Pagi hari Enam nya tumu Ethan dani.Regas endar pendiau iya.Enda sabar tudah deka nurun kem.
Bala nembiak ke enggau kem bela nganti bas ba padang sekula tetumu pagi.Ethan ke datai tumu nyu bebungai gaga ati meda bas ti ka ditepan sida endang sigi udah nganti ba padang sekula dia.

Sambil bejalai nuju ke padang Ethan lalu meratika bala nembiak ke sesegap ba padang dia.Mayuh diri nembiak bukai ke tumu agi datai ari iya.Mata Ethan terus engkining ari jauh ngiga Chumang.
Chumang indu ti semampai ngasuh ati iya rindu.
Ketegal Chumang mih Ethan ulih mansal diri enggau orang kem.Enti enda pia nyampau mih Ethan nya ka ngenataika diri.

Pemuas engkining iya pan tepedaka Chumang benung berandau enggau orang siku.Ethan bejalai makin damping sedamping ka datai di padang.

Pengudah datai di padang,iya nyu bebengap meda kaban iya Asun ke benung berandau enggau Chumang nya tadi.Ethan bekusuk mata,empai pechayaka utai ti dipeda iya.Chumang benung senyum lelinsum sambil lalu ketawa betunga enggau Asun dia.

Nama mih utai dikerandau seduai iya nya? Ku Ethan betanya ke dalam ati.Ethan datai lalu enda bemunyi.Iya enda nyapa Asun baka selama laban iya nemu Chumang sigi enda rinduka iya.Nemu ka nangi ga iya dih,enggai iya mansang ngelawa seduai nya ke benung rindang berandau.

Bisi setengah jam Ethan udah lelengu nganti nya baru semua nembiak datai magang.Asun pan nyu tepedaka Ethan duduk dedugau kediri.

"Eh..udah datai kaban aku.Ka ngerandau iya kin
dulu aku wai." kenu ku Asun madahka Chumang.

"Ni kaban nuan?" Ku Chumang betanya sambil
mata gegining.

"Nyin iya dedugau kediri din." Tunjuk jari Asun lalu
nunjukka Ethan.

"Oohh...nya kaban nuan pia?"Chumang ngaga diri
tekenyit meda orang ke ditunjukka Asun nya tadi
Ethan.

Nama mih Asun ka bekaban enggau orang bansa
nya? ku Chumang betanya ke dalam ati.

Chumang kebendar ya ukai nya enda nemu Asun bekaban rapat enggau Ethan.kulu kili seduai nya ke begulai.Tang mih Chumang rindu ngaga diri enda ngelala Ethan.

"Tan,lama nuan dah datai?"
"Bisi setengah jam udah."Ku Ethan nyaut.

Tang iya enda malik Asun maya bejaku.Mata iya benung merening nuju ke tengah padang kin.Nadai utai ga ditengah padang dia.Puang! Baka nya mih perening mata Ethan dia.Semina perening puang.

Meda Asun lama amat berandau enggau Chumang ngasuh ati iya nyu chemburu ga tadi.Nya ti ngujungka iya lalu lanjur diau diri aja.

Chukup jam nitihka udah dipelin sida pan lalu mupuk bekejang.Asun enggau Ethan berimbai duduk di dalam bas.Pejalai sida ngagai endur ti dituju deka ngambi timpuh pengelama dua jam.

Ethan duduk lalu mejamka mata ngaga diri tinduk.Iya enggai berandau enggau Asun.Ati iya berasai enda nyamai.Nyu majak ka chemburu!

Datai di Lambir,pengawa sida pan lalu berengkah.
Pengudah makai tengah hari sida bela mupuk nirika kimis.

Ethan enda beleman nirika kimis enggi iya.Laban jari iya ke lanchat.Sigi orang teleba gawa ke tanah.
Enda datai 5 minit udah bediri manah langkau kimis iya dia.

"Waah Ethan! Cepat juga khemah kamu siap."Ku
Lahung datai muji Ethan.

Endai! Bisi enggau gak indu mangah tu tadi.Nama asaika nadai aku meda iya nepan bas? Ku Ethan
betanya di dalam ati.Tudah Ethan enggai nyadi ka meda orang niki bas. Duduk mih iya di dalam bas tak lalu lanjur mejamka mata.

Ethan enda ngerandau Lahung.Laban endang sigi udah nadai mood ari tadi.Nadai dikeibuhka iya siku orang dia.Tak ngaga pengawa iya empu aja mih Ethan.

Lahung nyu memengih gamal dia.Meda Ethan enda kiruhka penatai iya,nyau ga Lahung mupuk meresa langkau kimis orang bukai.Baka pepulis nya mih iya meresa pengawa orang kin kia.

Enda berasai hari pan nyau malam.Ethan benung beradu deka pansut makai malam ba dewan.Tang iya orang ke paling dudi ke dewan.Laban iya ke alah enggau orang berebut mandi lemai tadi.
Bilik mandi ukai nya mayuh.Sapa dudi sigi laun mih.Ethan enda rindu enggau orang berebut.Enda nemu iya ngaga pengawa besegaut begulai bala mayuh.Nyamai ngalahka diri.Pia ku runding iya.

Datai Ethan ba mua pintu dewan iya lalu tepedaka Asun enggau Chumang bekunsi mija makai.Ethan pan terus nyurutka kaki enda nyadi tama ke dewan.

Maya Ethan ke surut ,bisi sepasang mata ga sempat meratika iya ari dalam dewan nya.Ethan nikal pulai ngagai langkau kimis.Perut endang lapar,tang iya enggai makai bekunsi mija begulai enggau Chumang seduai Asun.

Bisi mih mija bukai dia,tang nama ku runding Asun enti meda iya duduk ke mija bukai legi? Nya utai dipikirka Ethan.Nyu ngenangka seduai iya Asun ukai nya ka bejauh ari pangan diri ngelama tu.

Malam nya tembu siti atur pengawa ba studio bala nembiak bukai lalu lanjur betugung ba studio deka karaoke merindang ati.Ethan enda enggau orang, iya lalu pansut ari studio deka ngelawa tungkun api kayu ti enda jauh ari endur sida nirika kimis.

Di dalam studio nya tadi Chumang tak majak ngaul Asun.Ni enda ngasuh ati Ethan nyu majak chemburu.Ethan nudukka diri nunga tungkun api.

Ari jauh bisi sepasang mata majak meratika Ethan ari tadi.Jari iya migai kontina asi enggau lauk.
Juluk ati iya deka meri kontina nya ngagai Ethan,
kaki udah besedia deka nyingkang taja ati kakang serta rawan.Ya mih nyau ka datai semak Ethan iya beguai surut baru maya meda Asun datai duduk ngimbai Ethan lalu nyuaka siku nya siti kontina utai dempa.Asi begulai enggau lauk ke endang sigi digalauka Asun ke ungkup Ethan.

"Lapa ga nuan enda enggau kami makai ke dewan
tadi?" Ku Asun betanya.

Ethan enda nyaut tanya Asun,tang jari ya ka ga nyambut kontina ti disuaka Asun.Iya ngerebakka kontina lalu mupuk makai.Di dalam ati Ethan dia nyau bisi berasai besalah.Iya nemu diri empu enda patut ngelayan Asun baka nya.

Asun nya enda nemu diri ga tudah.Enda nemu diri ke didinding Ethan!

??
Hari ti berinsur malam majak enda berasai..

Benung Ethan seduai Asun dedugau nunga tungkun api kayu ,Chumang enggau Jessica datai kia lalu nudukka diri nunga seduai iya.Ethan pan mupuk berasai enda nyamai ati.

"Ditu endur nuan nih Asun,lapa seduai enda
enggau orang belagu ba studio?" Ku Chumang
ngepunka randau.

"Ukai nya nemu belagu kami duai Ethan tu."Ku
Asun nyaut sambil ngukir tuchum di mulut.

"Enti enda nemu belagu ninga orang belagu aja ga
kitai." Ku Jessica ga.

Ethan enda mansutka jaku seleka.Perening mata iya semina nuju ngagai tungkun api kayu nya aja.

Agi belala tudah Chumang ngerandau Asun ,sekali nyu ninga sura nyawa Lahung ngaga announcer.

"Pukul 10 semua pelajar mesti sudah masuk ke
dalam kemah.Jangan merayau di luar lagi!"Pia ku Lahung bejaku.

Iya bejalai sesegap ba sebelah endur sida nirika langkau kimis tadi.Deka meresa sapa ke agi reregap ba luar.

"Kamu orang jangan bekumpul di luar sini lagi.
Balik masuk kemah masing-masing!"Kenu ku
Lahung madahka sida empat ke benung dedugau
nunga tungkun api kayu dia.

Ka pan enda ngangkatka diri ga Chumang,sida bela nangi enti Lahung udah bejaku.Nadai siku orang berani ngelaban perintah iya.Sida empat bela angkat tama ke langkau kimis diri empu.

??

Pagi hari siti sida bisi ngaga atur pengawa deka bejalai niki bukit Lambir.Sida nembiak bejalai berbaris maya niki bukit,Asun seduai Chumang seretai ba baris muak ke depan din sekali.Bangat enggai jauh! Ku dalam ati Ethan muchau meda ulah seduai iku nya.

Ethan ba rintai baris numur dua muak ke ujung Lahung nangkan belakang iya.Ba jari kanan lahung bisi migai lunga mit siti,dikena iya nanda jalai.Ba jari kiri iya mincing beg aid kit,ari belakang Lahung bisi bala pengajar ngemataka pejalai sida.Taja bala sida pengajar nya agi dipeda mata,tang mih takah sida bejalai kelalu jauh ari bala nembiak.

Lahung bejalai sambil mansap dan kayu mit ke bisi dipansa iya.
"Tak payah tanda lah,tiap hari orang lalu pakai
jalan ni."Ku Ethan ngelara.

Lahung nyu tegepang ati dilara Ethan.Iya enda sedarka Ethan bisi meratika ulah iya.

"Sini saya bantu bawa aid kit tu."Ku Ethan bejaku
baru.Kasih iya meda Lahung nyu reribab bejalai,
ni ke ngema beg agi.

Ninga Ethan ti ka nulung iya lalu disuaka Lahung ga beg aid kit ti dibinching iya tadi.

"Terima kasih."ku Lahung.

"kamu jalan di depan ,saya di belakang."Kenu
ku Ethan ka nyadi gentleman kenu ku iya.

Tang Kebendar iya dia enda nyamai di tangkan orang indu maya bejalai.Lahung enda mantah peminta Ethan.Iya lalu ka bejalai ke depan Ethan.

Maya seduai iya beseliahka tubuh pangan,kaki Lahung nyu ngelinchir,tang jari Lahung sempat betarit ba baju Ethan.Laban ba endur nya tadi ga bukit ,seduai iya pan nyu sama bela labuh bebelat ke baruh kin.Lahung nyu nyerauh.

Sida nembiak ke bukai pan nyu begau.Bala pengajar lalu berumban ngabas nitih ke baruh ka ngelawa endur seduai iya ke labuh.

Datai di baruh Chigu Lina tekenyit meda kening Ethan nyu geguchur bedarah.Beg aid kit ke tepelanting enda jauh ari Lahung lalu dijengkau
Chigu Lina.Balat kening Ethan bedarah mesti dibalut jampat ku dalam ati Chigu Lina.

"Nama mih utai ti ngenelihka kening nuan tu?" Ku
Chigu Lina nanya Ethan.

Lahung keketap ati kesal meda darah ba kening Ethan,lunga ba jari Lahung mega bisi bebalut enggau darah.Maya seduai iya bebelat tadi lunga nya nyu nyayat kening Ethan.

"Cikgu,dia tekena pisau kecil saya ni tadi." Ku
Lahung lalu nantai lunga iya ngagai chigu Lina.

Chigu Lina semina ngilikka pala maya merening lunga Lahung.Iya lanjur bedemuh udah nya.

"Kamu tak apa ka Lahung?"
"Saya ok saja cikgu."

Jari Lahung nepas gari iya ke kamah bebalutka tanah enggau daun rangkai.

Di atas din, ninga orang begau ke Ethan labuh
Asun ke bejalai ba depan nyau nikal ke belakang lalu nitih ke baruh kin ngabas Ethan.Chigu Lina deka nganjung Ethan pulai ke langkau kimis sida,tang Asun lalu minta pemendar deka nganti Chigu Lina.Bala sida ke bukai nyau ngemajuka pejalai niki bukit.Lahung laban iya ke nadai pemedis maya labuh tadi lalu nyau mih iya enggau nembiak bukai neruska singkang.

Maya pejalai pulai ke langkau kimis, Asun lalu deka nulung Ethan ngema beg iya.Tang Ethan nguyaska jari Asun udu.

"Ehh ,enda ibuh!!" Ku Ethan.

Tekenyit Asun dikuyaska Ethan jari.Tang iya enda bemunyi ,dipajakka iya aja pejalai nguluka pejalai Ethan pulai.

Pemulai bala nembiak ari ke niki bukit nya sida lalu beradu deka ngererak langkau kimis.
Pengudah tembu betusunka perengka ti dikena, sida pan mupuk ka mulaika diri.Bas endang udah sedia nganti.Niki Ethan ke dalam bas meda Chumang duduk ngimbai Asun.

Nyu majak chemburu ga di dalam ati iya dia.Ethan mansa seduai iya lalu lanjur duduk ke penuduk belakang.Pejalai pulai sekali tu berasai panjai.
Mata enda ga ulih dipejamka Ethan.Iya enggai nyadi duduk jenuh.Kening telih bepedi,ati pan enggau bepedi mih!

Di dalam bas nya sepasang mata enda ngetu merati.Berasai kasih ngenatika Ethan.Meda kening Ethan bebalut ngasuh ati iya sinu agi.Sayau aku nadai pengering ati deka damping nuan maya tu. Kenu ku iya bejaku di dalam ati.

??

Urung pukul 4 lemai Ethan pan datai ba depan rumah iya.Berasai pedis isi bai duduk lama di dalam bas.Di rumah iya meda indai iya benung duduk dedugau ba luar.Ethan niki ke atas lalu nudukka diri ngimbai indai iya.

"Endai..lapa ga kening nuan bebalut jang?"
"Ehh..tegelincir tadi.Lalu labuh bebelat."Ku Ethan
nyaut.Enda ga iya madahka diri telih kena lunga
Lahung.

"Indai urut ke aku belakang aku tu,pedis isi bai
nepan bas."Ku Ethan bejaku baru.

"Ya nama ka ngasuh pedis isi nepan bas? Empai
kekari nuan tu agi biak nyu udah nemu pedis isi."

Ku Indai Ethan nimbal sambil jari iya ngurut belakang anak bujang iya.Enda kala tudah meda Ethan sebana lelak.Indah gawa ke kebun pan iya enda kala muchau lelak baka nya.Nya ukai nama kebendar ya ukai pedis isi.Tang pedis ati!

"kini ke apai dih indai? Lalu nadai meda iya."
"Nyau ke pasar meli lauk.Lama endar ga iya udah
nurun.Nyu ka malam hari empai ga pulai."Ku Indai
Ethan muchau.

"Engka apai bisi bejalai ke bukai kini."Ethan bejaku
lalu bebuka baju.Iya deka ngalika diri ningkap ba
lantai dia.

"Pandam-pandam nuan belakang aku tu indai."

Enda lama aja indai Ethan ke udah mandam belakang Ethan,nyu bisi temuai ga datai ngusung..

"Ooo..indai Ethan! Bisi dia nuan wai?"

Ku munyi sura nyawa indai Paran ngangau ari tengah laman rumah.

"Bisi wai...niki mih."Ku indai Ethan nyaut.

Indai Paran enggau anak dara iya Sulan lalu seretai niki ke rumah.

"Tu wai....lauk ikan keli dipansuh Sulan.Keli ulih
bubu apai Paran pagi tadi."Ku indai Paran nyuaka
kontina lauk.

Indai Ethan nyambut lauk ti disua lalu ka dianjung iya ka dapur.

"Duduk dulu wai,aku ka ngeluaika kitai ai kupi."
Kenu ku Indai Ethan.Lalu nyau mih iya angkat
tetanjun bejalai ke dapur.

"Endaii,lapa pala nuan Tan?" ku indai Paran
ngelara meda pala Ethan ke bebalut ngena kain
burak.

"Baik aku labuh maya kami niki Bukit di lambir
pagi tadi."Ku Ethan nyaut.

Tang iya agi gali ningkap.Bejaku pan enda malik mua indai Paran.Enda tentu lama udah nya Indai Ethan datai ari dapur minching kitil ai kupi.

"Tu ibo,kuih penyaram enda dibaik nuan tama
tadi."Kenu ku Sulan nyurungka kontina kuih ba
lantai.

Ethan ke benung ningkap bekalih angkat,
lalu berumban ngerasukka baju ti dibuka iya tadi.Nyu tekenyit iya ninga sura nyawa Sulan nya dia. Tadi semina nyangka Indai Paran aja ke datai.Enda nemu nya Sulan pan bisi ga enggau.
Sigi gaya pendiau Ethan,balat malu ke orang indu.

"Ke dempa kitai ngirup betunga ditu aja mih kuih
nya."Kenu ku Indai Ethan nyaut Sulan.

Ethan lalu nyingkau kuih penyaram.Empa iya siti abis,udah nya nyingkau baru ga iya.Enda berasai majak negam penegam.

"Nyamai amat kuih gaga nuan ibu."Kenu ku Ethan
bejaku merening indai Paran.

"Sulan ke ngaga nya tadi Tan,enti nuan agi belala
ila ngasuh iya ngagaka nuan baru."Ku Indai Paran
bejaku lalu tuchum sambil merening Sulan.

Pengudah ninga Indai Paran bejaku munyi nya Ethan lalu ngetu nyingkau kuih penyaram.Nyu lain ga asai ati iya ninga jaku indai Paran tadi.

"Dah kenyang aku ibo.Ditu mih kita betunga,aku ka
mandi dulu."Pia ku Ethan.Tang empai sempat iya
ngangkatka burit,sida empat nyu tekenyit ninga
sura nyawa apai Paran rerauh ari tengah laman.

"Ooo..indai Ethan,aku tu ka bepadah.Apai Ethan
kena lantak lori di jalai tadi,aram kitai ke sepital
kin ngabas iya." Ku apai Paran bejaku sambil
seseput ba tengah laman dia.

Indai Ethan ke di rumah nyu ngenyit sendat seput ninga berita ti dipadahka apai Paran.Sida sebuat pan berumban nurun ke sepital…