"Tu aku Endu,nengkani manuk di ujung bilik
ditu,"ku Indai Ethan nyaut kangau Sulan.

Iya pan lalu beguai ka mulaika diri ari ujung bilik.
Bejalai berumban minching tong chat ti nyadika sarang dikena naruh sum manuk.Sulan tuchum meda Indai Ethan udah ayan di mua mata.Lenyau pengirau di dalam ati.Suduai pan bela duduk ba pala tangga lalu berandau.

"Aku ka mai nuan enggau kami sebilik ngalu ke
Kuching pagila Ibo."

"Engka enda ulih enggau kita aku Endu,nadai entu
bisi anak belanja aku maya tu.Lalu empai
ngembuah sawit.Enti udah ngembuah ila nyau
abis dikirum ke Jang mih ke belanja iya din.Ni ke
dikena aku ngaji orang ke ngembuah sawit ga.Kira
ke enda mih aku enggau kita,"ku Indai Ethan nyaut
Sulan seraya ke lalu ngendas peluh ba kening
ngena tapak jari.

"Eehh..anang ngira belanja nuan Ibo ,kami ke mai
nuan kami mih melanja nuan.Beradu aja malam
tu Ibo.Besimpanka gari nuan,3 malam bisi
pengelama kitai din ila.Kira urung pukul 9 pagi
baka nya kitai mupuk pagila,"ku Sulan meri jaku
pemutus.Iya enda pedulika Indai Ethan madahka
diri enggai enggau.

Sida Sulan sebilik sigi lama udah ngaga pelin deka raun bejalai ati diri kedungka Sulan benung pemisi sekula maya tu.Taun tu mega Sulan deka ngambi peresa STPM.

Pagi hari siti sida pan sampal mupuk ke Kuching bekenaka kerita Innova Paran.Paran deriba ke sida,apai Paran duduk di sepiak Paran,Sulan duduk di belakang enggau indai iya serta indai Ethan.Indai Ethan tumu pagi nya lalu betalipun ngagai Ethan madahka diri bisi ngalu ke Kuching.

Dia dih Ethan lalu besedia nganti penatai Indai iya.
Berasai gaga anak ati ngenangka indai iya deka nemuai ke Kuching.Ya ga kena maya ujung minggu ukai nya bisi kuliah.

Taun siti nyu manggai tiga taun Ethan belajar dia,kira taun ke penudi ya meh nya.Iya pan enda sabar deka nembuka diploma.Tang ba anak ati iya udah nanam siti pengingin ati.Iya deka nampung pelajar iya baru ngambi degree dalam 'course' ti sama diambi iya diatu.Tang utai kedeka ati iya nya bedau dipadahka ngagai indai iya.

Nyau mangkung pukul 7:00 malam jam baru sida Indai Ethan datai di Kuching.Sida bemalam di rumah menyadi Apai Paran.Malam nya mega Paran lalu ngambi Ethan di kota Samarahan.

Pengudah Ethan seduai Paran datai,sida pan berengkah makai malam di rumah nya.Sulan ari tadi iya ti nyeling-nyeling Ethan belalai.

Sigat endar Ethan diatu,ya ga nyu burak laban tudah lama enda gawa bepanas ke tanah,tubuh iya nyau tinggi amai serta tegap murihka niang apai iya suba.Nyau udah jauh bebali amat mih pendiau Ethan, tinggal pisin buk iya aja enda entu jauh berubah engka endang sigi rinduka pisin buk baka nya.'Messy spiked hair'! Ku Sulan betelai di dalam ati.Nyu enda berasai mih iya ngukir tuchum di mulut.

Sulan jarang bisi peluang betemu enggau Ethan sepengudah Ethan ti nampung pelajar.Enti maya Ethan pemisi semester sepengelama sebulan, 3 minggu nya sigi dikena iya ngaga pengawa part time di Kuching,pemisi seminggu ke agi tinggal nya baru dikena iya pulai ke menua.Nya pan ukai pemisi iga,nyu besehari-hari iya ngabiska jam gawa di kebun.

Nyentukka abis pemisi seminggu pan Ethan endang jarang diau di rumah.Pemisi maya gawai pan Ethan nadai tentu enggau orang berami.Diau di rumah aja.Maya enda nurun ke kebun nyu bekurung ga iya belajar di dalam bilik.Enti dibandingka Ethan ke berumur 16 taun suba enggau Ethan ke sehari tu,kelalu jauh endar udah bida.Nyema orang lama enda betemu enggau iya sigi enda dikelala orang agi meh tudah.

"Waiii Sulan!" Tandan bahu Sulan dichukir
betunggal iya Sambai.

"Iskk..lapa bechukir-chukir?" ku Sulan ka nganu
Sambai

"Ari tadi aku meda nuan nengkilaka kaling Paran
nya,bisi endar meh utai diining nuan tu,"kenu ku
Sambai nundi Sulan.

Sulan enggai betimbal jaku enggau Sambai.Nyau iya ngebuka diri ke dapur.Di dapur Sulan lalu bebasuka pinggai ba singki.Enti di timbal makin nyadi Sambai nya nundi aku legi.Kenu ku Sulan meragam di dalam ati iya.

Benung Sulan bebasuka pinggai,datai ga Ethan kia nganjung pinggai ke singki.Ninga setap kaki bejalai ke singki tekala nya mih Sulan nguingka mua ke belakang lalu besabung mata enggau Ethan.Ati iya nyau keketap laju baik tekenyit.

Kesal mih ati tudah nyau laju alun seput di dada.Ethan ngengkahka pinggai enggau gelas di singki Udah nya lalu bejalai baru pansut ari dapur.Bersabung mata sekejap enggau Sulan tadi nadai meri reti nama-nama ba Ethan.

??

Pagi hari siti di rumah menyadi apai Paran sida dia nyu begau ke Indai Ethan luput ngenyit.Pansut ari bilik mandi pagi nya iya sebana ke pala balat sebening ba Sulan.Tembu begari iya sempat nudukka diri ba bangku sofa sebedau luput.Paran enggau Ethan lalu beguai ngatung Indai Ethan tama kerita deka beranjung ke sepital.Nasit endar mih malam nya Ethan enggau bemalam dia.Datai di sepital ba 'emergency unit' indai Ethan lalu di bai tama ngagai bilik berubat 'red zone'.

Genap 3 jam pengelama nganti ba 'emergency unit' dia dih indai Ethan ditama ke ngagai 'female ward'.Maya dianjung ke wad Indai Ethan endang udah ngeleda.Datai di wad Ethan lalu duduk ngimbai katil indai iya.Tapak jari indai iya digenggam iya rat. Balat berasai kesal ati tudah Ethan meda indai ya sakit lalu luput baka nya.Seduai iya ukai nya bisi bala bukai,enti nyema indai iya ninggalka iya nyau kediri Ethan aja mih kapa-kapa di dunya injau tu.

"Anang tusah ati Jang,nadai ngawa aku tu,"kenu ku
Indai iya ka ngelantangka ari Ethan mih nya.

Enda berasai bisi neritik seleka dua ai mata Ethan dia.Berumban iya nguing ke tisi ngendas ai mata nangika dipeda indai iya.Bendar iya ngelalaika penusah ati ngenang indai iya ke sigi enda entu bepengerai selama tu.

"Ibo Jilin,"ku indu misi ke datai kia nyebut nama
Indai Ethan.

Ethan seduai indai iya bela malik ngagai indu misi ke nyapa tadi.

"Aku tu indu misi ti nyaga nuan saritu.Nama aku
Seda,nyadi aku ka meri nuan makai ubat tinggi
darah nuan ibo,"ku indu misi Seda.

Indai Ethan lalu nagunka pala ngagai indu misi.Ubat ti disuaka indu misi terus disambut iya.

"Nuan enda tau sekali-kali ninggalka ubat tu
Ibo.Enti bejalai bemalam ba endur bukai ke
jauh ari rumah nuan mesti mai ubat tu,nangika
nuan nyu luput baka pagi tadi baru," ku indu misi
meri jaku pesan.

Pengudah tembu nengkilaka Indai Ethan makai ubat nyau ga indu misi Seda mindah meri ubat ngagai orang ba katil sepiak.

"Indai nama nuan nadai makai ubat lalu kemari?"
ku Ethan nanya indai iya.

"Nadai.Ba ya Jang enda ingat mai ubat aku ari
rumah,besimpanka barang demalam nadai ingat
sekali ka nepu ubat dalam kantung."

Jaku saut indai iya bisi ngasuh ati Ethan geram mimit.Tang iya enggai mayuh jaku.Utai ga udah.
Urung pukul 5 lemai maya jam orang datai ngabas bala ba dalam wad,nyu penuh ngenyit mih wad nya dia.Sulan ari tadi meh iya enda ngetu irau,nyau kekesit asai ati ka betemu enggau indai Ethan.
Tama ke dalam wad iya lalu nyingkang jampat ngelawa katil indai Ethan.

"Kati baka nuan Ibo? Agi bisi sebening pala
nuan?"ku Sulan betanya.Jari Indai Ethan lalu
dijengkau iya.Dipurus iya tapak jari Indai Ethan
enggau penuh penyiru serta pengasih.

"Nadai ngawa aku Endu,udah begi asai pala tu
diatu.Pagila lusa ulih aku pansut dih,"ku iya nyaut
Sulan.

Ethan lalu nyeling indai iya ninga jaku indai iya ke munyi nya.Nemu endar indai bejaku bemanis mulut enggau Sulan.Lutur empu lalu empai bisi meri jaku pemutus kemaya indai ulih pansut ari wad.Ku Ethan muchau di dalam ati.

Apai enggau Indai Sulan pan bisi datai ngabas baka nya mega Paran.Sida bela irau ati.Maya jam ngabas nyau ka abis.Sulan ngemeranika ati deka ngerandau Ethan.Ati ti malu serta rawan dipansal iya aja.Ya ga ari tadi Ethan nadai mansutka jaku seleka maya meda iya.Ukai semina tadi aja nya, selama-lama tu mih Ethan baka nya.Enda kala sekali pan Ethan deka berandau enggau Sulan.

"Ethan ,empai mupuk pulai nuan?" ku Sulan
betanya.Ati lalu enggau keketap kesal mih nya
dia.Balat nangi.Nangika Ethan enda ibuhka iya.

Ethan enda bemunyi.Nadai ati deka nyaut tanya Sulan.Kelalu mayuh utai ngachau runding iya diatu.

"Ethan, kati baka enti aku ngibun indai nuan
malam tu? Nuan pulai ngagai sekula dulu
mih,engka pagila nuan bisi kuliah,"kenu ku Sulan.

Nya baru Ethan ka merening Sulan.Merening ketegal deka nemu pengamat jaku siku nya.Ari tadi Ethan berundingka deka pulai ke sekula tauka enda laban iya enggai ngelakka indai iya kediri ba sepital nadai orang ngibun.

Diatu Sulan nyu madahka diri deka ngibun indai iya.Bisi lantang mimit ati iya ninga jaku Sulan nya,tang nyu berasai ngenusahka Sulan ga Ethan dia.

"Au mih,minta tulung nuan ngibun indai aku dulu malam tu.Pagila lusa nya meda gaya dulu,enggai nyadi gak aku ngenusahka nuan,"kenu ku Ethan.

Lalu tampak bebendang mua Sulan pengudah ninga jaku saut Ethan.Nya mih keterubah Sulan berandau enggau Ethan.Chukup pengaga di dalam ati iya dia.Nibuh berandau panjai besaut jaku seleka dua udah chukup ba Sulan.