Kening Ethan pan ngeredut mega,alit ati iya udah nya.

"Beri orang maya agi sekula pom suba bup nya,
kumbai aku nuan mih meri maya nya laban bup
nya udah diengkah manah ba dalam lachi mija
aku."

Asun ngenung enda lama,udah nya iya nyu ngingatka bisi orang nyuaka bungkus utai ngagai iya suba.Jaku pesan orang nya ngasuh meri bungkus nya ngagai Ethan.

"Eehh,aku mih ti engkah ba dalam lachi nuan maya
nya,enda ga aku tu ingat ka madahka nuan suba.
Bisi nembiak enda dikelala aku ngasuh nyuaka
nuan bungkus utai,enda nemu nya ke bup tu aaa."

"Nembiak indu tauka lelaki?" Di dalam ati Ethan
diatu nyu sesengit asai ka nemu sapa ti meri bup
nya kebendar ya suba.

"Nembiak lelaki,mit-mit tubuh tang aku enda
ngelala iya aaarr"Ko Asun ga.

Berasai ngasaka ati Ethan jaku saut Asun nya.Bup dipigai lalu ditela iya.Baka ni mih aku ka nemu sapa ti meri bup tu? Di dalam ati Ethan nyu majak betanya.Puntan penemu iya ninga Asun madah enda ngelala orang ti meri bup nya suba.Enggai kiruh mikirka pasal bup nya agi seduai iya Asun berandau pasal utai bukai ga udah nya.Ya ga lama amat udah enda betemu mayuh jerita ka dikunsika enggau pangan diri.Malam ti nyu makin berinsur tuai pan enda mih berasai.

??

Pagi hari siti tumu Ethan pansut ari rumah laban deka mupuk ke Bintulu.Iya deka nganti bas ti bisi mansa pukul 8 pagi ba simpang jalai besai.

Benung Ethan bejalai kaki ka ngagai simpang,dia dih kerita Alza Sulan mansa iya.Belubah aja pejalai kerita nya lebuh ti mansa Ethan.Maya meda kerita Sulan,Ethan tetap neruska singkang kaki sambil nundukka pala iya.Iya nangika Sulan bisi nilik ari cheremin rear view kerita.

Tang kerita Sulan semina neruska pejalai,Sulan ti benung deriba nadai kiruhka orang ti dipansa iya ba jalai alun.Kaki Ethan pan baka nya mega majak neruska singkang.

Lemai nya sepenembu belelak ba bilik pengudah ti pulai ari menua Bintulu, Ethan nurun ke baruh rumah deka ke ujung bilik nengkani manuk.Maya benung nengkani manuk..

"Ooo ibu…"Ku munyi sura nyawa orang ngangau.

Sura nyawa nya sigi dikelala Ethan.Tang iya enggai kiruh.Pulai nengkani manuk Ethan meda Sulan enggau indai iya duduk dedugau ba pala tangga.
Ethan mansa pia aja lalu lanjur niki ke atas tama ke rumah.

"Aram ibu diatu meh tua mupuk kin.Bisi pengawa
kami malam tu,Ethan lalu bai sekali mih,"ku Sulan.

"Aram ga mupuk diatu ,"ku indai Ethan.

"Terus makai ba kami din legi ibu,enda madahka
Ethan diatu nuan??"

"Amai endar empai madahka Jang.Jang ! Aram
ngagai sida Sulan kia dulu."

"Nuan aja meh kin indai",ku saut Ethan.

"Nuan enggai enggau?"

"Enggai aku, ka belelak."

"Bah …lakka Ethan belelak dulu mih dia."

"Uji bai baru iya ibu,kangauka baru.Padahka iya
lalu makai ba kami din,"kenu ku Sulan ga.

Indai Ethan nyu alit ati,baka bisi utai enda tentu betul ba ulah Sulan enggau Ethan.Ya lapa ga Sulan empu enda bejaku enggau Ethan enti ka mai Ethan ke rumah sida? Agi besulu tauka nadai dua iku tu? Ku indai Ethan betanya di dalam ati.

Taja pia indai Ethan enggai mansal Ethan enggau iya.Laban iya meda Ethan baka ti sengaja ngaga kedalih.Ya ga udah bendar Ethan nya belelak selemai- lemai tu.Enda patut ka belelak baru.Pia ku runding iya.

"Lakka mih endu,nemu iya nitih enti iya ka enggau
legi."

Sulan enda bemunyi agi.Di dalam ati iya ngelama tu chukup lelengauka Ethan.Taja lelengau iya tetap milih deka diau aja.SMS kepenudi iya ti enda dibalas Ethan suba udah chukup terang nandaka Ethan muai iya.Laban sepengelama besulu Ethan sigi enda kala ngelakka SMS iya enda dibalas.

Sulan empu lalu lanjur nadai ngiga Ethan agi udah nya.Iya nemu diri dah bula serta enda netapka danji.Nya mih ti ngasuh iya nyau putus pengarap suba.

Tang pengerindu ba ati iya semampai diungkupka ngagai Ethan siku aja.Mayuh kebuah iya enda ngiga Ethan ngelama tu.Utai ti paling balat ngeregau ati iyanya irauka Ethan engka tak nyu udah bulih sulu baru.Sulan deka meratika Ethan dulu.Enti bisi peluang iya sigi deka bepun baru enggau Ethan.

Di dalam bilik Ethan endang bisi ninga Sulan majak deka mai iya ke rumah sida.Ethan tuchum kediri ngenang ulah diri empu ti kelalu berupai enggai ibuhka Sulan.Nama kebuah aku ka ngelarika diri ari Sulan? Utai ke lama nya udah mih nya.Nibuh dikenang agi.Pia ku dalam runding Ethan.Iya pan lalu pansut ari bilik..

"Aram mih,"kenu ku Ethan.

Asaika enda pechaya Sulan meda Ethan ka enggau.Ninga Ethan tadi ngaga kedalih baka ke lembau amat dibai.Bebungai gaga mih anak ati Sulan dia.

Di rumah sida Sulan.??

Sida sebala benung berandauka pasal pengawa ngerami Paran ti deka bebini.Ethan nudukka diri ngimbai Paran.

"Orang tunga kini tawing nuan?"ku Ethan nanya
Paran.

"Indu Kayan tunga ke menua Belaga,enggai aku
ngiga tawing kelalu jauh ari menua kitai,"ku Paran
nyaut sambil ngayanka tuchum.

Ethan pan tuchum mih ninga saut Paran.Ngena ga penemu Paran nya, nyamai ga enti bulih tawing berimbai menua,pulai rami begawai enda mih jauh! Kenu ku dalam runding Ethan,

Pengudah tembu berandau dia dih sida ngaga pemutus sama setuju deka ngerami Paran melah pinang ba GoldenBay Hotel Bintulu.Pengudah ngaga pemutus nya sida nyu mupuk belabuh makai.Sulan nyuaka lauk ngagai Ethan.Disambut Ethan ga,udah nya nyu minta suaka lauk bukai ga Ethan.Sempat berbalas senyum mih seduai iya Sulan dia.

Ermmm...bisi peluang baru kini aku? Ku tanya ati Sulan maya nerima tuchum manis ari Ethan.

??
Seminggu pengudah nya.Datai ba hari pengerami melah pinang Paran.

Di rumah Ethan.

"Jang lapa nuan lalu enda beradu?"

"Beradu bakani ku nuan tu indai?"

"Endai...rasukka gari ke manah agi mih.Uji tu kena
nuan,"Baju batik bechura mansau ti beukir pua
kumbu disuaka iya ngagai Ethan.

"Eihh...enggai aku ngena baju baka tu arr."

"Kena aja,aram mupuk legi nyu laun tua datai di
Bintulu."

Ka pan enda dirasukka Ethan ga baju nya tadi.

Datai di GoldenBay Hotel Bintulu,

Ethan enggau indai iya seretai tama.Sulan duduk ba mija receiption,iya benung nganti penatai Ethan.Ati iya kesal,tapak jari berasai chelap ari tadi.

Pemuas ti gegining dia dih iya tepedaka Ethan.Ari jauh baju batik bechura mansau ngena ukir pua kumbu nya cukup tampak dipeda.Lalu panjai garis tuchum ba mulut Sulan.

Malam nya Ethan mih ke paling tampak ,nyu tampak ari pengantin sema jaku.Sulan berasai termegah enggau penyigat Ethan ,iya mega berasai chukup gaga laban baju seduai iya Ethan sepasang! Mujur mih pelin ti digaga.

Ethan datai nyu tekenyit meda baju seduai iya Sulan sepasang.Ethan lalu nyeling ngagai indai iya.Tang indai iya ngaga diri enda nemu utai ga.

Pengerami melah pinang berengkah enggau munyi tebah Sape kayan.Di atas pentas siku indu kayan benung nebah Sape.Tunjuk jari berupai runchik. Semua orang bela mendingka tebah sape iya enggau ati ti cukup rindang serta lantang.

Ethan pan rindang meratika indu ti nebah sape nya.Amat landik indu nya kenu ku dalam ati iya muji.Iya empu megai Sape pan enda kala,jauh ti deka nemu nebah baka nya.

Mija endur Ethan duduk enda tentu jauh ari pentas ,iya berimbai duduk enggau Sulan.Sulan nya ari tadi mih lelinsum tuchum gaga.Tembu nebah sape indu ti ba pentas tadi lalu nurun ke baruh.Bala mayuh pan betempapka jari.Udah nya sida diperindang enggau taboh tawak lalu beseretai enggau orang ngajat iban.

Indu ti nebah sape tadi duduk enda jauh ari mija Ethan.Mata Ethan lekat merening indu nya.Bajik!! Chukup pemajik,nadai endur mantah sekali indu ti ngena ngepan gari Kayan nya ba mata iya.

Tang pemuas Ethan merening,indu nya pan nyu merening iya ga.Seduai pan besabung perening mata.

Ethan nelan ai liur berasai rangkai batang rekung.Gaya mata indu nya merening nyu ngingatka iya ngagai sesanu suba.Enda tentu ingat iya nama,bendar iya nguji ngingat.Indu kayan?? Amai endar Lahung,pengawas indu di sekula pom aku suba! Ngenangka pemangah Lahung kelia nyu enda entu ka Ethan malik iya agi.

Tembu betebahka tawak pengerami pan majak ranchak.Ethan nyu udah 3 tin beer diirup,iya enda teleba ngirup tang bala ti semija enggau iya majak ga mansal ngirup.Sulan ti duduk disepiak chukup pengaga mih ati iya nya ari tadi.Bendar iya ngambi gambar Ethan begulai enggau bala ke semija dia.

Ethan nya ari tadi mega ka angkat kemi.Baru ka angkat burit lalu ditagang orang.Nyau bendar ngetatka kemi ya ga udah nembuka 3 tin beer.Bala sida aya ibu ke semija enggau iya nyu mupuk ngisi gelas enggau ai tuak.Dia tuak,dia beer meh ti ka diirup.

"Ka ke jamban dulu aku ibu aya."

"Ohh...ari tadi nuan tu ka ke jamban.Anang lelama
Jang,anang ka ngelarika diri nuan.Pulai kitu baru
legi enggau kami nembuka ai tu."

Ethan nagunka pala.Ya ga pala udah chukup berasai berat.Laban iya ti burak mua pan nyu udah berupai bebali mansau,dada nyau angat mih dia.Tambah mega Ethan sigi orang ti enda teleba ngirup.

Pulai ari jamban iya nyu bepansa enggau Lahung.
Ethan bejalai lubah maya mansa Lahung.Lahung merening iya tajam!

Lahung endang sigi meratika Ethan ari tadi.Meda Ethan angkat pansut iya pan nitih ari belakang.Ati iya keran ka nemu enti Ethan nya orang ti kala dikelala iya tauka ukai.Mua sebaka tang iya empai puas ati ,iya ka meda damping agi.

Kaki Ethan sebutika nyingkang maya mansa Lahung.Lahung agi bajik baka suba,nyu makin bajik agi pungka iya diatu.Enda berasai ati Ethan majak muji pemajik Lahung.

"Ethan??" Ku Lahung bejaku ngenyit maya seduai
bepansa.