Di KSKB Kuching.
Tama ke dalam bilik Sulan lalu begigaka talipun iya.Talipun endang agi meruan di atas mija belajar.Sigi amat mih peragam ati iya tadi,talipun enda ingat dibai maya pansut bejalai.Talipun terus dijingkau Sulan, ba skrin mandangka bisi 32 iti missed call ari Ethan enggau SMS madahka diri benung nganti di taman.

Nyu keketap kesal ati Sulan meda Ethan suah betalipaun selemai-lemai tu.Diatu nyu tusut runding iya mikirka baka ni deka madahka Ethan kebuah iya ti enda ulih datai ke taman tadi.

Di UiTM Kota Samarahan.

Naka pemdis ati Ethan diatu.Benung telih bepedi nya dia.Nadai reti lalu pengawa ti digaga iya sehari tu. Masau hari enggau duit.Nama penyadi ? Bepakaika mi maggie aja mih udah tu.Kengka belanja ti agi tinggal nyu abis dikena mayar tambang teksi tadi.Ya ga udah dikemulaka Sulan.

Ingin asai Ethan ka nyerauh dia ngenang nasit diri tang nangika nyu dikumbai orang gila.Agus ti benung tinduk bisi ari tedani mih.Ethan ngalika diri ba tilam peninduk,mata iya enggai nyadi dibai lelap.Pejam enchelak aja ari tadi.Benung iya tegenung talipun ba atas mija bemunyi nandaka bisi SMS datai.Ethan empai ka angkat ngambi talipun.Entara dua asai ati iya ka macha SMS ti datai nya.Bisi sepengelama 5 minit pia angkat ga Ethan ari tilam lalu nyengkau talipun.SMS ba talipun lalu dibacha iya.

Sulan?? TAN AKU MINTA AMPUN LABAN ENDA

ULIH DATAI LEMAI TADI,ENDA MUKAI²

WARDEN KAMI ENDA NGASUH PANSUT

ARI KOLEJ SEHARI TU,LABAN BISI

NGAGA SPOT CHEK ARI BILIK KE

BILIK.KAMI TADI ENDA DIASUH DIAU

DALAM BILIK MAYA SIDA KA MERESA

BILIK NYA.TALIPUN AKU ENDA INGAT

DIBAI PANSUT MENGKANG TINGGAL BA

DALAM BILIK,ENTI SIDA WARDEN EMPAI

TEMBU KAMI SIGI ENDA DIKEMENDARKA

TAMA KE BILIK.NYAU MALAM BARU SIDA

TEMBU.

Pengudah macha SMS ari Sulan,Ethan nyu enda nemu agi nama pengasai ba dalam ati iya maya tu.Tang sigi nyengala puang,chukup berasai puang.

Baka tu asai ya ti kitai nemu diri nyengenda dikemulaka orang ku Ethan betelai di dalam ati.
SMS ari Sulan lanjur enda dibalas iya.Malam nya mega Ethan mutus ati deka muai Sulan ari pengidup iya.Nambah mega Sulan nyu sigi udah jauh endar berubah,Sulan ke diatu ukai Sulan ke suba agi.Badu aku ngenang nuan agi Sulan! Ku Ethan ngaga pemutus.

??

Hari beganti,bulan beganti,taun pan beganti.
Genap 4 taun Ethan pan tembu nampung pelajar.Pia mega Sulan,tang sulan dulu tembu setaun ari Ethan.Sulan mega udah bulih pengawa di klinik damping enggau menua sida iya empu.

Malam di rumah Ethan.

"Enda berasai 6 taun pengelama nuan diau di
Kuching nyau tembu ga nuan belajar,asaika
kemari nuan ke mupuk kin," kenu ku indai Ethan.

Naka pengaga asai ati indai Ethan meda anak iya udah tembu nampung pelajar.

"Nya mih pejam enchelak ukai nya berasai," ku
Ethan nyaut indai iya.

Seraya ke berandau enggau indai iya jari Ethan enda ngetu betusunka keresa ti dibai iya pulai kemari.Ethan dia mega chukup berasai lantang ati pengudah bisi ngembuan diploma enggau degree.

Pemuas ti bebantaika keresa ari dalam kutak, Ethan mega lalu mantaika sekepin pail .Di dalam pail nya bisi resume ti udah disediaka Ethan ka dikena iya minta pengawa ke menua Bintulu pagila.

Enggai iya jauh endar ngiga pengawa,menua Bintulu nya damping enggau menua sida kira nyamai endur iya ka pulai ngundang indai iya ila.

"Indai,pagi pagila tumu aku ke Bintulu,"kenu ku
Ethan.

"Lalu empai belelak endar nuan Jang,enggai enda
pagila ga nuan ke Bintulu."

"Kati dih indai, jampat gi resume tu dianjung
nyamai gi ga ati aku.Begi ukai nya jauh,ngichaka
tumu agi ga aku bulih pengawa ila,"ku Ethan
nyaut.

Indai Ethan enda bemunyi agi,iya nemu Ethan beguai ka gawa.Anak bujang iya nya sigi ukai bansa ka diau jenuh di rumah.

Malam nya maya jam di dinding udah mangkung pukul 10 malam pan Ethan agi kiruh betusunka keresa iya ti dibai pulai ari Kuching.Betusunka bup ba dalam bilik mega.Mayuh bup lama maya sekula pom suba deka ditaruh ke dalam kutak,lalu ka diganti endur tusun enggau bup ti dikena belajar di Kuching suba.

Benung Ethan bepilihka bup sekula pom, dia iya tepedaka siti bup ti lain karung kulit ari bup bukai,bup nya ukai bup belajar.

"Heaven Is So Real"

Bup ti diberi Asun.Ku Ethan bejaku di dalam ati.Bup nya lalu empai kala dibaca iya,bup pemeri ari Asun sepengudah niang apai Ethan nadai suba.

"Ermm...legi aku macha bup tu." ku Ethan bejaku
kediri.

Iya mai bup nya pansut ke luar ari bilik peninduk lalu di engkah ba atas mija kupi bilik besai sida.
Udah nya Ethan bejalai ke dapur,duduk di dapur sambil ngirup ai kupi.Berasai sunyi di rumah maya hari udah jauh malam.Indai iya jaga udah tinduk.

Benung Ethan dedugau ,dia iya ninga munyi hon kerita datai ari tengah laman sida.Ethan angkat nyengau ke luar ari mua pintu.Ba tengah laman iya meda sebuah kerita Triton.Orang ti pansut ari dalam kerita nya endang chukup dikelala iya.

Ethan terus ngelaluka Asun niki.Pengudah tama ke rumah, enda engkesap mata Asun meratika Ethan nyu ka ngumbai diri salah rumah mih iya.Ethan ti di depan mata iya diatu jauh amai udah berubah.

"Amai nuan tu Ethan? Nyu sigat amat nuan diatu,"
ku Asun ketawa muji Ethan.Ba mata iya Ethan
diatu kelalu jauh bida enggau Ethan ti beumur 16
taun suba.

"Sigi ari suba aku tu sigat,tang rindu ngayahka
pendiau diri," ku Ethan nimbal Asun lalu ketawa.

"Ha..ha...ha.." Asun ketawa baru ninga saut Ethan.

"Kati nuan nemu aku bisi ditu?" ku Ethan betanya.

"Ehh,kemari aku meda nuan datai.Aku tu ngajar ba
Sekula Kebangsaan ke damping simpang ka tama
kitu,tang kemari mayuh amai pengawa nya aku
enda sempat datai kitu,tu tadi mayuh mih
pengawa aku.Nya mih aku tu laun datai,"ku Asun
nyaut.

"Ouuhh,nadai ngawa nya.Ni barang maya nuan ka kitu,kitu aja mih ila kada aku ke agi ditu,"

"Ya ka kini agi nuan? Empai puas belelang pia?"

"Ka minta pengawa ke Bintulu kin aku pagila ,enti
nyema bulih lalu diau din mih aku tu ila."

"Nadai jauh nya Tan,setengah jam ari kitai ditu dah
datai di Bintulu,Chumang ba Bintulu din meh
ngajar."

Berasai begetar mimit di dalam ati Ethan ninga Asun nyebut nama Chumang.Ishh! Ngingatka Chumang nya sulu Asun lalu beguai Ethan muai asai ati ti ka nyeligau dia.

"Kemaya seduai ka jadi?" ku Ethan betanya.

"Taun siti,"ku Asun nyaut.

"Ouuhh...manah mih nya,anang kelalu lama
besulu.Asun,ditu dulu nuan.Aku ka ngambi ai kupi
ke dapur," kenu ku Ethan.

Asun duduk nganti di bilik besai.Benung dedugau mata iya tepedaka siti bup ba atas mija.Asun terus nyengkau bup nya, disilakka iya ngapa aja rambar bup ti dijengkau tadi.Datai Ethan ari dapur lalu meda Asun benung megai bup nya.

"Empai bacha aku bup beri nuan nya."

Pengudah ninga Ethan madahka bup nya pemeri ari iya lalu ngeredut kening Asun malik ngagai Ethan.

"Kemaya mih aku meri nuan bup baka tu Tan?"
ku Asun sambil ketawa.

"Endai! Ukai nuan meri pia?"

"Ukai arrr,ya dini nuan bulih bup tu deh?"