Enda engkesap mata Ethan merening Sulan.Di dalam ati enggai pechayaka utai ti dipeda mata, asaika bula.Iya ngarapka nya semina mimpi.Iya mega ngarapka indu nya ukai Sulan sulu ati ti dikesayau.

Buk Sulan nyu udah diluruska nadai begeretang agi.Nadai bekenaka cheremin mata agi mih iya nyu ngena contact lens.Sulan mega nyu enda gemu agi,pemanah tubuh nyu baka paras gitar.

"Tan..!! Aram arr.. nama gaga nuan dedegi dia?"
Ku Agus ngangauka Ethan.

Ethan lalu nguingka tubuh iya melakangka Sulan.
Sulan ditinggalka iya dedegi pia aja.Ethan enda nemu nama utai ti diasai ati iya diatu.Iya majak ngarapka utai dipeda mata iya nya tadi semina mimpi.

Ukai nya Sulan dih! Kenu ku Ethan bejaku di dalam ati.Dikena ngelantangka ati iya empu.Pemulai
ari waterfront lemai nya Ethan balat tegenung di dalam bilik.Agus kaling ti sama dorm enggau iya nyau alit ati meda ulah Ethan tak diau diri ari tadi.

"Nama nuan baka ke tusah ati Tan?" ku Agus
betanya.

"Lelak bejalai tadi,nadai aku tusah ati ah!"Ethan
nyaut jaku tanya Agus lalu mansal diri senyum.

Pemuas ti dedugau tegenung, Ethan ngulihka tallipun ba kuchik tancut.Talipun ditela iya lama-lama.5 minit pia iya ngenung meratika talipun enggau runding ti puang.Udah nya talipun ditejuka pia aja ba atas mija belajar.Ethan pansut ari bilik ka bebasuka gari lalu mandi.

Malam nya Ethan enda tentu ulih fokus iga ngaga assignment.Runding iya majak ngingatka utai ti nyadi di waterfront tadi.Talipun ti diengkah ba atas mija seruran dijeling iya belama laban nganti talipun nya bemunyi.Nganti call,nganti SMS ari Sulan!

Tang malam tu talipun iya tak nadai bemunyi lalu. Enda baka malam-malam ke udah.Ukai nya bisi orang bukai ke selalu ngiga Ethan ari talipun.
Semina india iya enggau Sulan aja ke suah betalipun selama tu.

Ethan enggai betalipun tauka nganjung SMS ngagai Sulan dulu.Laban ati iya takut…iya mega nangi serta irauka diri nganu Sulan,iya kelalu nangika diri enda tetagangka ati ti ka ngeransi enti nyema indu ti betemu enggau iya tadi nya endang amai Sulan.

Ethan semina deka nganti Sulan empu berterus terang enggau iya.Ethan mutus ati ka nganti aja. Nganti Sulan betalipun sereta nganjung SMS.Iya tetap besabar taja di dalam ati dia nyu nadai temu tunga agi asai.

Nyu datai ke tengah malam pan talipun Ethan agi sunyi.Gali iya ba tilam ka nindukka diri,bekalih kiba kanan enggai ga mata dibai lelap.Nyu bejam-jam iya ti baka nya.Ensepi mata kelalu enggai tinduk,
iya pan angkat ari katil peninduk lalu bejalai ngelawa mija belajar.

Ethan muka laptop iya lalu belabuh ngaga assignment.Fokus!! Fokus!! Fokus!! Ethan meransang ati diri.

??

Kringggggg!! Alarm jam bemunyi…

Ethan ngenchelakka mata meda diri tinduk ningkap ba mija belajar. Peda iya jam udah nunjukka pukul 8:00 pagi.Kaling iya Agus agi benung jenak tinduk bekuruh.Ethan ngangkatka diri ari bangku,jari lalu nyingkau kain tula mandi bechurak urin ti dilempai di tisi dinding.Nyau iya pansut ke luar lalu mandi.

Tembu mandi, tama ke bilik meda Agus agi ga bekuruh.

"Agus! Dani arr..laun udah jam,"ku Ethan ngerak
Agus.

"Legi mih 5 minit da,"ku saut Agus laban mata agi
ka tinduk.

"Apuuu....pukul 9 kuliah kitai legi,diatu udah pukul
8 lebih,"kenu ku Ethan.

Ninga Ethan nyebut jam pukul 8 lebih nya baru Agus sedanah angkat ka pansut mandi.Ethan ti di dalam bilik lalu begari,tang buk iya enda disugu.
Tembu begari jam Casio dirasukka ba gelang jari.

Iya ngaga ai milo ke diirup seduai iya Agus pagi nya.Mansau ai angat, ai milo lalu diluai.Ruti penat dibantaika pansut ari seperung.Nya aja mih 'menu breakfast' seduai iya Agus ninting pagi.

Di sekula nya,sida enda ulih bepandukka utai mayuh macham laban enda dikemendarka bebaika keresa dapur memayuh di dalam bilik.Seduai iya Agus semina bisi kitil karan,
enggau periuk asi karan aja.Periuk asi karan 'serbaguna'.Dikena manduk asi lalu manduk lauk.Nya pan nyadi mih asal mih makai.

Tang kesuah agi maggie mi nya mih ti dipanduk ngena periuk asi.Ethan udah teleba makai mi aja laban semampai suntuk belanja.Di dalam bilik dorm nya semina Agus enggau Ethan aja begulai sebilik.Nasit iya mih bulih kaling ti manah baka. Agus.

Datai Agus mandi,pengudah iya tembu begari seduai ya Ethan lalu ngirup seretai.Maya ti ngirup nadai tentu bejaku mih Ethan pagi nya.

"Lapa nuan tak diau endar ari kemari?"ku Agus
betanya.Alit ati iya meda ulah Ethan tak nyelaie ari
malam tadi.

"Assignment mayuh endar empai tembu,"ku Ethan
nyaut.

Sigi baka Ethan mih nya nadai tentu ka bekunsi enggau orang pasal utai di dalam ati iya.Iya sigi enda mudah enggau orang betusika jerita ati.Biar mih disimpan kediri.

Tembu ngirup seduai iya Agus lalu ka mupuk nurun kuliah.Ethan nyengkau talipun ti diengkah ba atas mija belajar.Talipun lalu empai ditegu ari malam tadi pengudah ti lelap.Ya ga talipun tak lalu nadai bemunyi.

Ethan nela skrin talipun meda bisi dua iti SMS datai.Tunjuk jari iya lalu berumban ka muka SMS. SMS 1 ari celcom,SMS ke dua ari pengajar iya.

Nadai SMS ari Sulan.Nadai missed call ari Sulan.

Arrhhh!! Nama kebuah Sulan ngaga aku baka tu?