Kriiiingggggg!!!!!

Helen tedani ninga munyi luching jam.Peda iya jam ba tisi mija peninduk baru nunjukka pukul 7:00 pagi.
Digama iya dada nyu kekebak asai tungkul ati.Nama mih reti mimpi aku nya tadi? Sapa indu enggau Ethan nya? Mua indu nya enda terang dipeda iya.Tang mih mua Ethan nyengenda amat asaika nyata bisi enggau betunga mua.Dani pagi nyu kesal ngapa asai ati ketegal bemimpika utai baka nya.Mimpi rawan!

Sehari tu Helen nyau deka pulai peremisi ke menua nitihka apai enggau indai iya ke rumah panjai.Apai seduai indai iya lalu empai pulai pengudah ngerami hari gawai lebuh nya.Angkat Helen ari katil peninduk lalu mupuk mih iya besimpanka gari ke dalam beg.Tembu besimpan lalu mandi.

Maya ti benung beradu deka nurun, dia iya tekenangka randau seduai iya Ethan malam tadi.Helen lalu ngukir tuchum.Udah nya ingatka mimpi rawan iya tadi nyu kesal baru ga asai ati.

"Ethan baka ni mih aku ka berterus terang ngagai nuan? Tang nama guna aku beterus terangka pengasai ati tu? Ethan sigi dah bisi orang ngempu ga.Orang ti ngempu  ati Ethan diatu ya nya Lahung tauka indu ti nguan iya ba  sepital lebuh nya," ku Helen bejaku kediri.

Pengudahka bemimpi meda Ethan beberap enggau indu bukai di atas tilam nyau enda senang asai ati iya dia.

Haiiishhh…panjai seput disintak Helen.Nyau asaika putus pengarap.Patut tauka enda aku terus nganti baka tu? Ethan lalu enda kala sedarka pegerindu aku ke iya.
Ku Helen betelai di dalam ati.

Udah tembu beradu lalu mupuk mih Helen pulai ke rumah panjai.Di dalam kerita iya merindang diri enggau lagu 'Destiny'.

Di rumah Ethan ba menua.

"Indai..! Indai..! Ni nuan? Aku tu ka mandi," ku Ethan
rerauh.

Indai iya lalu ga nadai nyaut.Ethan  udah ngnti ba mua pintu bilik mandi.Tang iya enda ulih ngangkatka tubuh tama ke bilik mandi nya.Kerusi roda enda ga muat ka dibai tama ke dalam kia.Enda tentu lama iga Ethan tedingaka rejah kaki orang bejalai di bilik besai.

"Nuan ka mandi Tan?" Dinga iya munyi sura nyawa
Sulan nyapa.Ethan lalu malik ke belakang.Sulan benung mansang ngelawa iya kia.

"E..nn..ndaa…"ku Ethan.

Nyau iya mutarka kerusi roda  pulai ke bilik besai baru. Kini mih penunga indai tu? Ku Ethan muchau di dalam ati.Sulan terus  entudi Ethan.

"Nuan enda gawa sehari tu?"

"Enda."

Sulan lalu duduk meremi nunga kaki Ethan.Diurut-urut iya betis Ethan.Ethan semina ngelakka aja.

"Nuan enggai nguji bejalai ngena (cruthes) tungkat
kaki,"ku Sulan betanya.

Enti ulih enggai iya meda Ethan kelalu lama ngena kerusi roda nya.Iya ka meda Ethan bejalai baka selama enggau lengkas.

"Ka ga.Enti selalu sesais bejalai ngena tungkat engka ulih jampat  agi kaki aku gerai," ku  Ethan.

"Enti pia..aku nulung meli ke nuan tungkat diatu,"ku
Sulan.

Lalu nyau Sulan angkat tekala nya.Enda tentu lama pengudah Sulan pansut ari rumah nya indai Ethan pan tama ke bilik.

"Kini nuan tadi indai?"

"Nengkani manuk aku tadi Jang."

"Ka mandi aku indai, nulung aku dulu nuan."

"Endai, lapa nuan enda minta tulung Sulan nya tadi?"

"Ehh…nadai aku ka!"

"Malu ke Sulan nuan pia Jang?"

"Ehh mayuh utai tanya ga nuan, enggai- enggai aku
diintu Sulan mandi,"ku Ethan nyaut enggau kening
ngeredut.

"Tak ambika bini sekali Sulan nya.Enda nuan malu agi."

"Neii...mimit-mimit ngasuh ambika bini."

"Kati ku dih, suba nuan ga kala bedanji ka ngambi Sulan  nyadi menantu aku."

Diatu nyu indai Ethan ga ngeredutka kening.Ba mata iya Sulan mih indu ti nadai penimpang sekali.Bisi sejam pengudah nya Ethan enggau indai iya ninga sida apai Paran di rumah sepiak begau.Lalu nyau indai Ethan ngesah kin.

"Nama utai dikemegauka kita wai?"

"Bisi orang betalipun madahka Sulan luput di pasar
tadi.Ka ngesah iya kin kami,"ku apai Paran.

"Apuuu....kasih amai ga Sulan nama mih utai ngacau iya  sampai nyu luput,"ku indai Ethan sambil  bepurus dada  bai ati kesal.

Ka iya ngau sida ngesah ke  pasar kerita sida nya sebilik nyu penuh.Sida Paran sebilik  sampal nurun ke pasar. Indai Ethan nyau ga mulaika diri ke rumah iya empu.

"Nama utai dikemegauka sida apai Paran nya indai?"

"Sulan luput di pasar din,"Indai Ethan nyaut enggau
tapak jari ti agi mengkang murus dada bai ati ti empai  ngetu kesal.

Ethan lalu tegenung enda bemunyi dia.Indai Ethan nya ingin amai asai ati iya ka ngesah Sulan kin.Tang iya nadai daya.Ethan enggai ga nyadi nganjung iya.

??

Seminggu pengudah nya.
Di rumah apai Paran.

Lama Sulan tegenung di bilik peninduk iya.Pengudah ti luput sehari nya iya lalu ditan ba sepital sepengelama seminggu.Lutur mega madahka iya bisi penyakit kanser tulang.Petang dunya Sulan maya nemu diri bisi kanser.

Di bilik iya merening ke tisi katil peninduk meratika tungkat ti dibeli iya ka Ethan lebuh nya.Berasai sinu asai ati iya meda tungkat nya.Nyu seminggu iya udah enda ngabas Ethan, iya empu ga nyau enda dapat dia.Nama enda berita nuan diatu Ethan? Ku Sulan betanya di dalam ati.

Sulan mansal diri angkat ari  katil peninduk.Iya bejalai begadai-gadai pansut ari bilik ngemai tungkat ti dibeli iya ke Ethan.Pansut ari rumah lalu nyau iya nyingkangka kaki ngelawa rumah Ethan.

"Apuu Endu, lapa ga nuan kediri bejalai kitu? Ya ga nuan  nya enda dapat,"ku indai Ethan ngelara.

Ethan ti meda penatai Sulan kia semina diau diri aja.Iya endang lubah deka  nyapa Sulan dulu.Sigi ari suba Ethan ti baka nya.

"Tan, tu tungkat kena nuan.Nguji bejalai ngena tungkat nuan dah tu,"ku Sulan.Tungkat lalu disuaka iya ngagai Ethan.

"Ngiruh diri amat ga nuan tu endu,"ku indai Ethan.

Enggai endar indai Ethan meda Sulan kelalu ngandaika Ethan.Laban iya nemu anak bujang iya nya sigi nadai ati sekali ngagai Sulan.Sinu ati iya ngenangka Sulan ti  betempik sepiak jari.Ethan nya bangat enda alah dipansal jadi enggau Sulan ga.Tang mih jauh ba sukut ati indai Ethan iya sigi deka terus nguji ngumbuk Ethan jadi enggau Sulan.

Maya hari nyu bekalih malam Ethan enggau indai iya dedunga aja ba bilik besai meda TV serayaka nganti mata ti deka tinduk.

"Jang, nemu nuan Sulan sakit kanser tulang?"

"Hahh??"

Nyu tekenyit Ethan ninga utai dipadahka indai iya nya tadi.Kasih amai mih Sulan ,bangat jaik  endar ga nasit iya.Ku Ethan betelai di dalam ati.Diperening Ethan ga tungkat ti diberi Sulan tadi, enda berasai nyau seilu-ilu ga asai ati iya ngenang pemanah Sulan ngelama tu.