Hari siti Ethan minta pemendar deka pemisi enda datai ke kuliah ari pengajar iya.Taja dikemendar pemisi enda lama,iya enda tau tinggal pelajar sepengelama ke pemisi nya.Semua utai ti dipelajar ba dewan kuliah maya iya enda datai nya meseti diulang kaji magang ila.Baka nya mega enggau 'assignment' ti diberi endang meseti digaga.

Malam hari ke dua ba sepital Sulan tetap agi deka ngibun Indai Ethan.

"Lapa nuan enda pulai dih? Malam tu aku aja mih
ngibun indaiku.Enggai aku ngenusahka nuan
agi,"ku Ethan.

"Nadai ngawa nya Tan,aku empu volunteer enda
aku minta bayar dih," ku Sulan nimbal Ethan
enggau senyum di mulut.

"Hemm ni ku penyamai nuan mih.Udah makai
nuan tadi dih?" ku Ethan betanya.

"Bisi ga aku makai mimit utai ditapau sida
Indai,tang enti nuan ka mai aku makai baru tau
ga,"ku Sulan nyaut seretai enggau senyum
lelinsum.

Enti besebutka pengawa makai sigi nadai nemu deka nulak tudah Sulan.

"Aram mih ngagai kedai Hospimart di baruh din
tua ngiga utai empa," ku Ethan.

Manjung gaga Sulan di dalam ati ninga Ethan bejaku munyi nya.Ukai gaga ketegal dibai meli utai dempa.Tang gaga laban ulih bejalai begulai enggau Ethan,taja pan enda jauh naka ni!

Pengudah ti bebelika utai dempa dia dih seduai iya Ethan nudukka diri ba bangku enda jauh ari kedai Hospimart.Ba tinjau mata Ethan,Sulan endang nadai berubah, agi bedau baka suba.Makin gemu pungka, idung nyau ka tenggelam alah laban pemesai kuyu.Ngelama tu ukai Ethan enggai berandau enggau Sulan,tang mih iya sigi enda nemu ngerandau orang indu kelimpah ari indai iya empu.

Ethan mega sigi nadai kala bekaban ngau orang indu kenyau ari iya agi sekula suba iya ke baka nya.Lebuh maya di sekula kelia ukai nya bisi rindu orang indu meda tudah.

Diatu taja pendiau Ethan nyau udah jauh berubah pan iya agi empai bisi kaban indu.Enda nemu nama kebuah mih,tauka laban orang indu enda berani deka damping enggau iya.Ukai anchi-anchi penyigat Ethan diatu,iya ga nyu burak,peninggi iya udah manggai 185cm,tubuh gak chukup tegap,
sekali iya ngukir tuchum tau ngasuh darah dalam tubuh orang indu begau!

Sulan ti duduk di sepiak ngasaika mata Ethan benung meratika iya.

Tan nemu aku,aku tu enda bajik,indu gemu ya ga pandak,umbas mih nuan meratika aku ,malu aku ditu! Ku dalam ati Sulan betelai.Iya enda tepansutka leka jaku.Sedar diri gak tudah Sulan.

"Berapa kini pemerat nuan diatu Sulan?" ku Ethan
betanya sambil senyum merening mua Sulan.

Sulan nyu entara dua ka nyaut.Ati pan nyau begetar meda senyum ari Ethan,nambah ga mua betungga damping amat,duduk berimbai.Berasai ngaba angat mimit ba mua bai ati malu.Tang nama daya Sulan dih? Ukai nya ulih dikemulaka pemerat diri,iya endang sigi gemu.

"90kg berat aku diatu Tan,nyawa tu bangat ka
amai makai,tak empa aku aja meh utai ke bisi," ku
Sulan nyaut.

Ethan lalu ketawa ninga saut Sulan munyi nya.
Sulan semina nyeling aja maya Ethan ketawa.Ba ati Ethan ke diatu Sulan nya mih indu ti chukup mentas ke udah kala dikelala iya kelimpah ari indai iya empu.Iya nemu kaul Sulan enggau indai iya sigi lama udah rat pengudah iya mupuk ke Kuching kitu suba.Iya mega nemu Sulan selalu nulung ngemataka indai iya di menua din.Iya nemu ati Sulan sigi lurus,enti ka ngumbai Sulan deka beambi ulih nyau baka ti enda betul amat ga runding nya.Laban Ethan ga nadai utai ke bisi ,pengaya enggau pengeraja iya sigi nadai ngembuan.

Enda berasai di dalam ati Ethan betanya patut tauka enda iya nguji muka pintu ati iya baru? Sulan indu ti chukup mentas,iya indu ti bisi ngembuan ati penuh pengasih serta nemu siru ngagai orang tuai.Di dalam enda sedar Ethan majak muji pementas Sulan.

??

Genap 3 malam indai Ethan udah bemalam di sepital udah nya baru iya dikemendarka pansut ari wad.Hari siti sida Sulan sebilik enggau Indai Ethan pan lalu mupuk pulai ke menua.

Ethan seduai Sulan sempat betukar numur talipun enggau pangan diri.Dia dih seduai iya pan lalu belabuh bebalas SMS.Pemuas ti suah berSMS Ethan nyau nemu berasai lelengau enti nyema sulan nadai enggau iya berSMS.

Eh,nama mih kebuah ati nemu lelengau asai tu? Enda alah enti aku amai udah labuh pengerindu ngagai Sulan! ku Ethan betelai di dalam ati.

Ethan kebendar ya agi bedau berasai tentu lantang.Ati iya agi nangi,lebuh ngenang jerita lama pedis endar asai enti nyema pengerindu enda nyadi.

Ngingatka jerita lama mina ngasuh ati iya ensiban ,nama Chumang meruan agi mengkang di dalam ati.Lama iya udah nadai kala betemu enggau Chumang.Pengudah sida abis sekula suba lalu nadai kala betemu mua agi mih seduai iya Chumang.Nama enda mih berita Chumang diatu?
Kenu ku dalam ati iya betanya.Ethan lalu merening nuju ngagai laptop iya ti diengkah ba atas mija belajar.

Laptop diON.Website Fac dibuka lalu di log in.Nama Chumang ditaip,lalu ditekan iya butang 'search' .Enda datai dua sikin terus ayan gambar profile Chumang duduk berimbai enggau Asun.

Asun mayuk tandan bahu Chumang,seduai iya bela tuchum manis mandangka pengaga ati ba dalam gambar nya.Enggai nunga gambar nya lama Ethan pan lalu nutup laptop iya baru. Iya ngalika diri ba tilam.Tegenung merening siling bilik.Amat pan iya kala nyukung dua iku nya begulai suba,tang maya meda gambar nya tadi ati iya bisi berasai bepedi.Chukup pedis ati lelaki iya dia,selama-lama tu iya nguji muai Chumang ari ati tang bangat enda ulih.Enti nyema orang bukai nyadi sulu Chumang enda ga ngawa,engka tak nyau ka iya enggau ngujika pemintar diri betapat nguntik Chumang menya suba.Tang laban nya kaling iya empu,iya pan nadai daya ka ngaga nama-nama.