6 bulan pengudah nya.
Di Opis Posim Petroleum.

"Morning bos, selamat datai gawa baru,"ku Helen nyapa.

Panjai garis tuchum di mulut Helen pagi tu.6 bulan pengelama udah ngetatka pengelengau ati enda meda mua Ethan.

"Selamat pagi my secretary,"ku Ethan.

Ba jari Ethan bisi bungai ros mirah.Bungai lalu disua iya ngagai Helen.Helen nyu bebengap, bungai enda terus di sambut.Mimpi tauka nyata utai tu? Ku Helen sempat betanya di dalam ati.

"Enggai nuan nerima? Rugi aku meli bungai tu tadi ti
pia,"ku Ethan lalu mantaika mua asa.

"Eh..eh.. sapa enggai ke bungai tetumu pagi baka
tu?  Beri kitu keh,"ku Helen.

Dikelarika Ethan ngagai jari kiri iya bungai nya tadi, maya Helen benung ka nyingkau, dipindahka  Ethan ngagai jari kanan iya baru ga bungai.Lalu ketawa mih iya
laban bulih nundi Helen.

"Hurmmm....enggai meri enda ga,"ku Helen.

Jingkau Ethan jari Helen lalu disuaka iya bungai rose mirah nya tadi.Helen pan lalu tuchum manis udah nya.Tang di dalam ati Helen din nyu begetar asai dipegai Ethan ba jari taja enda lama.

Tama Ethan ke dalam opis lalu tepedaka bungai rose bechura urin ba mija gawa iya.Bungai diingkau , disium penapat.Nyinuk amat mih iya nyium bau rengut bungai nya.Nambah ga nya sigi tak bungai fresh.

Helen ba luar meratika Ethan ari dinding cheremin seduai iya nya.Benung iya rindang merati, dia dih Ethan merening ngenyit ngagai iya kia.Mata seduai iya betemu, Ethan lalu senyum.Jari iya nunjukka ngagai bungai rose urin ti benung dipegai, udah nya  iya lalu mantaika tunjuk jari ?? ngagai Helen.Helen tuchum, naka pengaga mih di dalam ati iya dia.

Di rumah Ethan di menua.

"Indai, padah ngagai Ethan aku beamat-amat ka jadi
enggau iya.Biar enda lama, nitihka pengelama taka
seput aku ke  agi bisi tu udah chukup mih ba aku."

"Endu, aku ukai enggai nulung nuan.Tang Ethan nya
ulih dipansal aku nerima nuan."

Nyu sesedan ga Sulan nyabak ninga saut indai Ethan munyi nya.Sinu ukai enda sinu mih indai Ethan ngenatika Sulan.Tang iya empu pan nadai daya baka ni jalai ka nulung Sulan.Puas iya ngumbuk Ethan ngelama tu tang ati Ethan bangat liat amat.

"Aram tua ke Bintulu kin aku empu ka madahka
iya.Aku  ka ngumbuk iya nerima aku,"ku
Sulan.Sambil bejaku ai  mata iya mega enda ngetu
beterunjui naya.

"Au mih, kin ga tua," ku indai Ethan.

Panjai  seput disintak indai Ethan ninga peminta Sulan.Iya nemu penatai seduai iya kin legi pan sigi ngasuh ati Sulan makin asa.Tang ketegal kasih iya sanggup nyenurutka aja utai ku Sulan.

Di Bintulu.
Parkcity Residence.

Pulai Ethan gawa lemai nya  meda indai iya enggau Sulan benung duduk dedugau berandau ba bangku bilik besai.

"Lama seduai udah datai?" ku Ethan betanya.

"Tengah hari tadi,"ku indai iya nyaut.

Sulan ti meda Ethan udah datai lalu mansang ngelawa Ethan.Iya terus duduk besugang  nunga kaki Ethan.Diberap iya kaki Ethan enggau sesabak.

"Tan, ambi aku ke bini nuan, nya aja peminta aku
kepenudi.Nadai aku minta utai ba nuan agi udah
tu,"ku Sulan.

Ethan nyu bebengap tegepang ati meda ulah Sulan. Berumban iya ngasuh Sulan angkat,  enggai meda Sulan duduk besugang baka nya.Nyu makin rujut amat ga Sulan.Berasai sinu ati iya meda.

Sulan dibai Ethan duduk ke bangku baru.Ai mata Sulan
dikendas iya enggau tapak jari.Sinu chukup sinu mih iya meda Sulan sakit baka nya.Tang bakani ku enggau ati iya empu dih? Iya endang sigi nadai ati ka ke Sulan agi. Pintu ati Ethan sigi udah ditambit iya rat.Enggai iya nanggam pengerindu enggau sesapa agi.Dua kali udah jelungan, ingatka Sulan suba udah kala beduan iya, Lahung pan baka nya mega.

Maya ngingatka Lahung, Ethan pan nyu berunding lalu nanya dirimpu.Iya labuh pengerindu ngagai Lahung suba ari ati tauka ari mata? (MV: Kitai enti meda orang sigat tauka bajik anang lalu beguai labuh pengerindu.Kelala dulu mih budi basa iya, tasat dulu pendiau iya.Enggaika kitai nesal dudi ari ila).

Ethan nyintak seput dedalam.Iya sedar pengerindu ke Lahung suba semina ari mata.Iya labuh pengerindu ketegal pemajik Lahung.Ukai labuh pengerindu ari ati.Diperening Ethan ga Sulan, suba endang amat iya kala rinduka Sulan enggau pengabis ati.Tang mih semua nya semina tinggal pengingat aja.

"Sulan, aku ulih meri nama aja utai kedeka nuan,
tang  aku enda ulih nyanggup ngambi nuan ke
bini.Aku  enggai nipu ati  aku, aku mega enggai
nipu nuan."

Makin laju ga ai mata Sulan beterunjui naya  ninga jaku Ethan munyi nya.

"Sekejap pan enggai ga nuan nyadi laki aku?" ku
Sulan.

Ethan nelan ai liur ti lekat ba batang rekung.Udah nya belubah-lubah iya ngilikka pala.

Sulan majak sesedan nyabak.Kedua iti jari Ethan digenggam iya rat.Enda ga Ethan ngiarka jari Sulan ketegal ti ka nyaga ati Sulan.Iya nemu umur Sulan sigi enda panjai.Tang mih peminta Sulan nya tadi nyu kelalu ngeluie adan.

Sulan Empai putus pengarap majak deka ngumbuk Ethan.Di dalam ati iya chukup  nesal enti ingatka ulah lama iya suba.Enti iya enda beduan Ethan suba, udah jaga sepa mih iya nyadi bini Ethan.( MV: kitai enti udah nemu orang nya amai sayauka kitai enggau pengabis ati iya, anang sesekali mih kitai beduan iya.Nyema iya udah ngelengkaka kitai  ketegal iya udah jera enggau ulah kitai sigi nadai jalai iya ka nikal pulai ngagai kitai agi.)

Di Kuala Lumpur.
Rumah Lahung.

Lahung tegenung ngenangka pengidup iya, tunang ti endang beamai sayauka iya nyu dikeduan iya ketegal  ati iya ti amu deka ngempu Ethan.Udah nya Ethan ga muai iya diatu.Nyau nesal ga iya enggau ulah iya ti enda nyaga kaul enggau manah maya nanggam pengerindu.(MV :Taja kitai begamal bajik tauka sigat anang ga kitai peneka ati ngemelika orang laki tauka indu ti udah beabis ati sayauka kitai, dalam ati gaga ngasaika diri ulih  betukar ganti sulu baka nukar baju, tang mih dini rega diri kitai?)

Di rumah Helen.

Helen tegenung nela bup "Heaven Is For Real".Ati iya diatu nyu sesengit asaika beterus terang enggau Ethan. Iya deka madahka utai ti udah lama disimpan  di dalam ati.Helen ka madahka diri ti lama udah bisi naruh pengerindu ngagai Ethan.Iya udah mutus ati, iya mesti beterus terang sebedau Ethan nyu amai-amai diempu orang.

Pagi hari siti maya ujung minggu.

Helen ngemeranika diri ngemai Ethan betemu.Seduai betemu ba siti taman, tang ba taman nya bisi mini cafe. Seduai pan berandau betunga dia ngirup sambil ngelantangka ati enggau pemanah rampa bungai ba taman.

Lekaka dulu Ethan enggau Helen brandau dia.Kitai bekalala dulu enggau siku watak baru.

??
Di Perumahan Bougenvilla Bintulu.

Steven duduk tegenung ba dapur nunga aki iya ti ka ngirup kopi pagi tu.Enda beilap mata Steven meratika ulah aki iya.

"Lama amat ga nuan ngirau  ai kopi nya aki,"ku
Steven  ngelara.

"Eh! Ngelelaka gula ya dulu,"ku saut aki Steven.

"Ouhh...aku nurun meli lauk tua dulu ga."

"Au, alai meh."

Steven lalu pansut ari rumah deka ngalu ke pasar.
Rumah aki iya nya damping amat enggau pasar Bintulu.
Bejalai kaki sepengelama 5 minit lalu datai mih di pasar.Laban ti enda jauh nya mih iya enggai pansut ngena kerita.Nyamai ga bejalai kaki tumu pagi mansutka peluh kenu ku anak ati Steven betelai.

Steven bekenaka baju biru T-shirt bechura chelum, udah nya baju lalu dilapis iya ngena baju belengan panjai bepitak.Steven betubuh tinggi,bpemurak pan umbas ya mih.Lengan besigul, anak mata bechura pirang.Perening mata iya semampai lembut enda kala tajam.Senyum mega semampai ayan ba mulut enti maya bepansa enggau orang.Pemanis senyum Steven nya tau ngasuh orang indu enda jenak tinduk malam.

Enti bejaku pan chukup alus munyi sada nyawan iya didinga, tak nadai nemu enggau orang bejaku kasar sekali.Steven diau begulai serumah enggau aki iya,iya gawa nyaga kedai aki iya empu.Aki Steven bisi muka kedai nyual cheremin mata.Steven mega kala nampung pelajar ngagai menua luar, ngambi degree dalam "Pengurusan Perniagaan".

Taja pia Steven semampai ngemaruhka diri.Iya siku lelaki ti chukup bebasaka semua orang enda ngira sida nya tuai tauka biak ari iya.

Maya Steven pansut ari pagar rumah, ibu Suyah ba rumah sepiak pan lalu nyapa iya..

"Igat! kini nuan?"

"Ka ke market meli lauk, nuan bisi utai pesan ibu?"

"Meli ke aku buah peria legi, lembau aku tu ka
bajalai.Tu duit aku."ku ibo Suyah sambil kaki
mechal  pala patung.Duit lalu disurungka iya
ngagai luar pagar  ka diberi ngagai Steven.

"Ya lapa patung nuan nya ibu?"

"Pemedis orang tuai mih tu igat."

"Au, diau aja mih nuan ibu.Mupuk dulu ga aku," ku
Steven lalu ninggalka rumah ibu Suyah.

Mansa rumah siti dikangau ka orang baru ga tudah Steven.

"Igat! ngalu ke market nuan? Meli ke aku ikan
legi,"ku  apai Jumau orang ti betakah dua buah
rumah ari ibu  Suyah tadi.

"Ikan nama ka dibeli nuan aya?"

"Ikan tenggiri,"ku saut apai Jumau.Iya lalu nyuaka
Steven duit.Apai Jumau bejalai betungkat laban
kaki ti  udah timpang.

Tembu nyambut duit ari Apai Jumau, Steven lalu neruska  pejalai iya ngelawa market basah Bintulu.
Maya ti rindang bejalai kaki  dia iya tepedaka siku anak mayau  kekiau ba tisi jalai.Terus dirandau iya dia anak mayau nya.

"Lapa nuan kediri ditu?"

Dijingkau Steven anak mayau lalu dibai iya bejalai ke  market.Datai di market, Steven nyu begigaka kutak dulu ka dikena nyimpan anak mayau.Udah bulih kutak lalu dibinching iya ngena kutak kin kia mih anak mayau nya.Mupuk mih iya meli sida sayur enggau lauk ti bukai ke di pesan bala sida ibu aya din tadi.

Tembu bebelika lauk Steven lalu duduk belelak ba siti cafe.Dia endang sigi suah endur iya ngetu  belelak laban ti rindu meda cafe nya dikelingi bungai.

Plastik lauk dilekaka iya ba tisi kaki, kutak anak mayau tadi baka nya mega diengkah semak kaki.Maya tudah Steven  baru ka rindang belelak dia iya tedingaka orang di belakang iya bejaku enggau sedan sabak.Tang iya enggai malik, enggai kiruhka hal orang mih kenu ku anak ati iya dia.

"Nuan tu sapa? Nama gaga nuan betemu enggau
Ethan?  Ethan tu laki aku, nuan anang ngacau iya
agi.Aku tu bini  iya , aku benung sakit nganti ka
parai da."

Pia ku munyi leka jaku orang nya didinga Steven.Enda memukai nyu sinu ga iya ninga jaku sebana orang nya.Steven pan ngenyit angkat ari penuduk lalu nunga sida ti ba belakang iya tadi.

"Ehh...ehhh..aku tu laki iya endu.Nadai iya ngachau laki.  nuan dih.Bisi aku laki iya ditu,"ku Steven lalu terus narit  jari Helen ka ngemai angkat ari bangku penuduk.

"Aram sulu pulai ke rumah tua, enggaika ikan tu but
legi,"ku Steven madahka Helen sambil jari iya
minching  plastik ikan ti dibeli ba market tadi.

Helen bebengap aja.Sapa mih lelaki tu? Ku iya betanya di dalam ati.

"Apuu...nyin agi kutak anak mayau nyin tinggal."

Diambi Steven kutak anak mayau lalu disuaka iya ngagai Helen.Ethan ti meda pan bebengap.Iya merening belakang Helen enggau perening ti seribu macham tanda tanya.Helen nyau udah angkat ditabanka lelaki ti enda dikelala tadi.Dah nya perening Ethan ga Sulan ti benung dedegi di tisi mija endur seduai iya Helen ngirup dia tadi.

"Nama ulah  nuan baka tu Sulan?"ku Ethan betanya.

"Tan, sapa indu nya? Nama kebuah nuan betemu
enggau iya ditu?"

Ethan enda nemu baka ni ka nyaut, penatai lelaki ti enda dikelala nya ngasuh iya puntan penemu baka ni deka nyaut Sulan.Ka iya nganu Sulan enggai ga nyadi, kasih ga meda pendiau Sulan.

??

"Eeehhh....sapa nuan?"ku Helen nanya Steven.Dikuyaska  iya jari ti dipegai Steven.

"Aku Steven,"ku Steven nyaut lalu nyurungka jari ka
betabi enggau Helen.Tang enda disambut Helen.

"Aku Helen."

"Ouuh... Helen manah amai nama.Baka orang ya empu."

Lalu senyum mih Steven dia meratika Helen ti empai ngetu bebengap ari tadi.

"Nyaah..ambik kutak nuan tu."Disuaka Helen kutak anak
mayau Steven.

"Endu, enti nuan ka ngiga sulu tau bekelala enggau
aku.Anang  sesekali besulu enggau laki orang
endu,  peda nyau ngeransi nuan bini iya.Uji ti aku
nadai tadi  keni gaya nuan nyaaa."

"Eihh... ukai laki orang iya nya."

"Ermmm...sapa indu ke nyabak nya tadi dih?"

Empai sempat Helen nyaut jaku tanya Steven talipun iya nyu bemunyi.Beguai iya mantaika talipun ari beg sandik.Nama Ethan ti ayan ba skrin.

Ethan??Dini endur nuan? Udah pulai nuan?

Helen??Empai gi, ba depan market sayur tu aku.

Ethan??Au aku ngambi nuan kia.

Randau seduai iya diketuka naka nya aja.

Nadai penyadi utai ti dipelin sehari tu  tadi.Ku jaku Helen ka beterus terang .Nyu datai ga orang ngambu diri  bini Ethan, ya kemaya ga Ethan nya bebini? Nama aku enda kala nemu? Ku Helen betanya di dalam ati.

Bisi 2 minit ti nganti, nyu ayan kerita Ethan ba depan iya.Helen pan lalu mansang ngelawa kerita.Pintu kerita terus ditukang.

"Aram, aku nganjung nuan pulai,"ku Ethan.

Helen lalu tama.Steven ngemata aja, iya agi bediri ba endur tadi enda kekebut.

Enda chukup sigat kini aku tu? Muntang endar alah laban laki orang.Ku Steven muchau di dalam ati.Nyau iya mupuk pulai ke rumah.Bejalai kaki belubah-lubah.

Sambil bejalai sempat ga iya nilik jam ba kuan jari ti baru nunjukka pukul 8:00 pagi.Datai di rumah Steven lalu manduk lauk ke aki iya.Tembu ngintu utai nyau ga Steven pansut  baru deka muka kedai cheremin mata aki iya.

??

Di dalam kerita Ethan.

"Sapa nya tadi?"ku Ethan betanya.

"Entah! Aku enda mih ngelala."

"Kati iya tau madahka diri laki nuan?"ku Ethan
betanya  baru.Tang gamal iya baka deka nundi Helen.

"Enti aku belaki nuan mih orang keterubah
dikangauka  aku datai ila,"ku Helen nyaut.

Mulut Ethan  senyum ninga jaku saut Helen, tang di dalam ati iya lain ga asai.Iya pan enda nemu nama kebuah ari suba, asaika bisi utai ti enda ulih disebut enggau mulut ,pengasai nya kekadang nemu datai kediri maya iya empu enda sedar.Bisi maya iya kekadang enda ulih betemu mua enggau Helen.Bisi ga maya iya chukup berasai rindang enti nyema begulai enggau Helen.

"Lapa nuan nyu tegenung? Sapa indu nya tadi dih?
Nama iya madahka diri bini nuan? Lapa ga nuan
bebini enda madahka aku?"

"Ukai bini aku nya,"ku Ethan beguai nyaut.

Tiap kali ngenatika Sulan sigi ngasuh ati iya semampai sinu.Tang mih Sulan enda tau kelalu dilayan.Enggaika iya nyu makin majak meri pengarap ga legi.

"Enti ukai bini nuan, sapa ga nya tadi dih?"

"Beberapa taun ti suba kami duai sigi kala besulu,
tang nya semina jerita lama.Diatu iya nyau ka pulai
ngagai aku baru, tang aku nyu nadai ati ngagai iya
agi."

Kebendar ya enggai amat Ethan nyebut jerita lama iya enggau Sulan suba.Tang iya mesti beterus terang ngagai Helen.

"Hurmmm...tembawai lama nuan pia."

Berasai lantang asai ati Helen ninga.Legi mih aku nguji beterus terang baru ga.Ku Helen bejaku di dalam ati.Maya dedugau di dalam kerita, Helen lalu meratika utai ba luar.Helen nyu sedarka pejalai kerita nya ukai nuju ngagai rumah iya.

"Ehh..kini tua tu baik nuan?"

"Meli bungai??"

Ethan nyaut sambil lalu senyum merening Helen.

*MV = Moral Value