Seminggu pengudah nya..

Di KSKB Kuching.

Seminggu Sulan nyu baka orang mawa pendiau.Ati iya sesengit ka betalipun lalu berSMS enggau Ethan.Tang Sulan laban ti ngasaika diri sigi bisi penyalah nya ti ngujungka iya empu enda berani deka ngiga Ethan.Ethan pan nadai ngiga iya pengudahka betemu ba waterfront lebuh nya.

Baka ni mih tu? Lapa ga Ethan enda ngiga aku agi?Lapa iya lalu enda bemunyi? Iya ringat ke aku?

Semua nya jaku tanya ti semampai bemain ba runding Sulan sepemanjai minggu tu tadi.Iya berasai nesalka ulah diri empu.Sebulan ke udah belajar dia iya bekelala enggau siku lelaki ti benama Leo.Leo sama enggau iya belajar di kolej nya tang seduai iya enda sama utai pelajar diambi.

Leo belajar Medical Assistant (derisa).Sulan belajar deka nyadi indu misi.Di kolej nya ukai semina Leo siku aja ti ka nguntik Sulan.Mayuh agi lelaki bukai.Tang mih Sulan semina milih Leo nyadika pemerindang ati ba kolej nya.Nyau berasai temegah ati Sulan laban iya ti enda kala ngasai diri dikerinduka orang laki ngemayuhnya.

Suba nadai siku pan lelaki ka nguntik iya.Laban tudah ke gemu.Pengudah bekelala enggau Leo Sulan nyu anyut ba dunya iya empu.Kelalu rindang.
Dibai Ethan betemu enggai ga iya laban nangika Leo nemu.

Taja pia Sulan enda bangat beabis ati ka ke Leo.Ba ati semina Ethan siku aja ti dikerinduka iya amat.Sigat baka ni pan Leo,jauh sigat agi mih Ethan ari iya.Nambah ga Sulan sigi nemu Ethan nerima semua pengurang iya.Iya gemu Ethan enda kiruh.Nadai nyadika penanggul pendiau iya ti suba ba Ethan.

Diatu Sulan nyu udah alah laban penguji.Iya mega udah ngenelihka ati Ethan.Ulih enda kini Ethan ngampunka iya?

Maya tengah hari nya Sulan ngemeranika diri nganjung SMS ngagai Ethan.Taja pan ati kakang serta rawan tang iya nguji mansal diri.

Sulan ?? Tan,ka nuan betemu enggau aku ba

Taman Sahabat pukul 5 lemai legi?

Aku nganti nuan din pukul 5 legi ok.

Dianjung Sulan SMS nya tadi,udah nya talipun lalu dilekaka pia aja ba atas mija belajar.Iya enggai nemu nama saut SMS ari Ethan.Enda ngira Ethan ka tauka enggai iya enggai nemu.Laban iya udah ngaga pemutus ati sigi tetap deka nganti Ethan ba Taman Sahabat pukul 5 lemai legi.

Sepenembu beradu Sulan pan lalu mupuk bejalai ke pasar Kuching tumu agi begulai enggau bala kaban iya.Laban maya nya ti ujung minggu ulih pansut mih sida.

??

Di UiTM Kota Samarahan.

SMS ti dianjung Sulan dibacha Ethan bekali-kali.
Asaika enda pechaya nerima SMS ari Sulan tengah hari nya.Seminggu-minggu tu iya merampau lelengauka Sulan.Penatai SMS ari Sulan ti mai betemu nya ngasuh ati iya bebungai gaga.Lalu beguai tunjuk jari Ethan ngenyakka keypad talipun malas SMS sulan.

Ethan ?? Ok love..i miss you so muchh.

Pengudah malas SMS nya nyu tegenung ga Ethan. Nama mih enggai enda pukul 5 lemai ga dibai Sulan betemu? Nama kena aku pulai baru legi ti udah ngelebus jam pukul 5? Ukai nya bisi bas pulai kitu agi pengudah pukul 5 lemai.Enti ngena teksi mar amat ga tambang.Duit di dalam kerepai Ethan dia semina tinggal Rm30 ringgit da agi.

Pemuas ti berunding iya lalu ngaga pemutus tetap deka nurun ke Kuching betemu enggau Sulan.
Ethan nurun ngemai duit Rm30 ringgit aja ba kerepai.Urung pukul 3:00 lemai Ethan mupuk beradu deka nurun Kuching ngena bas.Kira pukul 4:00 pia Ethan endang sigi udah datai ba Taman Sahabat,sengaja iya nurun tumu ari ke jam ke didanji.Nambah ga ati balat amai lelengau,enggai iya ngenataika diri laun.Biar mih iya ti nganti Sulan,ukai Sulan nganti iya.

??

Di pasar Kuching.

Sulan agi benung sesegap bejalai enggau bala kaban iya ba Parkson.Udah puas rindang nya baru iya ngingatka diri ti ka betemu enggau Ethan lemai nya.Sulan ngetu bejalai lalu nudukka diri ba bangku ti bisi di depan kedai dia.Jari lalu ka nyengkau talipun di dalam beg sandik.Rerigau jari Sulan ngiga talipun,nadai ga talipun ditemu ba dalam beg.Kebuk iya kuchik tanchut nadai ga talipun dia.Nyu sedanah Sulan begigaka talipun.

Abis keresa di dalam kantung ditunggangka iya ba atas bangku.

"Nama utai giga nuan Sulan?"kenu ku kaban iya
nanya.

"Ehh,talipun aku nadai temu,"ku Sulan nyaut.

"Kada enda tinggal dih??" kenu ku kaban iya.

Nya baru Sulan ingatka talipun iya enda dibai tadi.Pengudah nganjung SMS ngagai Ethan talipun dilekaka iya ba atas mija belajar.Nurun ke pasar nyu enda ingat nyimpan talipun ke dalam beg sandik.

"Sulan?"

Ku sura nyawa orang ngangau ari belakang.Sulan
pan lalu malik.Peda iya Leo benung mansang bejalai ngelawa iya kia.Bala kaban Sulan ti meda penatai Leo lalu nyau ga ngebuka diri ninggalka Sulan.

"Nama nuan enda madah diri bisi ke pasar?"ku Leo
betanya.

Sulan enda nyaut Leo.Jari iya mupuk ngumpul keresa ti ditunggangka ba atas bangku tadi.

"Sulan!! Ninga nuan? Nama gaga nuan baka ti ka
ngelarika diri ari aku seminggu-minggu tu?" ku
Leo bejaku enggau ati geram.

Sulan agi tetap enda kiruhka Leo.Tembu nyimpan
keresa iya, Sulan lalu ka nyau nyingkang ninggalka Leo.Meda ulah Sulan baka nya Leo pan lalu narit lengan Sulan.

"Leo!" ku sura nyawa orang ngangau ari belakang.

"Nyaa nyin mummy aku,aram aku mai nuan
bekelala enggau iya,"kenu ku Leo.

Indai Leo meratika Sulan,Sulan meratika indai Leo ari atas ke baruh ga.Baka pendiau datin kenu ku Sulan bejaku di dalam ati.

"Mamy,tu Sulan,"ku Leo madahka indai iya.

Enda lama udah nya nyu bisi dua iku indu ga datai kia.Nangkan indu dua iku nya tadi bisi siku orang laki tuai.Sida nya bela bejalai ngelawa Sulan enggau Leo.

"Tu daddy aku,dua iku nya aka aku,"kenu ku Leo
madahka Sulan.

Sulan ngukir senyum ngagai sida Leo sebilik tanda bebasa ke sida.Taja pia mulut aja ti senyum tang di dalam pala bendar berunding baka ni ka ngelarika diri ari sida Leo sebilik.

"Aram enggau kami bejalai,lalu makai kitai legi
endu,"kenu ku Indai Leo.

"Enggai nyadi aku enggau kita ibu," kenu ku Sulan.

"Endai,nama nuan munyi nya gai mamy aku?Aram
mih enggau kala mamy dah ngemai,"kenu ku Leo.
Tandan bahu Sulan lalu dipayuk iya ngenyit.

Nyau mih Sulan bejalai lalu makai enggau sida Leo sebilik.Maya makai burit Sulan nyu enggai nyadi duduk jenuh.Ati majak kekesit ngenangka Ethan.
Irau amai iya nangika Ethan udah nganti ba taman.

Peda Sulan jam dinding ba kedai makai nyu udah manggai pukul 8 malam.

"Pulai dulu aku.Udah laun amai jam.Nganu warden
enti kelalu laun pulai legi,"kenu ku Sulan.

"Amat ga nya aram mih kitai mupuk,"ku Apai Leo.

"Ehh,aku pulai kediri aya.Enda aku enggau kita agi,"
kenu ku Sulan.Laban iya ti ka ke taman dulu
nitihka pelin ati.
"Ya lapa baka nya dih endu? Seretai mih kitai.
Kami tu lalu nganjung Leo ga legi,seretai aja mih
seduai.Begi nya sama endur,"kenu ku Apai Leo.

Nyu temati kutu ga Sulan dia.Puntan penemu.Aka Leo tetuchum merening laban ti bisi ati deka ngerandau Sulan.Maya sida ti benung seretai bejalai ngelawa endur parking kerita,dia dih aka Leo bejalai seretai ditisi Sulan.Lebuh makai tadi iya sigi enda tentu bejaku laban nangika Sulan malu dirandau maya makai.

"Sapa nama nuan wai? Aku tu Lydia menyadi tuai
Leo,"ku Lydia madahka pengelala diri.

"Aku Sulan,"ku Sulan nyaut enggau ati semadi.

Lydia senyum ninga saut Sulan pandak aja.Engka Sulan agi malu kenu ku dalam runding iya.Datai di parking kerita Lydia nyuaka Leo kunchi kerita iya.

"Nepan enggau aku ditu seduai.Leo nuan deriba ke
kitai,"kenu ku Lydia.Kunchi kerita Vios aka iya pan
lalu disambut Leo.

Meda dah baka nya sida apai indai enggau menyadi indu Leo ke siku da pan mupuk bejalai ngelawa endur parking kerita Apai Leo.

Tinggal mih Sulan enggau Leo nepan kerita Lydia.
Jam ba dalam kerita udah nunjukka pukul 9 malam.

Ethan benung dalam teksi deka pulai ke Kota Samarahan.Hari bisi ujan memesi.Iya laban ti lama dedugau ba taman ari tadi nyu bisi basah mimit gari kena tinggang titik ujan.Meda jam makin laun Ethan pan mutus ati ka mulaika diri. Enti nyau kelalu laun pulai nyu makin mar tambang teksi ku anak ati iya betelai.Duit ba kerepai ga semina bisi Rm30 ringgit aja.Dikena mayar tambang teksi tu legi lalu abis mih nya.Sulan ti dianti lalu nadai ga datai.SMS enda dibalas,nyu berpuluh kali Ethan betalipun nadai ga disaut.
Datai ba round about Simpang Tiga,dia dih teksi ti dikena Ethan bepansa enggau kerita vios aka Leo.Asaika bula utai dipeda mata Ethan maya nya,cheremin kerita Lydia nya enda ditinted iya chelum endar ba mua ke penuduk depan.Nya mih ti ngujungka Leo seduai Sulan nyengenda amai dipeda Ethan.Tang Ethan agi enggai pechayaka mata iya.Engka salah peda mata ku iya.Ya ga hari benung ujan memesi,bisi kekerabur cheremin teksi nya.

Ngetu ba traffic light Tabuan Jaya teksi dikena Ethan enggau kerita aka Leo berimbai damping bersepiak.Sekali tu endang nyata amat sereta terang lelaki ti deriba nya Leo,lelaki ti nyeging tandan bahu Ethan ba waterfront suba.

Agi seruran terang ba mata iya pegai jari Sulan enggau lelaki nya suba .Indu ti dipeda iya ba sepiak lelaki nya endang amat Sulan.Sulan ke dianti iya ari pukul 4 lemai tadi.Sulan ti bedanji deka betemu enggau iya sehari tu,Sulan ti bedanji deka nganti iya ba taman lemai tu.

Berasai ngaba pengangat ba mua Ethan sepi iya,tubuh iya pan sama berasai berangat magang taja aircond di dalam teksi nya full blast,taja hari di luar benung ujan memesi.Penyelap endang nadai diasaika Ethan sekali dia.

Berasai dikeduan,berasai enda diguna …nyau makin telih bepedi asai ba ati ...enda berasai nyu labuh ai mata lelaki iya.