Ninga nama dikangau Ethan lalu ngetu nyingkangka kaki.Iya terus malik ngagai Lahung.
Kelalu lama asai nadai kala ninga munyi sura nyawa nya.Ethan ngukir tuchum manis maya merening Lahung.Udah nya ngeredutka kening ga iya lalu betanya..

"Nuan ngelala aku?"

"Nama nuan ukai Ethan?"

"Kati enti nama aku ukai Ethan?"

"Ohh...salah orang mih aku ti pia,"Lahung neruska
singkang kaki ka ninggalka Ethan.

Ethan lalu beguai nangkap lengan Lahung sambil senyum.Iya empu pan enda sedarka pengawa diri, tak enda berasai jari ka nyengkau lengan Lahung.
Dini enda iya bulih pemerani, empai kala seumur idup iya mungkal migai orang indu.Engka bai pala udah sebingau kena pangka ai bisa mih meri Ethan berani baka nya.

Lahung berasai tekenyit dipegai Ethan ba lengan.Eh,berani endar iya tu negu aku ku dalam ati Lahung.Ka diiyarka iya jari Ethan,tang ati iya tak berasai enda kempang.Nama kebuah enda kempang iya empu pan enda mih nemu.Maya iya ti deka ngiarka jari Ethan,seretai maya nya mega ati iya bisi berasai rindu.Naka pengelama udah enda betemu nyau ka manggai 7 taun.Bendar iya meratika ka Ethan ari tadi asaika bula asaika enda pechaya.

Kelalu jauh bida Ethan ke diatu enggau Ethan maya agi sekula pom suba.Ethan nyu jauh tinggi ari iya,nyu sebaka pemurak enggau iya,tubuh Ethan tegap,perening mata iya ngasuh ati indu Lahung enda berasai begetar.Tang kada mih orang nya amat Ethan? Agi enda pechayaka mata diri empu ga Lahung.

"Ka kini nuan ? Enggai bekelala enggau aku dulu
nuan endu?" ku Ethan deka nguji ati Lahung baru.

Ninga jaku Ethan munyi nya,Lahung terus ngiarka jari Ethan ngenyit.Ishh...ukai Ethan nya kenu ku dalam ati iya.Ethan ti dikelala iya enda jegak ulah baka nya.Ya ga berani endar negu kitai kenu ku Lahung muchau dalam ati.

Meda Lahung udah ngiarka jari iya,ka ditangkap Ethan baru ga lengan Lahung.Tang Lahung nyu nganu iya.

"Sut!"ku Lahung.

"Apuu nama nuan ngumbai aku sut? Peda nuan
kening aku tu,agi ingat nuan?"Ethan ngiarka
buk tik ngelindung kening.Lalu ditungaka iya
damping ke mata Lahung kening iya nya tadi.

Bekau kening ti telih laban lunga Lahung kelia menya nyu nyengenda ayan di mata Lahung diatu.Telih ti ninggalka litan.Nyu tekenyit ga tudah Lahung maya mua Ethan damping amat nunga mua iya.Ulih didinga iya kesuh seput,bau beer nyu ngaba meh.

"Au…au..enda salah orang mih aku ti pia."

Ethan lalu tuchum.Iya mai Lahung duduk berandau ba cafe util nya.Ethan dia nyu nadai ati ka tama meda pengerami agi.Juluk ati iya diatu semina deka berandau enggau Lahung.Tambah mega iya ka ngelarika diri ari ngirup,ke siti da paling penting iya ka lari ari Sulan!

Ethan terus nudukka diri ba bangku cafe,tang Lahung agi dedegi di tisi mija lalu meri gamal enda puas ati.

"Ehh,sapa indu duduk di sepiak nuan nya tadi? Bini
nuan ka?"ku Lahung betanya.

Iya empai deka nudukka diri,ati agi berasai nangi. Nangika Ethan nya udah bebini lelak enti bini iya salah sangka legi.Pia ku dalam runding Lahung.

"Empai bebini aku tok wai..agik meruan bujang."
"Serius mimit bejaku wai,baju seduai tak sepasang
peda aku tadi."

Ethan enda nemu baka ni ka nyaut Lahung agi laban baju seduai iya Sulan sigi amat sepasang.
Mayuh orang ti meda seduai iya malam nya endang sigi ngumbai seduai iya bisi sangkut paut enggau pangan diri.Melaki bini tauka benung besulu pia mih ku peragam ati bala temuai bukai.

"Seredah aku nemu ga nuan jaku Iban," ku Ethan
nguji ngelimpangka jaku randau.

"Sigi nemu jaku Iban pan aku tu ari suba.Ehh..nuan
anang deka bejaku ngelimpangka aku,nama amai
ukai bini nuan indu nya tadi? Enti ukai bini...engka
ambai ga kini,enda pia ya??"

Lahung nyu tatuk,iya majak deka mansutka utai ti ngachau di dalam runding .Ati mega kelalu mayuh utai diperagam.Iya nangika Ethan nya semina deka nundi iya aja.
"Duduk dulu nuan,anang irau nih.Aku ukai laki
orang,ukai mega ambai orang.Agi single,"ku Ethan
lalu ngijapka mata sepiak.

"Eiih...kada nya amat,"ku Lahung enda pechaya.

"Aram ga tua ngelawa opis JPN kin enti nuan enda
pechaya.Enti iya nya amat bini tauka ambai aku
kapa aku ka masau jam mai nuan berandau
duduk ditu,"pia ku Ethan.

Pengudah ninga Ethan munyi nya Lahung pan lalu ngenudukka diri ba bangku betunga enggau Ethan.

"Nama berita nuan ? Dini nuan gawa diatu?"ku
Ethan ngepunka randau baru.

"Manah jak,gawa ba KL aku diatu."
"Ooo...lama udah?"

"Empai lama iga,baru beberapa bulan."
"Ooo..diatu nuan benung cuti mih?"

"Cuti mih tu,nya betunggal aku ti kawin tadi enda
tau enda datai ku iya."

Ethan tuchum puas ati meda Lahung ka dibai berandau.Nyu mayuh mih randau seduai iya Lahung.Enda berasai jam nginsit nyu pulai ga orang ti meda pengerami Paran.

Sulan ari jauh meratika Ethan berandau enggau Lahung.Nyu ngenyit chemburu asai ati.Lalu beguai iya nyingkang mansang ngelawa Ethan.

"Tan,aram pulai kitai...ni indai dih?"

Lahung terus nyeling Sulan maya ninga Sulan nyebut nama "indai".Sapa mih iya tu? Ketemu iya Ethan nya nadai menyadi.

Bai ati ti enda nyamai meda penatai Sulan, Lahung lalu ngangkatka diri.

"Ka mupuk dulu aku," ku Lahung madahka Ethan.
"Anang guai...meri aku numur nuan dulu," ku Ethan.

Seduai iya Lahung betukar numur talipun ba depan mata Sulan.Nyu angat-seangat asai ati Sulan dia.