Helen ti ninga jaku Sulan munyi  nya lalu madahka diri deka pansut dulu.Taja dalam ati tak enda nyamai asai meda Sulan nya maut lengan Ethan tadi tang iya nguji enda kiruh iga laban meda Sulan ga benung sakit.

"Ethan, ampunka semua penyalah ti kala digaga aku ba nuan suba. Aku ngarapka nuan senang lantang begulai enggau iya ila," ku Sulan bejaku.Seretai nya mega ai mata iya nyu berterunjui  naya ngemasahka kuyu.

Ethan ngingkaska jari Sulan ti maut lengan iya tadi belubah-lubah.Sinu ukai enda sinu asai ati iya meda pendiau Sulan diatu, tang iya ngambu nya sigi uadah nasit diatur Petara ke Sulan.

"Anang irau nuan. Nadai kala disimpan aku ba dalam ati semua penyalah nuan," pia ku Ethan bejaku sambil tuchum deka ngenyamaika ati Sulan.

Ninga jaku Ethan munyi nya nyu makin deras ai mata Sulan naya.Ai mata nesal ketegal ulah diri empu suba. Ethan nyau ga mulaika diri.Tinggal mih Sulan lelengu kediri.Dunya iya nyu makin petang, ati pan nyu udah putus pengarap deka neruska pengidup.

Di menua Bintulu.

Seminggu pengudah nya Ethan pan nyau mupuk nurun kursus ke Kuala Lumpur.Maya pagi ujung minggu nya apai Helen ngemai Helen ke pasar deka nukar bingkai cheremin mata iya.Datai di kedai cheremin mata, dia dih bisi  siku lelaki lalu mandangka senyum ti chukup manis ngagai Helen enggau apai iya.Mata Helen enggau lelaki nya lalu betemu.Asai ti  kala meda gamal iya tu. Ku Helen bejaku di dalam ati.

"Bingkai baka ni kedeka nuan aya?" ku Steven betanya.

“Errrmmmm…legi aku madah” ku Apai Helen sambil meratika bingkai ke bisi ayan dia.

“Pemilih nuan dia mih aya,” ku Steven.

Maya apai Helen kiruh milih bingkai cheremin mata dia dih Steven lalu ngambi peluang ngerandau Helen.

"Kumang, lapa nuan lalu enda kala malas mesej aku?"

Helen bebengap aja dia.Ninga Steven ngangauka iya kumang nya baru iya ingatka SMS ti dibacha iya lebuh nya.

"Ouhhh nuan ke nganjung mesej nya pia?" ku Helen sambil tuchum singit.

Steven nagunka pala lalu tuchum. Helen nyau ga ngelarika diri, enda tentu ka iya berandau enggau Steven.Steven ti sedarka Helen enda tentu ka dirandau iya pan nyu diau jenuh  aja ga  udah nya.Sepenembu Apai Helen meli bingkai cheremin mata seduai iya menyanak pan lalu ka pansut ari kedai nya.Enda memukai di luar dia tak benung bangat amat ga ujan.

"Eh, nama nya ngenyit ujan? Anang guai pansut tua," ku apai Helen.

"Laban aja ujan nya daddy.Aram!" Kenu ku Helen.

Jari Helen udah manggaika beg sandik ke atas pala. Enggai iya lama-lama ba kedai nya. Maya Helen baru deka nyingkangka kaki pansut ari kedai nya dia dih Steven datai lalu ngetanka iya.

"Aku nganjung seduai ngena payung tu," ku Steven.

Malik Helen ngagai Steven nyu tekenyit iya meda payung  dibai Steven ngemesai-mesai nya.Kira ke muat mih payung nya dikena sida tiga. Apai Helen pan ukai nya besai iga.Helen pan baka nya.Helen
laban ti sigi ka pansut ari kedai nya jampat iya pan enda mantah maya Steven deka mantu seduai iya meapai.Nyau mih Steven nganjung seduai iya ngelawa kerita. Steven nya ba tengah-tengah, Helen muak ke kiba, Apai Helen muak ke kanan.

Pengudah  nganjung Helen enggau apai iya, Steven pan mulaika diri ngagai kedai iya baru. Datai di kedai, dia dih Steven lalu tepedaka siku enda dikekala bediri di depan mua pintu kedai .Indu nya mantaika  tuchum ngagai Steven. Steven pan malas senyum indu nya ga taja enda dikelala. Nambah ga iya sigi gerah meri orang senyum.

??
Di Kuala Lumpur.

Tembu kursus malam nya semua staff ti bisi enggau Ethan kursus nyu beteruduh ngelawa restoren laban deka makai malam.Sepenembu makai, Ethan lalu belelak di dalam util. Udah tubuh direbah ke tilam, iya lalu ngulihka talipun ari dalam kuchik tanhcut.Ka betalipun ngagai Helen dulu sebedau ngelelapka mata pia ku anak ati.

Maya ti meda skrin talipun nyu ngenyit ngeredut kening Ethan dia.MMS ti dianjung Lahung nyu ngasuh ati berangat.MMS nya mandangka gambar Helen begulai enggau lelaki bukai.Lelaki nya mega kala ngambu diri nyadi laki Helen suba.Taja ati benung pedis tang Ethan enggai bebadu ga meratika gambar nya.Helen enggau lelaki nya damping amat enggau pangan diri semutika enda beberap maya bejalai. Bai ati ti kelalu pedis  Ethan pan terus mulaika diri ke Bintulu hari siti.Iya lalu lanjur enda betalipun ngagai Helen.Helen betalipun ngagai iya pan pan enda disaut iya. Telih menaih asai ati Ethan dia, enti baka Helen nya semina sulu iya aja engka agi ulih ditagang ati iya ti deka ngeransi.Tang mih Helen nya diatu udah sah  nyadi bini iya.Semina rami aja seduai iya ke  empai.

Hari siti…

Datai di Bintulu, Ethan lalu ngelawa opis iya.Pintu bilik opis ditukangka udu.

"Peda nuan nya!" Talipun Ethan diempaska iya ngagai mija gawa Helen.

"Nama nya? Nama nuan enda madah pulai? “ ku Helen betanya seretai enggau ati tekenyit meda ulah Ethan.

Ethan ti sigi  ari malam kemari udah  ngetatka pemedis ati lalu mansang ngelawa Helen. Dipaut  iya angkat tubuh Helen lalu ditulak iya ke dinding. Mulut Helen disium iya ngenyit.Helen ngetat aja.Tang  ai mata iya bisi labuh setitik dua meda ulah Ethan tak ngenyit bebali kasar enggau iya.

Ethan ngasaika Helen enda meri respon maya iya nyium mulut siku nya, nya ti nyau nambahka pemedis ati iya. Dilekaka iya tubuh Helen, dah nya diambi iya talipun  tadi lalu disuaka iya ngagai Helen.

"Nama reti gambar tu?"

Talipun ditungaka iya ba depan mata Helen amat-amat. Dia dih Helen meda gambar Steven ti nganjung seduai iya meapai  ngena payung maya hari ujan pagi kemari.Tang mih ba gambar nya semina gambar Helen enggau Steven aja, nadai gambar apai Helen dipeda ayan dia. Helen enda nyaut Ethan laban nemu bisi orang sengaja beduan iya ngena gambar nya. Bisi orang enggai meda iya begulai enggau Ethan.

"Lapa nuan enda nyaut!?" ku Ethan merak Helen.

"Sapa meri nuan gambar nya?"

"Sapa meri gambar nya enda penting, utai ti ka ditemu aku nama kebuah nuan ngayahka aku baka tu?"

"Ethan, nuan mesti pechayaka aku, anang pechayaka gambar nya," ku Helen.Nyu  majak labuh ai mata iya dia.Tang Ethan nadai tanda-tanda deka badu nganu.Jauh ti deka ngaum iya.

"Keni aku ka pechayaka nuan? Lebuh nya nuan madah enda ngelala lelaki nya ga.Tu nama reti gambar tu dih?" kenu ku Ethan sambil jari iya mandangka  gambar ba talipun nunga ngagai mua Helen baru.

"Pechaya mih ke aku Ethan, nadai utai bukai pinta aku.Aku ka nuan pechayaka aku aja," kenu ku Helen.

Pia iya bejaku pia ai mata majak ga bekeberai naya. Dipegai iya jari Ethan, tang terus dikesaika Ethan.Ensepi jari diri dikesai, nyau makin telih ga asai ati Helen.Iya lalu nudukka diri ngagai bangku endur gawa.Mua dipampur ngena kedua iti tapak jari, nyu sesedan mih munyi sabak Helen dia.

Meda Helen lalu enda meri saut ti ngemuaska ati, Ethan pan deka mansutka diri ari opis nya.Enggai iya lama-lama dia agi. Nangika diri empu  majak deka ngeransi.Maya Ethan ka pansut  ari opis nya iya sigi langsung nadai malik ngagai Helen.Sabak Helen enda dipedulika iya lalu.

Lapa ga nuan bangat enda pechayaka aku Ethan? Ku Helen betanya di dalam ati. Ai mata iya nyu enda ulih ditagang, makin ditagang makin laju ga naya.
Benung Helen sesedan nyabak dia iya tedingaka pintu opis nya munyi ti ditukangka orang.Empai ayan mua orang ti nukangka pintu tang iya udah dulu meragamka orang nya Ethan.

"Ethan!" ku Helen.

Tang mih orang ke ayan ba mua pintu nya ukai Ethan.Steven datai lalu mantaika tuchum di mulut.

"Nama gaga nuan kitu?" ku Helen betanya.

Tuchum Steven terus lenyau tekala nya maya meda gamal Helen.Ai mata ti ngemasahka kuyu Helen dia chukup terang dipeda iya.Taja pia Steven nagang ati iya ti deka betayaka nama penusah Helen.Nambah ga selama tu iya sedar Helen sigi enda tentu deka ibuhka iya.Enggai ga iya majak leluba deka ngaul Helen.

"Kemari aku enda ingat meri free gift ngagai daddy nuan,"ku Steven bejaku sambil kaki iya nyingkang bejalai ka ngelawa mija Helen.

"Anang mansang kitu! Bai pulai baru free gift nuan nya, nibuh meri aku," ku Helen sambil jari ngendas ai mata ba kuyu.

"Ukai ka meri nuan, ka meri ngagai apai nuan," ku Steven ga.Plastik ti endur nepu free gift lalu diengkahka iya di atas mija Helen.

"Nama nuan enda nemu reti jaku aku? Enggai aku nerima nya, pansut nuan!"  ku Helen.Plastik free gift nya dijingkau iya lalu disuaka ngagai Steven.

"Au...enti nuan enggai enda ngawa.Ya lapa ga nuan nyabak? Nama utai ngachau nuan kumang?" ku Steven betanya.

Nyu enda tan ati iya meda ai mata Helen agi nichir.Nambah ga Steven sigi bansa ti jampat sinuka orang. Ingin amai asai ati iya deka nemu nama  penusah ti nuntung Helen.

"Anang ngangauka aku kumang!" ku Helen merak Steven.Nyau enda liat  ati iya meda Steven enggai pulai-pulai.Nambah ga iya irauka Ethan datai kia baru.

"Au…au enda aku ngangauka nuan kumang enti nya tau ngasuh nuan enda nyamai ati," ku Steven.

"Pulai nuan alai,"ku Helen.

"Enti nuan udah madahka nama utai ngenusah nuan nya baru aku ka pulai,"ku Steven.

Helen nyu geram diri meda ulah Steven ti kelalu ka kiruhka hal iya.Enda lama udah nya iya tedingaka munyi pintu ditukangka orang.Helen enggau Steven bela seretai malik ngagai mua pintu.

"Miss Helen, file tu asuh sign bos enti iya udah pulai kursus ila," kenu ku Susan. Susan tama lalu ngengkahka pail di atas mija Helen.Pengudah Susan pansut, Helen pan lalu nela pail ti dianjung Susan nya tadi.

"Pulai nuan, nadai utai ka dikerandauka tua agi," ku Helen.

"Nuan tau call aku barang maya aja enti nyema nuan ka begunaka aku, aku sigi sedia nulung nuan,"ku Steven.Meda Helen nyu enda bejaku agi Steven pan lalu pansut ari bilik opis.

??
Pulai gawa lemai nya Helen pan  lalu  lanjur ngagai rumah Ethan.Tama ke dalam rumah nadai ga iya meda Ethan.Tang kerita Ethan bisi ga di luar din tadi.

Nyau Helen ke dapur.Dia iya meda Ethan baru ka tama ke dalam bilik mandi. Ethan pan sempat ga meda iya.

"Mandi dulu mih nuan," ku Helen.

Maya Helen deka pansut ari dapur  dia dih  jari iya ditarit Ethan tama ke dalam bilik mandi.Pintu bilik mandi lalu ditikupka Ethan.Ati Helen nyu kelelau kesal asai ya dia.Mata seduai iya Ethan betemu perening.

"Ampunka aku kumang," ku Ethan bejaku nelai pending Helen.

Helen nyu majak kesal pengudah ditelai Ethan, tubuh seduai iya chukup damping amat enggau pangan diri.Begadai-gadai  kaki Helen  nyurutka diri ke belakang nyentukka tubuh iya tepantup ba dinding.Amat seduai iya udah sah melaki bini, tang pengawa ti siti nya sigi empai kala digaga.Alun dada Helen nyu berupai laju nurun niki bai ati ti majak kekelau kesal.

"I love you so much," ku Ethan nelai Helen baru.

Mulut Helen disium iya, ari mulut nurun ngagai rekung.Gari Helen dibuka Ethan sesiti, udah nya Ethan muka gari iya empu.Tubuh Helen lalu dipaut Ethan begadai nyatup tubuh iya.Ati indu Helen nyau balat amat begetar maya iya ngasaika tubuh seduai iya udah besatup. Jari Ethan ngerayap sebelah tubuh Helen.Enda berasai Helen pan nunda Ethan.Tubuh Ethan diberap iya rat ngasak amat.
Dah ngasaika  Helen bisi meri respon, Ethan pan lalu ngenung meratika mua Helen.Nyesal amai asai ati iya udah nganu Helen pagi tadi.Mata seduai iya betemu baru, mulut pan bebalas senyum ngagai pangan diri.Ethan lalu ngayam tubuh Helen penuh pengasih enggau penyayau.

??

Malam nya pengudah tembu makai Ethan enggau Helen duduk berandau ba bangku bilik besai.

"Udah pechayaka aku baru nuan?" ku Helen betanya.

"Enti aku enda betemu enggau daddy tadi lanjur enda nemu utai mih aku."

"Nuan betemu enggau daddy tadi pia?"

"Au." Saut Ethan seleka.Nyau malu kediri empu nyangka Helen sengapa mih Ethan dia.

"Sapa meri nuan gambar nya dih?"

"Lahung."

"Hermm…agi bisi ati ngagai nuan iya pelaba aku."

"Eihh..tukar numur tua udah tu.Ngambika nadai orang ngachau agi," ku Ethan.Seretai ti bejaku mega iya lalu ngalika diri ba pah Helen.

"Ketu asai udah bisi bini," ku Ethan ga bejaku baru .Helen senyum ninga jaku Ethan.Di dalam ati nyu enda alah dikira agi  pengaga.

"Enda pulai ke KL baru nuan?  Kati baka kursus din kemari?"

"Enda aku kin agi," ku Ethan nyaut sambil jari iya ngayam buk Helen.

"Gawa ditu mih nuan pagila?"

"Au kumang, anang berandau pasal pengawa maya di rumah," ku Ethan. Iya lalu ngangkatka diri bediri merening ngagai Helen sambil meri tuchum manis. Ethan terua ngatung Helen tama ke bilik peninduk.

"Eeeee…agi dapat aku tu bejalai," kenu ku Helen.

Mulut aja ti bejaku munyi nya tang di dalam ati bebungai gaga.

Pagi hari siti??.

Enchelak mata Helen meda Ethan sigi udah dani, mata iya benung ngenung merening ngagai Helen.

Eeee…perening mata nuan nya ngasuh kesal tetumu pagi! Ku Helen bejaku di dalam ati.Nyau asaika bemimpi belama iya udah nyadi bini Ethan.Agi empai teleba endar asai betunga mua ba atas tilam peninduk baka tu.

Tubuh Helen dipaut Ethan damping agi lalu diberap iya  di dalam pua.

"Arammm," ku Ethan
"Aramm kini?"

Ensepi jari Ethan udah mupuk ngerayap ba tubuh iya dia dih  Helen lalu nemu utai kedeka Ethan pagi tu.

"Eeeee…laun aku nurun gawa legi," ku Helen. Iya nguji ngelepaska tubuh diri ari berap lengan Ethan.

"Sapa bos nuan kumang?  Legi aku madahka iya kebuah nuan laun datai.Enti iya nganu nuan legi aku nganu iya baru ga,"ku Ethan lalu tuchum manis ngagai Helen.

Alah ga Helen laban perening mata Ethan.Enda tan ati indu iya dia.Nurun gawa pagi nya bela tuchum manis seduai iya di dalam kerita sambil beperindang enggau lagu "Destiny".Benung seduai iya rindang mendingka lagu nya, talipun Helen didinga bemunyi nandaka bisi orang betalipun.Talipun terus disaut Helen taja numur ti ayan ba skrin nya enda dikelala iya.

Helen ?? Hello?

Steven?? Selamat pagi, nama berita nuan?

Helen ?? Sapa tu?

Steven?? Steven tu, lalu enda disimpan nuan numur aku pia?

Talipun lalu dipadamka Helen ngenyit pengudah iya nemu orang nya Steven.Ethan ti di sepiak terus nyeling Helen.

"Sapa nya?" ku Ethan betanya.

"Entah ."Saut Helen seleka.

Enda lama udah nya  bemunyi baru ga talipun Helen tang sekali tu enda disaut iya.

"Meli numur baru tua, tukar aja numur talipun ke diatu," ku Ethan.

Helen nagunka pala bekali-kali tanda setuju.

??

Di Opis Posim Petroleum.

Ethan mayuk tandan bahu Helen maya tama ke dalam opis.Mua seduai bela mantaika senyum manis.Pengerindu ga benung bebungai.Pintu penama ke opis Ethan ya nya ari opis Helen.
Maya pintu ditelenga dia dih Steven benung dedugau ba bangku enda jauh ari mija gawa Helen.
Kening Ethan terus ngeredut meda Steven bisi dia.Mua iya lalu bebali nadai ngayanka senyum di mulut agi. Steven ti benung meda Ethan mayuk tandan bahu Helen pan nyau bebengap ga dia.

"Selamat pagi, ulih aku berandau enggau nuan?" ku Steven nanya Helen.Iya bejaku sambil nyeling Ethan.Tajam amai perening mata Ethan nya peda iya.

"Nama utai ka dikerandauka nuan enggau bini aku? Sebut ditu meh," Kenu ku Ethan.

"Helen tu bini nuan?" ku Steven betanya.

"Au, bini aku mih Helen tu."

Alit ati Steven dia, kemari iya meda Helen nyabak di dalam opis nya.Sehari tu Ethan nyau ngaku Helen nya bini iya ga.Kelalu mayuh utai ka ditanya Steven tang iya milih deka ngundurka diri aja pengudah ninga Ethan madahka Helen nya bini iya.

"Ermmm nadai ngawa mih," kenu ku Steven lalu mansutka diri ari bilik opis nya.Meda Steven udah pansut terus ayan baru senyum ba mulut Ethan.

"Nyaa badu iya kitu agi udah tu," ku Ethan.

"Kati enti iya kitu baru dih?"

"Dilalaika aku sekali nuan enti iya kitu baru ila."

"Dini nuan ka ngelalaika aku?"ku Helen betanya baka nembiak mit.Empai puas ati iya nundi Ethan.

"Ditu arrr, di dalam ati aku ditu," ku Ethan nunjukka tunjuk jari ngagai dada.

"Kitu aku ka nilik ati nuan, muat kini aku dalam nya?"

"Nama nuan nyu makin manchal," ku Ethan.Lalu dipechal iya idung Helen.

"Nuan aja nemu manchal? Kami nemu mih," ku Helen nyaut sambil lalu bejalai ngelawa  mija gawa iya.

Ethan nitihka Helen lalu ngengkahka briefcase iya di atas mija Helen. Empai sempat Helen nudukka diri ba bangku iya dulu agi ga Ethan nudukka diri dia.

"Eihhh, nama gaga nuan aa!" ku Helen. Punggung iya dipaut Ethan, seduai nyu duduk bepangku dia.

"Ka manchal," ku Ethan nyaut.Helen terus berumban deka ngangkatka diri baru.

"Eiihh…enda malu nuan legi ti staff bukai tama kitu meda tua," ku Helen.

Angkat ga Ethan ari bangku penuduk Helen, iya lalu nyingkau briefcase ti diengkahka ba atas mija Helen.Sebedau tama ke bilik opis iya empu  sempat iya  nelai Helen,

"Kapa ka malu enti manchal enggau bini diri empu?"

Helen agi dedegi meratika ulah Ethan.Taja udah suah ditelai Ethan baka nya, taja tiap hari iya nunga mua Ethan diatu, taja tiap hari meda Ethan senyum tang ati iya tetap agi semampai kekelau kesal enggau semua utai nya.Agi semampai begetar ati tetiap kali laki iya nya merening mata iya, senyum ngagai iya, nyium iya serta ngayam iya.Ati iya semampai ngasaika semua nya baka ti baru nyadi belama.

Pulai gawa lemai nya Ethan seduai Helen nesau bala ti sama enggau seduai gawa dia pasal seduai ti deka ngaga pengerami melah pinang.Mayuh tekenyit bala staff ninga berita nya tang mih sida bela meri sukung serta bekunsi pengaga enggau seduai iya.

??
Malam di rumah Ethan???

"Berapa mayuh orang ka dikangauka tua?" ku Helen betanya sambil jari iya migai kad kangau seduai iya Ethan.

"Bala kaban belayan ti semak aja mih," ku Ethan nyaut.Jari Ethan agi kiruh nulis nama orang ti deka dikangauka iya ba kad kangau pengerami seduai.

Helen meratika Ethan nulis sambil betungkat dagu, nyu tegenung iya dia. Asaika bula udah ngempu Ethan sehari tu.Ku Helen betelai di dalam ati.

"Makin sigat aku dipeda nuan kumang?" ku Ethan betanya sambil jari agi kiruh nulis.

"Semampai sigat ari suba nyentukka sehari tu. Ermm…nuan enggai nemu kemaya keterubah aku labuh pengerindu ngagai nuan?"

Jari Ethan ngetu nulis, iya lalu merening mua Helen.

"kemaya dih?"

"Ari kitai pom 1, maya nya tua agi sekelas .Tang udah pom 2 tua nyau beserara enda sekelas agi.Bepun ari nya mih aku semina ulih nimpai nuan ari jauh aja."

"Woww…nuan baru pom 1 udah nemu reti labuh pengerindu?" ku Ethan nundi Helen.

Terus bebali mua Helen ninga jaku tundi Ethan.Enda berasai nyu malu asai ngenang jerita lama.Nyau nesal iya madahka Ethan tadi.

"Eihh, nuan baka nya mih.Kumbai nuan enda nemu aku tu?" ku Helen ga enggai alah.

"Nama utai temu nuan?"

"Neii, kumbai nuan enda nemu aku nuan ka ke Chumang suba, anang enda ingat nuan aku tu bekaban enggau Chumang mih suba."

Nyu mua Ethan ga bebali diatu, iya empu malu mih enti ingatka nya.Ingatka diri ti kala ninding Asun enggau Chumang kelia.Berasai beli endar maya nya.Ethan ngelekaka pen ba jari iya, lalu duduk damping agi ngimbai Helen.

"Salah nuan nya suba, uji nuan tumu agi bekelala enggau aku." ku Ethan.

"Enggai kami kumbai nuan leluba, malu kami nemu nuan. Nih tua kala sekelas pan nuan enda ingat nyeeii."

Seduai iya majak betundi begagai ngenangka jerita maya agi sekula.Malam pan nyau enda berasai.Hari ti bekinsit pan enda berasai nyau datai ba hari pengerami seduai iya melah pinang.

Chukup tampak bebendang mua Helen dipeda Ethan maya malam pengerami seduai iya melah pinang.Nadai utai ulih dikena  nyemaka pemajik Helen.Helen pan asai nya maya meda Ethan, gaga amat asai ati.Ngarapka pengerindu enggau penyayau tua ke pangan diri ulih datai nyentukka  seput tua padam kenu ku dalam ati Helen betelai.