih nuan tinduk enggau aku,"kenu ku Ethan nguji ngumbuk Lahung.

Lahung enda bemunyi ninga saut Ethan.Tang udah nya ka ga iya senyum.Kuyu Ethan terus disium iya ngenyit.

"Ambi ke bini jampat agi ga aku tu,"kenu ku Lahung.

Ethan nagunka pala lalu tuchum.Udah nya seduai iya lalu seretai angkat ka tama ke bilik diri.Maya seduai iya benung nyingkangka kaki, pintu penama rumah Ethan  telenga ngenyit nandaka bisi orang deka tama.Enggau ati keketap kesal Ethan lalu berumban ngelawa mua pintu.Ka nemu sapa orang ke datai.Taja pan dalam ati sigi dah nemu nya indai iya.Tang laban Lahung bisi enggau iya dia ati Ethan nyu berasai nangika penatai indai iya.

Datai di mua pintu endang amai indai iya enggau Sulan mih ti deka tama ke rumah diatu.Lahung lalu nyau ga enggau nyenguk ke mua pintu.Dia mih mata seduai iya Sulan terus besabung perening.Sulan merening Ethan, udah nya merening Lahung baru.

"Nama gaga indu tu ditu?"ku Sulan betanya.

Ethan enda nemu baka ni ka nyaut Sulan.Indai iya bebengap aja mih dia.Sekali tak enda memukai Sulan mansang ngagai Lahung lalu ngeruntun buk Lahung.

"Nyaaaa....sepi nuan!!! Nama pajuh nuan kitu?"ku  Sulan  bejaku nganu.

"Akaiii...!!! Pedis...!!!"ku Lahung nyerauh.

Dijangkam iya pala Lahung, nyau tekusai abis buk Lahung.Pedis amat ati Sulan meda bisi indu bukai enggau Ethan  di rumah.

"Enda nemu malu nuan nya udah bisi tunang, nama
pajuh  nuan enggau Ethan ditu?? "ku Sulan.

"Endu, mulut nuan jaga mimit.Anang sengapa utai
disebut,"ku Lahung.

Lahung pan lalu malas ngeruntun buk Sulan.Nyau bebidat mih seduai iya dia.Meda baka nya nyau berumban Ethan ngelara seduai iya.

"Lapa ga nuan ngaga iya baka nya?"ku Ethan nganu  
Sulan.

"Nuan bepangan enggau indu tu?? Nuan nemu ka iya tu  udah betunang?"ku Sulan.

Meda Lahung bisi di dalam rumah Ethan dia nyau asai kena daing api pengangat ati Sulan.Nambah ga Lahung nya tunang orang.

"Hoiii…bejaku anang sengapa utai disebut,"kenu ku
Lahung  bejaku sambil ngeluruska buk ngena jari.Nyau  tusut  amat buk  iya pengudah diruntun Sulan tadi.

"Nuan enda ngelala aku? Aku tu ngelala nuan aaaa!!!" kenu ku Sulan.

Sulan ga bisi datai ke rumah sida Lahung maya Lahung betunang suba.Ninga jaku Sulan munyi nya, Lahung lalu meratika gamal Sulan.Nya baru iya ingatka Sulan nya ipar betunggal iya.Indu ti kala ngangauka indai Ethan "Indai"suba.

"Ohhhoooo…nuan tu mih ti ngambu diri bini Ethan suba? Enda malu gi nuan nya ngambu ngapa!!"ku Lahung.

Sulan nyau mansang nyamah Lahung baru pengudah ninga jaku Lahung munyi nya.Terus dikeramak Sulan mua Lahung.Ethan lalu beguai nyelara seduai iya baru.

"Nuan nanahka iya?"ku Sulan ga nganu Ethan.

"Nadai nanahka sapa-sapa.Duduk dulu seduai indai 
alai,"kenu ku Ethan.

Indai Ethan nya ari tadi semina bebengap aja meda utai ke benung nyadi ba depan mata.Pengudah indai iya enggau Sulan duduk ke bangku, Ethan lalu narit lengan Lahung ngemai iya pansut ari rumah nya.Meda diri dibai pansut ari rumah, Lahung lalu nguyaska pegai jari Ethan.

"Ka kini nuan mai aku?"ku Lahung betanya.

"Nuan nganti di luar ditu dulu.Aku ngambi barang nuan  ke bilik lalu nganjung nuan bemalam ba hotel legi,"ku  Ethan nyaut.

"Isskkk...nama hal aku diburu nuan pansut?? Indu nya tau ga bemalam ditu? Indu nya penting ari aku?? "ku  Lahung enda puas ati.

Dipegai Ethan tandan bahu Lahung.Kebendar ya puas  Ethan nyabar ati iya dia diatu.Ingin asai ka nganu tang berasai serba salah.

"Lahung, aku nganjung nuan pulai ke hotel diatu!"

Tajam perening mata Ethan ngagai Lahung.Nya baru Lahung ka nitihka peminta Ethan.Maya nganjung Lahung ke hotel, Ethan enda bemunyi aja di dalam kerita .Iya enggai bejaku, taja pan mayuh utai ka ditanya iya ngagai Lahung dia.Tang iya nagang ati diri.Iya irau serta nangi enggaika iya nyu ngeransi enda tetagangka ati diri nganu Lahung enti nyema iya bejaku diatu. Lakka Lahung empu beterus terang ku dalam ati iya meri pengarap.

Ethan nyangkaika kerita di depan Hotel My Inn.Dah kerita sangkai Lahung lalu nyium kuyu Ethan sebedau iya ka mansutka diri ari kerita.Taja udah disium ba kuyu tang Ethan nadai mantaika tuchum baka selama.Ethan mega enda nyium kening Lahung.Malik mua Lahung pan iya enda.Ethan merening ke luan kerita aja.Perening puang.

Meda baka nya Lahung pan lalu mansutka diri ari kerita.Udah pintu kerita ditelenga, Ethan lalu narit jari Lahung.Deka ngetanka Lahung enda ngasuh siku nya pansut.Lahung pan enda nyadi pansut, mulut iya lalu ngukir tuchum.

"Lahung, nuan  nadai utai ka dikerandau enggau aku? Utai ka dipadah tauka  diterangka? " ku Ethan betanya.

"Ermmm…enti ka berandau sama check in tua aram," kenu ku Lahung lalu senyum ngagai Ethan.

Ninga Lahung ngemai check in lalu panjai sintak seput ditarit Ethan.

"Pagila aja mih berandau," ku Ethan ga.

Enggai iya dibai Lahung check in.Ati iya irau serta nangika Lahung ngaga ulah enda menuku baru.Lahung pan nyau ga mansutka diri udah nya.Ethan pan mupuk deriba baru.Di dalam kerita, iya enda nemu kini tunga ka dituju.Ka pulai ke rumah pan nadai ati laban Sulan bisi di rumah.Ingatka ulah  Sulan belaya enggau Lahung tadi nyau ngenusutka ruding aja ditambah agi enggau jaku ti disebut Sulan madahka Lahung udah betuanang.

Ethan enda nemu naka ni pengamat jaku Sulan .Tang Ethan ngarapka nya jaku ti disebut Sulan ketegal pedis ati aja.Ka Ethan nanyaka pengamat ba Lahung empu tang ati iya enda ga kempang.Kebuah pia laban iya bisi ga berasai nangika jaku Sulan nya engka endang sigi amat.Tang enti ulih iya ngarapka utai disebut Sulan semina jaku ringat aja.

Ethan nilik jam ba kuan  baru nunjukka pukul 9:00 malam.Udah nya iya lalu mai pejalai kerita deriba ngelawa Hyello Cafe &Bistro.

Pengudah duduk di dalam bar nya iya lalu ngudar Carlsberg.Bisi 4 butul udah diirup, tulang pan nyau lemi.Pala nyu berat asai, utai dipeda nyau kerabur.
Enda berasai Ethan pan lalu lelap enda nemu diri agi.Nambah ga iya  sigi enda nakal ngirup ai bisa.

Nyu pukul 2:00 pagi, Bar pan nyau ka ditutup.Tang  Ethan agi tinduk ningkap ba mija.Orang ti gawa dia nguji ngerak iya lalu enda ga iya dani.

Meda baka nya diambi orang ti gawa nya talipun iya.Lalu digiga sida numur di dalam nya.Orang terus betalipun ngagai numur Helen laban meda nama Helen diengkah iya "My secretary."

Datai Helen kia lalu ngemai Ethan pulai.Sebutika ulih bejalai mih Ethan maya dibai pansut.Sigi udah enda nemu diri amat.

Pagi hari siti..

Dani Ethan  meda diri ukai di bilik peninduk iya empu, diperening iya utai sebelah bilik nya tak lain amat.

"Aihh..dini endur aku tu?"ku Ethan bejaku kediri sambil jari nyagam pala ke agi sesebening lalat asai bekau kena pangka ai carlsberg demalam.

Angkat iya  ari katil peninduk.Perening iya mija ti enda jauh ari katil peninduk nya dia iya lalu tepedaka siti bup.Kaki iya nyingkang begadai ngelawa mija.Enda nemu nama ati iya asaika diansak-ansak ka meda bup nya.

Ambi iya bup nya peda iya judul ba kulit depan"Heaven Is For Real."Udah nya dilekaka iya baru.Ethan ka pansut ari bilik nya.Pansut ari bilik lalu lanjur nurun ke bilik baruh.Datai di baruh baru iya nemu diri di rumah Helen.Ke dapur iya ngiga Helen, abis   bilik dijenguk nadai ga tetemuka Helen.Nyau ga Ethan niki ke atas baru, ditukangka iya pintu ti di sepiak pintu bilik endur iya pansut tadi.Peda iya Helen benung tinduk di dalam bilik nya.Ethan lalu  ngusuk mata, mechal kening.

Kati aku tau datai ditu? Ku iya betanya di dalam ati.
Ka ngerak Helen enda kempang ga laban meda Helen jenak amai tinduk.Ditikupka iya baru pintu.Helen ti di dalam bilik nya tadi tedani ninga munyi pintu ditikup.
Iya  lalu angkat .Pansut ke luar meda Ethan benung ka bejalai nurun tangga.

"Lama nuan udah dani?"ku Helen betanya.

Ethan nguingka mua malik ke  belakang.Peda iya Helen ti nyapa.Meda Helen  baru dani tinduk nyu bisi ngasuh ati lelaki iya begetar mimit.Nadai bekebuah sekali.
Ngena gari seksi enda ga Helen.Tang ati Ethan tak nyelaie asai.

"Enda tentu lama endar aku udah dani,"ku Ethan nyaut  lalu berumban kaki iya bejalai niti tangga nurun ke baruh.Helen pan lalu entudi iya nurun.

"Ni apai enggau indai nuan?" ku Ethan betanya.

Iya dia agi benung alit ati kati  iya tau tinduk ba rumah Helen.Enti nyema apai indai Helen nya nemu irauka orang nyu salah sangka.

"Udah pulai peremisi gawai ke menua," ku Helen nyaut.

"Ouhh..."ku Ethan.Bisi lantang mimit asai ati iya udah nya.

"Baka ni aku tau datai ditu?"ku Ethan betanya baru.

Helen tuchum dulu sebedau nyaut Ethan.Diatu seduai iya nyau  bela udah nudukka diri di bangku sofa bilik baruh.

"Malam tadi bisi orang call aku ngasuh ngambi nuan di  bar,"ku Helen nyaut.

Nya baru Ethan ingatka diri telelap  di dalam bar demalam.Enda berasai nyau malu iya ngenang ulah diri ba Helen.Tekala nya mua iya  bebali mirah.Helen ti sedarka mua Ethan  udah bebali  lalu beguai bejaku…

"Sekali sekala nyenguk bar nadai nya ngawa,"ku Helen.

"Herm..."Nya aja saut Ethan.

"Nuan ka breakfast ditu pagi tu?"ku Helen betanya.

"Au mih,"ku Ethan.

Seretai iya ti nyaut 'au' talipun  ba kuchik tanchut pan bemunyi.Terus tuchum Ethan meda nama Lahung ayan ba skrin.

"Ka pulai dulu aku.Bisi pengawa.Ila tua breakfast."

Ethan lalu beguai deka mulaika diri.Ninga baka nya Helen pan meratika aja Ethan pansut ari rumah iya.Baka selama,  ari suba-suba iya semina ulih meratika Ethan aja.Ethan endang semak belama tang mih bangat enda alah dijapai iya.

Enda tentu lama iga ayan baru ga  Ethan mantaika gamal lelese ba mua pintu.Helen terus senyum udah nya laban nemu nama kebuah Ethan nya nikal baru.

"Aram mih aku nganjung nuan ngambi kerita dulu,"ku Helen.

Datai ba depan bar ti endur Ethan parking  kemari, nyu tegepang ati Ethan meda Lahung sigi udah nganti ba tisi kerita iya dia.Reredu gamal Lahung.

"Thanks..."ku Ethan madahka Helen.

Udh nya beguai Ethan  pansut ari kerita.Helen pan nyau ga mupuk mulaika diri.

"Dini endur nuan malam tadi?"Besai munyi sura nyawa Lahung betanya.

"Ba rumah Helen,"ku saut Ethan beterus terang.

Lahung pan terus gerinsa ninga saut Ethan.Ethan lalu nukangka pintu kerita iya.Terus nyau iya tama iya ke dalam sebedau Lahung majak mayuh utai ditanya.Lahung nitih tama lalu ngempaska pintu kerita.

"Enti aku enda tetemu ke kerita nuan ditu, lanjur enda nemu mih aku kini penunga nuan malam  tadi,"ku Lahung.

"Nuan bisi ninga utai ku aku tadi?"ku Lahung bejaku 
baru.Angat amat asai ati meda Ethan lalu enda nyaut.

"Bisi,"saut Ethan seleka sambil lalu mupuk deriba.

"Ya nama gaga nuan tinduk ba rumah 'secretary'
nuan nya? Tinduk enggau aku ngaga diri enggai, tinduk  enggau indu bukai ka ga!" ku Lahung bejaku laban agi  empai puas ati.

"Dini nuan ka breakfast?"ku Ethan betanya.Enda iya
ibuhka utai ditanya Lahung.

"Isskk….anang guai ngelimpangka randau,"ku Lahung.

Ethan enda peduli.Udah nya iya nyangkaika kerita ba depan siti kedai makai.Pansut Ethan ari kereta, tang Lahung enda nitihka iya pansut.Meda Lahung enda ati pansut Ethan pan lalu nyenguk ke dalam kerita.

"Aku ka gawa pukul 8:00 legi, enti nuan enggai breakfast nganti dalam tu aja mih nuan,"ku Ethan.

Lalu nyau Ethan nudukka diri ba kedai.Enggai enda pan pansut ga Lahung nitihka Ethan.Maya seduai iya Ethan betunga ngirup kekutap baru ga Lahung.

"Kemaya nuan ka cuti gawai?"ku Lahung betanya.

"Sehari tu last aku gawa, udah tu cuti meh,"ku Ethan
nyaut.Tang iya bejaku enda merening mua Lahung.

"Nama hal nuan bejaku enda merening aku?"

Ethan nguji enda kiruh taja ati iya ti ka ngeransi  ari kemari nya nyau enda tentu ulih ditagang agi kebendar ya dia, nya mih siti ari kebuah iya bejaku enggai merening Lahung.

"Nuan amai empai betunang ?"ku Ethan betanya.Nyu enda alah ditat agi.

"Aku sigi amat kala betunang tang  udah lama putus,"ku Lahung nyaut.

"Amat enda ngemulaka aku nuan?"

"Amattt…enti enda pechaya pulai ke menua aku nuan  gawai tu lalu ngambi aku ke bini nuan,"ku Lahung sambil senyum.

"Nama nuan enda kala madah diri udah betunang suba dih?"

"Enda penting nya, utai udah lepas.Enggau aku pulai ke menua aja nuan.Lantang ati aku enti tua udah jadi,"kenu ku Lahung.

Ethan pan lalu senyum udah nya, berasai nyamai ati iya ninga Lahung udah beterus terang.

"Pagila mih tua seretai pulai ke menua,"ku Ethan.

"Amai??"Tanya Lahung, asaika enda pecaya iya dia.

"Amai...laban aku sigi amat sayauka nuan siku,"kenu ku Ethan.

"Terus betemu enggau apai indai aku nuan au..."kenu ku Lahung ngansak Ethan ,laban ati iya nyu makin enda sabar ka nyadi bini sah Ethan.

Ethan terus nagunka pala lalu senyum, iya pan sigi udah mikirka deka nanyaka Lahung maya pulai peremisi gawai tu ila.Nyamai ga enti udah diambika bini sekali kenu ku pikir iya.

Bai ati ti udah gaga nyau betundi begagai enggau pangan diri mih seduai iya Lahung dia.Tang seduai enda nemu diri bisi diperatika sepasang mata ari jauh.

Sepenembu ngirup, Ethan lalu nganjung Lahung pulai ke util.Udah nya Ethan empu lalu pulai ke rumah ga.
Datai di rumah diambat Sulan enggau mua reredu  ga tudah Ethan.

"Kini penunga nuan demalam? Nama gaga enda pulai ke rumah?"ku Sulan betanya.

Ethan enda nyaut laban ti ka  berumban beradu nurun gawa.Lanjur tama Ethan ke dalam bilik mandi.Di luar pintu nya Sulan nempap pintu bilik mandi ngasak amat.

"Enti nuan bangat enggai ke aku, giga mih indu ke manah gi ari aku.Nya nama tuju nuan begila enggau tunang orang?"ku Sulan rerauh ari luar bilik mandi.

Dipusinka Ethan pala paip, nyu balat agi munyi panchur ai, kebuah pia ngambika munyi sura nyawa Sulan enda didinga iya agi.

"Endu, lakka aja Ethan nya,"kenu ku indai Ethan.

"Indai, keni ka ngelakka Ethan nya begila enggau tunang  orang?"

"Ila aku ngajar iya ga Endu enti nyema iya amat begila tunang orang,"kenu ku indai Ethan.

Sulan terus bedemuh ninga jaku saut indai Ethan.

Di Posim Petroleum.

"Selamat pagi bos,"ku Helen nyapa lalu senyum.

"Pagi,"saut Ethan seleka.

Dah nyaut Helen  nyau Ethan tama ke bilik opis iya empu.Maya udah ngenudukka diri mata iya lalu merening ngagai bungai rose becuhura urin ke ba atas mija gawa.

Bungai dijengkau lalu disium sampai nyau enda berasai iya mejamka mata  nyium bau bungai nya ti kelalu ngelantangka ati.Tekala nya lenyau magang semua utai ti ngenusutka  runding  ba pala.Benung Ethan rindang ensium bungai nya, tama ga Helen kia.

"Bos, bisi orang ka betemu enggau nuan,"ku Helen.

"Asuh tama mih."

Pansut Helen, udah nya lalu tama siku lelaki enda dikelala.

"Duduk,"ku Ethan ngelaluka penatai lelaki nya.

"Aku tu Richard bekas tunang Lahung."

"Ouhh..."Saut Ethan.

Bisi tekenyit asai ati Ethan tang iya enggai berupai.Enda disadang sekali bekas tunang Lahung datai kia betemu enggau iya.

"Aku bisi utai ka dipesan ngagai nuan, aku minta nuan  nyaga Lahung memanah.Ngibun iya memanah...iya sigi  selalu berulah tang aku arapka nuan ulih sabar enggau perangai iya,"ku Richard.

Berupai sinu  gamal iya maya bejaku.Iya ga endang amai sayauka Lahung ngelama tu.

"Hermm...anang irau,"ku Ethan nyaut.

"Keterubah suba enggai mih aku di bai iya putus, tang 7 bulan pengudah nya aku meda iya begulai enggau nuan, ba mata aku nuan tu lelaki ti chukup manah.Nyu enda nesal ga ati aku ka ngelepaska Lahung ngagai  nuan."

"Nama ku nuan tadi? 7 bulan? Pengelama seduai udah putus ya nya 7 bulan?" ku Ethan betanya.

"Au," saut Richard seleka.

Ethan ngeraup mua enggau kedua iti tapak jari.Ati iya berasai angat amat dia.Penyabar iya nyau udah nadai agi.Pengudah Richard pansut ari opis nya, Ethan pan lalu ngemai Lahung betemu.

Datai Ethan ba depan hotel My Inn, iya lalu betalipun ngagai Lahung.Lahung laban ti gaga meda penatai Ethan iya pan lalu ngasuh Ethan tama ke bilik  hotel nya. Ethan nadai nganti-nganti.Lalu nyau mih iya tama ke hotel.

Tama  ke bilik Lahung, tubuh Lahung lalu ditulak Ethan ke dinding.Lahung nyau tekenyit serta keketap kesal ati iya digaga Ethan baka nya.

"Ulih nuan beterus terang? Berapa lama nuan udah
putus  tunang?"ku Ethan betanya sambil jari ya dua iti  megai kedua iti tandan bahu Lahung.

"Setaun,"ku Lahung nyaut.

Dilekaka Ethan tandan bahu lahu, digenggam iya buku jari lalu mukut dinding di tisi mua Lahung dia.Nyau merentum munyi dinding, bedarah lalu berasai bepedi buku jari iya nya tadi.Nguing iya ke tisi enda berasai nyu nitik ai mata lelaki iya.

Lahung enda tepansutka jaku seleka pengudah iya meda ulah Ethan baka nya.Di dalam ati iya lalu meragam Ethan sigi udah nemu diri dikemulaka iya.

Ethan nudukka diri ba katil, tapak jari iya dua iti mampul mua.Ai mata lelaki iya enda alah ditagang agi nyu majak laju naya.Lahung lalu duduk besugang nunga  Ethan, betis Ethan diberap iya rat.

"Ampunka aku laban enda madah tumu, ampunka aku laban aku enda madahka utai ti amat ngelama tu,"ku Lahung.

Ethan enda nyaut.Tapak jari agi mengkang mampul mua, pala  mega ditunduk ka iya.

"Ethan..ampunka aku.Pengudah tua betemu lebuh nya aku lalu nemu diri sigi amai keran ke nuan, tang sayau aku udah betunang maya nya.Taja pia pengerindu aku ngagai nuan sigi amat tuchi  datai ari ati aku.Nya kebuah aku putus enggau tunang aku,"ku Lahung.

Diatu Lahung ga nyu sesedan nyabak.Ethan lalu empai bejaku seleka.

"Ethan ninga nuan, ampunka aku...udah tu ila tua pulai ke menua lalu jadi melaki bini,"ku Lahung nguji  ngumbuk Ethan.

Pengudah ninga jaku Lahung munyi nya , Ethan pan lalu ngangkatka pala iya, tapak jari iya  dua iti diengkah ba tandan bahu Lahung ti benung duduk besugang nunga iya.

Lahung meda mata Ethan balat mirah nandaka ai mata iya udah mayuh naya.Lahung nyu puntan penemu, iya nemu ati Ethan benung balat telih dia.

"Lahung, aku enda ulih nerima nuan udah ngemulaka  aku."

"Ethan, aku dah beterus terang ngagai nuan tadi."

"Udah laun, sepatut ya suba  nuan beterus terang."

Ethan lalu angkat ari katil.Iya bejalai ngelawa jenila hotel.Merening utai ke luar, perening puang aja.

"Ethan, nama utai ka gaga nuan diatu deh? Nuan ka
ninggalka aku?"ku Lahung bejaku sambil sesedan.
Majak beterunjui ai mata iya dia.

"Naka tu aja mih kaul tua,"ku Ethan.Iya lalu nyingkangka kaki pansut ari bilik nya.

"Ethan!!!!"

Nyerauh Lahung ngangauka Ethan ti udah pansut ari bilik.Tang Ethan enda kiruhka iya agi.

Ethan mupuk pulai ke opis baru.Maya mansa mija Helen, Helen lalu sempat meratika mua Ethan.Taja enda betunga semak tang  iya ulih meda mata Ethan ti benung mirah,  Ethan mega nadai senyum maya mansa iya.

Helen pan diau aja enda berani ka nyapa Ethan baka selama.Tama Ethan ke bilik opis, kain langsir ba cheremin ti nyadika dinding seduai iya Helen dia lalu ditarit iya  nutup abis semua dinding nya.

Helen ti ba luar nya nyu tebelenga.Enda kala kain langsir nya nutup dinding cheremin nya ngelama tu.Nyu sepemanjai hari nya mih Helen enda berani tama ke bilik opis Ethan taja pan mayuh pail ti patut dianjung ka ngulihka sign Ethan.

Lemai nya sebedau pulai gawa Helen sempat ningalka sekeping  keretas mit  lalu dilekatka iya ba pintu opis Ethan.Ba keretas nya betulis...

"Selamat Hari Gawai "

Maya Ethan ka pansut ari opis lemai nya mata iya lalu tepedaka sekepin keretas  ti dilekatka Helen ba pintu.Keretas nya lalu diambi Ethan.Pengudah dibacha, keretas pan lalu ditepu iya ke dalam briefcase.

Di dalam kerita maya pejalai pulai ke rumah, runding Ethan  berasai tusut.Ati ti benung telih nyau majak bedarah.

Lapa mih aku enda kala mujur maya nanggam pengerindu? Ku iya betanya di dalam ati.Iya pan mutus ati enggai muka pintu ati iya agi.Enggai dikeduan agi. Pedal minyak kerita diindik penapat , nadai ditagang kaki iya ngindik nya.Utai dipeda pan nyau kerabur, makin lama makin kerabur.Mata Ethan pan lalu dipejamka iya sekali.

Seminggu pengudah nya..

Ethan menchelakka mata, dah nemu diri gegaring ba bilik wad iya lalu nemu endur diri benung ba sepital. Malik Ethan ke tisi lalu tepedaka Sulan benung tinduk ningkap ba katil ti endur iya gegaring diatu.