Ethan Wong, tauka Ethan anak Wong benung ninjau mua ba cheremin. Jari kanan iya ngusap buk ngena kain tula bechura oren. Ethan ngembuan mata chipit laban iya anak penakan Cina Iban.

Anak mata iya bechura pirang, idung iya mega manchung. Kulit iya chelum laban selalu gawa ke tanah ngelaban panas. Gamal Ethan sigi sigat enti iya deka ngintu pendiau diri manah-manah. Tang mih iya bansa nembiak ti enggai kiruh nyaga 'penampilan'.

Tembu ngusap tubuh diri, iya lalu ngerasukka gari sekula, jam kasio di tisi peninduk dirasuk ke ba dekuan jari, lengan Ethan mega mayuh bekau rajai bai iya suah gawa ke kebun sawit.

Udah begari iya lalu pansut ari bilik peninduk mansal diri nurun sekula.Mua agi lembau, buk enda disugu,baju enda di 'tuck in'.

Ethan bejalai nuju ke dapur deka ngirup pagi sebedau ke nurun ngagai sekula.Iya lalu tedinga ke randau apai enggau indai iya di dapur.

"Tusah ati aku meda jang nya nadai kala regas enti nurun sekula,ulih ngerak belama tetiap kali dani pagi." Ku indai Ethan muchau ke ulah anak bujan king iya ba mua laki.

"Nya mih wai,irau aku meda ya ga taun siti iya deka ngambik peresa SPM,kada meh anak tua nya ulih mujur baka anak orang bukai," ku saut Apai Ethan.Ninting pagi bini iya ke sebana munyi nya,tang apai Ethan enda leju mendingka sebana bini iya.Enti ukai iya sapa agi ke deka endur Indai Ethan sebana?

"Nya mih aku enggai sekula agi,seduai majak gak mansal aku nurun sekula,berapa taun udah sekula enda mih aku tu pandai,manah gi aku nulung seduai bekebun sawit aja." Ethan nimbal randau apai enggau indai iya.Ethan tama ke dapur lalu nudukka diri ngimbai apai iya , cucur temedak ke baru udah mansau diengkah ba atas mija makai dijengkau iya.

Apai iya ngilikka pala ninga Ethan madahka diri enggai sekula agi.Enda ulih dipansal Ethan tu,tang mekang endar enti iya ka badu diatu,chukup manah mih enti iya ulih ngapuska sekula naka pom 5.Ku ati apai Ethan betelai.

"Ehh..! Jampat endar ga nuan mandi ,bisi besabun nuan tadi jang??" Indai Ethan tekenyit meda anak iya udah bebaju sekula manah benung duduk ngirup.Tak asaika baru tadi iya ke ngerak Ethan dani,kada datai seminit Ehtan ke mandi.

Ethan enda nyaut indai iya.Nama ka beleman mandi asal udah betanjah serta merus ngeli ya meh nya ku dalam ati iya.

"Peda baju nuan nya jang,uji adu memanah gi keh,buk nya sugu dulu legi,rugi apai nuan meli sugu enda dikena." Indai Ethan muchau baru.

Apai seduai indai Ethan sigi enda kala putus pengarap deka ngumbuk Ethan besekula.Seduai semampai besampi ngarapka Ethan ulih mujur baka nembiak bukai.Seduai iya semina bisi siku Ethan aja ke diandal ngubah pengidup sida sebilik.Taja pengawa bekebun sawit sigi ulih ngemujurka pengidup,tang seduai iya ka Ethan mujur dalam pelajar baka anak orang bukai mega.

Gawa ke tanah Ethan sigi bagas,chukup rajin iya mantu apai indai iya gawa bekebun.Apai enggau indai Ethan jauh udah tuai ,umur seduai nyau deka manggai 50 lebih taun.Ethan baru berumur 16 taun.Agi jauh pejalai ti deka ditujah iya udah tu.Apai Ethan mega anak penakan Cina Iban,ini Ethan ke ngadaka apai iya baru Cina chulin.

"Mupuk dulu aku indai ,apai."Ethan ngangkatka burit diri ari bangku.

"Jimat keh jang,maya bejalai peda kerita ke mansa ari kiba kanan." Ku apai Ethan mekat anak bujang iya.

Sekula Ethan enda jauh ari rumah.Enti laju pejalai kaki kira ke 10 minit pia nyu datai mih ba sekula.Ethan sigi rindu gi bedarat,beraban bebelala mayuh seretai enggau sida serumah nurun ke sekula.

Ba pala tangga benung Ethan ngerasukka kasut datai ga Paran enggau manyadi indu iya Sulan mansa.Paran lalu mai Ethan seretai nurun.

Rumah Paran enggau Ethan semina 10 singkang kaki aja penyauh.Paran serambau enggau Ethan tang seduai enda sama kelas.Di sekula jarang begulai,semina begulai lebuh maya di rumah aja laban ke berimbai.

Sulan biak setaun ari Paran,menyadi indu ti chukup dikesayauka serta diasi ke sida sebilik.Nya mih Sulan nyu kelalu gemuk,laban diandai belama.Nama aja utai ka diempa sigi dibelika magang.Makai chukup bagas,iya nadai nemu nagang nyawa,tubuh nyu baka ke disepu.Tau disemaka baka tong drum pemesai tubuh Sulan.Ya ga iya pandak,pemurak jelan ya.Buk Sulan bisi begeretang mimit,iya mega bekenaka cheremin mata.

Sida tiga lalu seretai bejalai,sambil bejalai Paran enggau Ethan nadai ngetu berandau.Sulan aja mih ke enda bemunyi.Malu ke Ethan.Taja berimbai rumah tang iya enda kala berandau enggau Ethan.

Sida tiga bejalai belubah-lubah.Embun pagi nya enda tentu balat.Taja pia isi sida tiga tetap berasai chelap laban demalam ke bisi ujan.Ari simpang rumah sida nengah jalai mit,jalai bebatu ,tunga ke kiba jalai nya mayuh rumah orang.Sepiak kanan jalai nya paya magang alai selalu endur sida serumah bumai paya.

Sida Ethan serumah dia enda berumah panjai laban mayuh ngaga rumah kediri.Keterubah suba sida kala berumah panjai tang udah kena penusah angus sida serumah lalu ngaga pemutus deka ngentak rumah kediri magang.Tang sida enda jauh ngentak ,agi ga berumah berimbai semak enggau pangan diri mina ke enda betampung atap agi.

500 meter udah penyauh sida tiga bedarat nengah jalai mit, nya baru sida pansut ke jalai besai.Enda berasai nyu datai gak di sekula.Di pagar sekula Lahung Livan meratika Ethan ari atas kebaruh.
Perening mata iya chukup tajam.

"Ethan !!! Kenapa kamu ni tidak pernah kemas turun sekolah? Sila tuck in baju kamu.Rambut kamu kalau masih tak kemas,besok saya tolong kamu gunting rambut!" Pia ku Lahung merak Ethan.

"Lagi satu Ethan,kamu tahu ka saya sudah bosan tulis nama kamu disini." Lahung nulis nama Ethan ba siti bup.Bup nya legi sigi dianjung ngagai Bilik Kaunseling.

Ethan enda engekeretik ninga Lahung nganu iya.
Ukai iya takut.Tang iya bebasaka Lahung.Dalam ati Ethan sigi enggai mih iya meda Lahung.
Ngemangah nya ga Lahung meda diri ke nyadi ketuai pengawas ba sekula nya.

"Tak asaika aku tu belama kena kangau ke indu tu ba depan pagar ditu." Ethan muchau dalam ati.Iya lalu nyeling Paran,nadai ga Paran bangat kemas iga,kurang lebih buk Paran enggau iya.Bela begerusu.Chara Paran bepakayan aja mih kemas gi.

Ethan malik ngagai Lahung baru.Ngelengak iya merening Lahung.Laban Lahung kelalu tinggi ari iya.Ethan semina naka lengan Lahung aja peninggi.Lahung Livan nembiak indu tik chukup terit lebuh bejalaika tanggung pengawa iya.Lahung indu bansa kayan ti chukup bajik,ba sekula nya tak iya ke paling bajik.Bulu mata ngelentik ,anak mata iya bechurak pirang ,pejalai iya ayun lundai,
kuyu pelu-pelu mua iya ga lis amat,pemurak iya nyu baka kapas.Pemajik Lahung sigi nadai enda ngasuh ati lelaki tekait ti meda iya.Tang ketegal pemangah iya nya, nyu nadai siku ga orang laki berani deka nguntik iya.

Datai Ethan ke dalam kelas iya lalu berumban nudukka diri di sepiak Asun.

"Asun,udah tembu kerja sekula ke diasuh Chigu Selemah gaga kemari?" Ku Ethan betanya ngagai
Asun.

Asun kaban paling rapat enggau Ethan ba sekula.Asun betubuh gemu,bekulit burak,buk iya guntin beteracak baka duri rian.Kulu kili seduai iya sigi begulai.Tang ba pelajar seduai iya bangat jauh bida enggau pangan diri.Asun nembiak tik chukup pintar dalam pelajar.Tang laban iya enda mujur subjek Bahasa Melayu ba pemutus peresa PMR suba nya ti ngujungka iya enda ulih tama kelas aliran Sains.

Ba pengawa belajar Ethan semina rinduka siti subjek aja,ya nya Matematik.Ba subjek Matematik seduai iya Asun bela pintar.Selalu betangkan markah seduai ,enti enda Asun tinggi markah,Ethan ga ke tinggi markah ke sida sekelas.Nya aja meh mata pelajar ke dikerinduka Ethan.Senang ku Ethan laban semina bemain enggau numur aja.

"Udah tembu mih engku,kati gaya enggi nuan dih Tan?" Ku Asun betanya.

"Eh,empai nge aku tu.Nya aku ka meda nge nuan."Rerinyik Ethan malik Asun.

Ethan sigi liat deka ngaga kerja sekula ,Asun nya belama mih endur ya ngupi .Ninting hari mih iya baka nya.Semina subjek matematik aja iya enda kala ngupi enggi Asun.Asun enda ga kala enggai dikupi Ethan kerja sekula.Semadi maya sida peresa mih Ethan enggai nyadi ngupi.Nya mih pemutus peresa jarai manah, C D E nya grade ke selalu diulih Ethan.

Udah tembu ngupi kerja sekula Asun,Ethan nganjung bup kerja sekula seduai iya ngagai Chigu Selemah ba Bilik Pengajar.Maya ngelawa Bilik Pengajar, Ethan bepansa enggau Chumang.Lalu keketap asai anak ati iya meda Chumang.Ethan endang sigi lama udah nyimpan ati rindu ngagai Chumang,
seduai iya serambau tang mih enda sekelas.Chumang ba kelas 4A( Aliran Sains) ,Ethan ba kelas 4G.Kelas sida ba sekula nya ga dibagi nitihka pemandai.Nembiak ke ba kelas A datai ke ngagai kelas C sigi nembiak pepandai magang mih di dalam nya.

Chumang enti bepansa enggau Ethan lalu melintuk mih mata iya.

"Manah pan gamal kitai enti nadai pemandai sekula nadai mih guna."Jaku ti semampai dipegai Chumang ba dalam pengidup iya.

Chumang indu ti chukup ngemeranka pelajar ba sekula.Laban ba iya pemandai ti diulih ba sekula nya chukup penting dikena ngidupka diri dudi hari ila.Chumang nembiak ti pintar dalam semua subjek ba sekula.Iya mega nembiak ti dikerinduka semua pengajar ba sekula nya.Chumang jelan ya pemajik,
bekulit itam manis,enti iya senyum ayan ga lubang pemula ba kuyu.Nya ti ngasuh Ethan angau belama ke iya .Tang Chumang nadai kala kiruh ke Ethan.Ba mata Chumang ,Ethan nembiak ti kelalu nadai pendiau,ya ga nadai pemandai.Tak nadai endur iya deka ngaitka ati lelaki baka Ethan nya.

Chumang malik kebukai ngaga diri enda meda Ethan lebuh seduai ke bepansa.Ethan nyu ka salah singkang kaki tudah baik kelalu bendar ka merening Chumang ke mansa iya.

"Naka mih pemajik nuan Chumang. "Ethan bejaku dalam ati muji Chumang.

Asaika aku achuk leka mata Ethan, baka ke enda kala meda orang indu.Chumang muchau dalam ati.Iya melintuka Ethan baru.Udah nya iya lalu ngelajuka singkang kaki bejalai mansa Ethan.

Ethan udah teleba dipelintukka Chumang.Taja Chumang enggai ibuhka iya tang ati Ethan tetap keran ke Chumang.Kenyau ari sida pom 1 iya udah labuh pengerindu ngagai Chumang.Tang sayau iya enda berani beterus terang....