Pengudah meda Lahung pansut ari kerita tadi nemu mih Helen sapa indu ti benung enggau Ethan besulu diatu.Ethan lalu empai ga pansut ari kerita.Helen baka ti nemu Ethan serba salah.Ketegal ti enggai ngasuh Ethan enda nyamai asai, Helen pan ka ngangkatka diri ninggalka kedai nya.

"Lina, aram mupuk tua,"kenu ku Helen madahka kaban ti enggau iya breakfast dia.

"Ehh…lalu empai datai utai dempa ke udar tua tadi.Lapa ga berumban ka mupuk?" kenu ku Lina.Berasai alit ati ga tudah.

"Enggai nyadi nganti agi, ya ga aku bisi pengawa ka diadu ba opis legi. Mesti tembu pagi tu pengawa aku nya,"kenu ku Helen ngaga kedalih.

Ninga Helen nyebut pasal pengawa ba opis terus setuju ga Lina dibai iya pulai.Pengudah ti meda Helen angkat nya baru Ethan mansutka diri ari kerita.

Lina enggau Helen lalu bejalai ngelawa endur kerita Lina parking.Tang Helen enda terus enggau tama ke dalam kerita.

"Lina, nuan nganti aku dalam kereta dulu.Aku ka ngelawa kedai bungai ba depan nyin enda lama,"ku Helen madahka Lina ke udah tama dalam kerita.

Datai ba kedai ti nyual bungai fresh, Helen pan lalu tama ke dalam kedai nya.

Maya ba dalam kedai iya terus  bejalai ngelawa bungai ros becura urin.Dipegai iya setangkai  lalu disium, dilekaka baru ga udah nya nyingkau kebukai ga.Iya ka ngiga bau ke agi fresh amat.Sigi baka nya belama ulah Helen tetiap kali iya milih bungai ti ka diengkah ba dalam bilik opis Ethan.Benung Helen rindang milih bungai…

"Helen!" ku sura nyawai datai nyapa.

Helen terus nguing malik ngagai penatai sura nyawa nya.Berasai tegepang ati iya meda Ethan dah bediri ba belakang iya dia.

"Ethan?" Enda pechaya asai ba ati Helen meda Ethan nitihka iya kia.

"Helen, aku minta ampun laban enda ulih ngambi nuan tadi,"kenu ku Ethan.

Berasai besalah amat iya ngagai Helen diatu.Enda ngadang sekali iya nyau betemu enggau Helen ba kedai makai din tadi.Nya mih kebuah iya lalu nitihka pejalai Helen.

"Ermm…enda ngawa.Faham aku,"kenu ku Helen.

"Helen, amat enda nganu aku nuan?"ku Ethan betanya.

Bisi irau ga asai ati iya dia.Nangika Helen ringat.Laban ngenangka kedalih ti dipadahka iya ngagai Helen tadi sigi enda tentu ulih diterima akal.Iya nyu ngasaika diri baka ti beambi ulih ba pemanah Helen.

"Enda arr…nama gaga aku ka nganu?"ku Helen sambil lalu mantaika tuchum di mulut.

Ethan lelese aja.Agi enda lantang asai ati iya dia.Mata iya mega nyau merening ngagai jari Helen ke benung migai bungai ros bechura urin.

"Nuan empu meli bungai kitu ngelama tu pia?"ku Ethan betanya.Tekalanya mih ati Ethan nyu makin berasai bersalah.

"Au…ba kedai tu ditu mayuh bungai fresh, ya ga murah,"kenu ku Helen bejaku seretai enggau tuchum di mulut.

Ethan pan  tuchum ninga saut Helen.Iya lalu nyingkau sepating bungai ros bechura mirah.Bungai ti bechura urin ba jari Helen mega lalu diambi iya.Dah nya, nyau Ethan ngemai bungai ke kaunter deka bebayar.

"Ehh, aku mayar ya,"kenu ku Helen nagang Ethan ti ka bebayar.

Ethan enda ibuhka jaku Helen.Pengudah mayar bungai, iya lalu nyuaka Helen bungai rose bechura urin enggau mirah tadi.

"Ke bechura mirah tu diberi aku ke nuan, terus engkah ba mija nuan legi,"ku Ethan tuchum.

Helen bebengap sebedau ti nyambut bungai ari jari Ethan.Asaika benung bemimpi iya dia diatu.Tang pengudah bungai disambut iya, Ethan pan lalu pansut ari kedai ninggalka Helen tetegi kediri.
Helen diau enda bemunyi maya Ethan dah lesap ari perening mata.Ethan mih orang ti keterubah meri iya bungai.Helen ngukir tuchum baru, ati pan makin bebungai gaga.Tang lebuh ingatka Lahung, mua Helen ti senyum tadi lalu bebali tekala nya mantaika gamal sinu.Arrhhh…ati Ethan dah bisi orang ngempu!

??
Pukul 9:00 pagi ba airport Bintulu.

"Ethan, enda betah nuan aku ila,"kenu ku Lahung.

Seduai iya Ethan duduk berimbai ba bangku airport.Lahung empai tama ke departure hall laban agi ka berandau enggau Ethan.

"Enti nuan enda betah pindah kitu sekali ga nuan.Gawa ditu aja,"kenu ku Ethan meri buah penemu.

Lahung bedemuh ninga saut Ethan.Ukai saut munyi nya ti ka didinga pending iya nya tadi.Bai ati geram Lahung pan lalu nyium kuyu Ethan, Ethan nyu tebelenga disium iya ngenyit.Udah nya Lahung ga nyurungka kuyu ngagai Ethan baka ti bisi utai dipinta.

"Nehh, ni engku deh?" ku Lahung.

Ethan tuchum meda ulah Lahung.Kening Lahung lalu di sium iya begadai, penuh pengasih enggau penyayau di dalam ati.
Enda lama udah nya nyau seduai iya bejalai ka ngelawa endur check in.Maya ti benung seretai nyingkang kin…

"Ethan? Lahung?"ku munyi sura nyawa orang nyapa.

Seduai iya pan lalu bela seretai malik ngagai penatai sura nyawa.

"Ehh…Roy?"ku Lahung.

Ethan bebengap aja laban iya enda ngelala orang nya.

"So…ermm seduai?" Roy alit ati meda Lahung mayuk lengan Ethan.

"Au…."Jampat Lahung nyaut.

Ethan agi mengkang bebengap.Nama utai ti dikejakuka orang nya enggau Lahung pan iya enda tentu meretika endar.

"Ohh…enti seduai kawin ila anang enda madah," ku Roy.

“Okeyy…” ku Lahung nyaut enggau ati gaga.

Pengudah Lahung nyaut  lalu nyau ga Roy neruska pejalai iya empu.

"Bah alai tama kin nuan, nyaga diri memanah nuan din,"kenu ku Ethan mekat Lahung.

"Au...sayauka nuan,"ku Lahung.Iya mupuk nyingkang ninggalka Ethan sambil lalu ngepaika jari. Lahung mega sempat meri flying kiss ngagai Ethan.

Di opis Ethan..

Maya Ethan deka tama ke bilik opis iya bisi tepedaka Helen benung berandau enggau siku lelaki.Ethan enda ibuhka sapa orang ti enggau Helen berandau dia.Lalu ka ditukangka Ethan pintu bilik opis iya empu.Tekala nya mega orang ti berandau enggau Helen nya tadi malik ngagai Ethan lebuh ti ninga munyi pintu ditelengaka Ethan.
Mata seduai iya Ethan terus besabung perening.

"Aiiee, ditu nuan gawa pia Ethan?" ku lelaki nya.

Udah nya iya pan lalu nyeling Helen.Helen beguai nyubit lelaki nya enda ngasuh iya berandau enggau Ethan.Tang lelaki nya enda meretika kebuah Helen nyubit iya.

"Nuan ke ba airport tadi?" ku Ethan betanya.

"Au arr... aku mih betemu enggau seduai Lahung tadi,” kenu ku Roy.

"Ouhh…"ku Ethan.

Udah nya iya enda kiruh agi.Lalu tama ke dalam bilik opis iya empu.Nadai pengingin ati iya deka ngelala lelaki nya.Pengudah Ethan tama ke bilik opis, Roy seduai Helen pan berandau baru.

"Len, nuan lalu nadai kala madahka Ethan pasal bup ti diberi nuan ke iya suba?" ku Roy betanya.

"Eihh lakka aja mih iya terus enda nemu,"ku Helen nyaut.

"Apuuu…lapa ga pia dih? Eh…tadi aku bisi betemu enggau seduai iya Lahung ba airport aaa.Benung besulu seduai iya nya," ku Roy ga.

"Nemu aku,"ku Helen.

"Nemu ga nuan pia? Eehhh…ulih ga nuan ngetatka diri baka tu ari suba-suba, ya ga nyau gawa begulai ditu akaiii daii,"kenu ku Roy muchau.

Kasih iya meda Helen…laban iya nemu Helen lama udah naruh pengerindu ngagai Ethan.

"Eeeee…nibuh kiruhka hal nya agi nuan, alai pulai nuan mayuh pengawa aku tu,"kenu ku Helen.

Roy enchebirka mulut sebedau ninggalka Helen.Agi belala berandau nyau diburu Helen ga.

??
Di rumah Lahung ba Kuala Lumpur.

Datai ba rumah Lahung lalu ngalika diri.Berasai lelak tubuh iya dia.Baru ka nyamai belelak talipun iya didinga bemunyi nandaka bisi SMS datai.

Dave   ? Lahung sayang… udah pulai ari Bintulu nuan?

SMS nya semina dibacha Lahung aja tang enda dibalas.Enda lama udah nya bisi ga SMS datai baru.

Edwin ? Haaiii…Lahung I Miss You.

Pengudah macha SMS nya abis, SMS lalu dipadamka Lahung magang.Buruk iya ka ngelayan sida nya.Enda berasai pemuas ti gegaring, Lahung pan lanjur lelap.

Dani baru iya meda hari nyau udah bekalih lemai.Lahung angkat lalu ka pansut ari bilik peninduk.Empai sempat iya pansut nyau tama ga siku lelaki ke dalam bilik nya.

"Lama nuan dah dani? Dah manduk lauk dah berapi aku dia.Enti nuan lapar aku berenah makai ke tua diatu,”ku lelaki nya bejaku.

"Kemaya nuan datai?” ku Lahung ga betanya.

"Maya nuan benung tinduk tadi, nama nuan pulai kitu enda madahka aku tumu?"ku lelaki nya betanya baru.

Lahung enda nyaut.Iya lalu ngalika diri ke tilam baru.Lelaki nya pan nitihka iya.Tubuh Lahung lalu diberap lelaki nya.Gari Lahung dibuka iya sampai abis lengis.Di dalam bilik peninduk ti sunyi nya diatu semina sura nyawa Lahung aja didinga merengik.Luba besai luba enda ga munyi sura iya.Lahung ngetat aja...ngetatka penyamai dikayam tunang iya empu.Tembu bekayam seduai iya sama  bela lelap.

Lahung tedani ensepi perut berasai lapar.Perening iya Richard disepiak benung tinduk jenak sampai nyu bekuruh.Mayuh utai di dalam runding Lahung maya iya meratika Richard.Panjai sintak seput ditarit Lahung.Udah nya nyau iya pansut keluar, talipun binching ti diengkah ba tisi mija peninduk pan lalu di bai iya.

Datai di dapur, Lahung nyalinka susu dutch lady ke dalam gelas.Irup iya belubah.Duduk iya tegenung di dapur sambil nunga mija makai.Laban penangkup lauk ti dikena Richard nudung lauk nya dia transparent nyu dipeda Lahung magang  lauk ti dipanduk Richard tadi.Perut iya endang amai lapar tang nyawa enggai makai.Ati majak lelengauka Ethan.Pansut Lahung ke luar rumah lalu betalipun ngagai Ethan.

Lahung ?? Nama gaga nuan diatu?

Ethan    ?? Tinduk aku .

Tilik Lahung jam ba kuan jari udah nunjukka pukul 11:00 malam.Nyu berasai ngachau Ethan ga iya dia.Tang ati ti lelengau ni ngira nya.

Lahung ?? Lelengau amai aku ditu ke nuan.

Ethan    ?? Aku lelengau mih...ba pindah kitu nuan ila.Badu diau ba KL din.

Lahung tuchum semadi ninga Ethan nyuruh iya pindah.Lahung lalu beguai nukar buah randau.Nyau majak panjai mih randau seduai iya Ethan dikena mantupka pengelengau ati ngagai pangan diri.

Tembu berandau enggau Ethan lama Lahung duduk tegenung ba luar rumah.Di dalam ati iya mikirka baka ni jalai deka muai Richard.Ati iya nyau makin belabuh rindu ka Ethan, nyu enda alah ditipu agi.Ethan lain ari lelaki bukai ti kala dikelala iya.Ati iya majak sesengit deka ngempu Ethan…tang mih ketegal iya udah betunang enggau Richard, dia dih iya nyu puntan penemu.Seduai iya Richard pan baru 3 bulan betunang.

“Aaaarrrhhh nama mih laun amai aku betemu enggau Ethan baru?" kenu ku Lahung bejaku kediri.

Seminggu pengudah nya…
Di menua Bintulu.

Ethan ngambi Helen ke rumah laban malam nya company sida bisi dinner begulai enggau bala staff.Maya Ethan nganti Helen di luar rumah, dia dih apai Helen lalu datai ngelawa iya kia.Ethan ti meda apai Helen ngelawa iya lalu beguai nurunka cheremin kerita.

"Tama dulu Igat,"kenu ku apai Helen.

Apai Helen nyau teleba meda Ethan laban Ethan ti suah datai kia ketegal ngambi nganjung Helen pulai gawa.

Ethan nitihka peminta apai Helen.Tama Ethan ke rumah, nadai ga Helen dipeda iya.Seduai iya apai Helen pan lalu duduk betunga ba bilik besai.

"Agi di atas din Helen benung beradu,"kenu ku Apai Helen.Laban iya meda Ethan gegining baka ti bisi orang digiga.

Maya ti gegining dia dih Ethan nyu tepedaka gambar ti digantung ba dinding.Enda berasai iya angkat ari bangku lalu bejalai ngelawa gambar nya.

Gambar ti digantung nya gambar Helen ba sekula pom.Gambar maya sida kem ba Lambir taun 2005 suba.

Diperatika Ethan beamai-amai gambar nya.Mata ke sigi udah chipit nyu dichipitka iya gi lebuh nela gamal orang ba dalam gambar. Tang iya lalu enda tetemu ni bagi gambar Helen dia.Nyau berunding iya Helen nya sama sekula enggau iya, tang  nama gaga iya empu lansung enda ngelala Helen?

"Gambar sida Helen maya sekula pom suba nya,"kenu ku Apai Helen.Udah nya apai Helen pan angkat lalu ngambik siti bup album gambar.Bup terus disuaka iya ngagai Ethan.

"Igat, ba ditu mayuh gi gambar Helen,"kenu ku apai Helen.

Ethan nudukka diri baru lalu ngerebakka album gambar nya.Baka tadi mega mata iya lalu enda tetemuka gambar Helen.Nyau pemuas ditanya iya sekali ga apai Helen.

"Ni bagi gambr Helen tu ditu aya?"

Apai Helen angkat duduk ngimbai Ethan lalu ngerasukka cheremin mata.

"Tu Helen."Tunjuk jari apai Helen nunjuk ngagai indu ti begambar ba belakang Ethan.

Udah nya dikerebakka Ethan ga gambar-gambar bukai.Gambar ba dalam album nya semua gambar sida iya maya kem suba magang.Pengudah Helen nya di kelala iya ba gambar nya baru iya sedarka ba tiap gambar sida begulai endur Helen nya begambar endang semampai ba belakang Ethan belama.

Ngingatka nya gambar kem suba Ethan pan lalu ngiga gambar Lahung.Dah iya tetemuka gambar Lahung…nyau seseyum kediri mih iya dia.Lahung sigi bajik ari sesuba  datai  nyentukka diatu kenu ku dalam ati iya muji Lahung.

Bisi 10 minit Ethan ti udah nganti dia dih Helen pan tembu beradu.Nurun ari tangga Helen lalu tuchum meda Ethan benung duduk dedugau enggau apai iya di bilik besai.

"Ethan, aram mupuk,"kenu ku Hellen.

Pengudah ninga sura nyawa Hellen, Ethan pan ngelekaka album gambar nya lalu angkat ari bangku penuduk.Dah angkat ari bangku mata Ethan lalu merening Hellen, enda engkesap mata iya meratika Helen ari atas ke baruh.

Lama Ethan tegenung.Di dalam ati  iya nyau betanya.Nama aku enda kala sedarka pemajik Hellen ngelama tu?

Malam nya Hellen ngena gaun bechura mansau, buk iya disanggul tinggi ngayanka rekung.Mua iya nadai bekenaka sido.Chukup beresi dipeda mata.Kuyu iya perenching pelu-pelu, senyum iya ulih ngasuh ati anyut ke dunya mimpi.

"Ethan?"Helen nyapa Ethan meda iya ke tegenung lama.

"Ouhh…urmm aram,"ku Ethan.

Di dalam kereta, Ethan enda tentu bemunyi. Lain asai ati iya meda Helen malam nya.Tang ingatka diri empu dah bisi Lahung ke sulu ati lalu dibuai iya jejampat asai ba ati ti ka nyeligau maya nya.

Baka selama Helen lalu mutarka lagu 'Destiny’ ba dalam kerita dikena merindang seduai iya.

"Nadai lagu bukai nuan?"ku Ethan betanya.

Beguai Helen nukar ngagai lagu bukai.Peminta Ethan endang sigi diturutka magang.Datai ba endur dinner taja duduk semija tang Ethan enggai berimbai enggau Helen.Pemuas nyau nemu diri dikelarika Ethan ga Helen udah nya.

Perening iya Ethan...nyelaie amai Ethan malam nya peda iya tak enda tentu ka betemu mua enggau iya.Nama penyalah aku? Ku  Helen betanya dalam ati.

Pulai seduai iya dinner pan sama baka maya mansang tadi ga.Ethan enda entu ka bejaku maya di dalam kerita.Pengudah nganjung Helen pulai, Ethan pan mupuk deriba pulai ke rumah iya empu.

Maya dalam pejalai pulai iya nyau nanya ati diri empu.Nama gaga ati aku asai tu? Nama kebuah aku enda ulih betemu mua enggau Helen? Ketegal nama kini?