Ethan nguji ka ngangkatka diri ari katil nya, tang iya ensepi kedua iti kaki tak berat asai ka diangkat.Kedua kali iya nguji ka ngangkatka kaki pan agi ga enda alah.Udah nya Ethan pan ngama kaki iya, tegu-tegu iya betis enggau tapak kaki tak nadai asai.

Sulan ti tinduk ningkap ba tisi katil nya tadi pan nyu tedani ketegal Ethan ti balat engkasak ba tilam.

"Lapa kaki aku tu enda  ulih angkat?"ku Ethan nanya Sulan pengudah meda siku nya dani.

"Tan, lutur madah kaki nuan udah singkung,"ku Sulan
enggau ati semadi mansutka jaku nya.

Ethan lalu tekenyit ninga utai ti dipadahka Sulan.Terus nyerauh mih iya di dalam wad, nyu ka ngelingkang.Ai mata iya mega beterunjui naya, katil pan nyu tekusak.

Sulan enggau naka ulih ka ngelantangka ati Ethan.
Diberap iya rat tubuh Ethan.Pengudah Ethan jenuh, nyau nyabak baka nembiak mit ga iya dia.Lapa mih nasit aku bangat jai? Ku iya betanya di dalam ati.

"Tan, anang kelalu irau nuan.Enti dibai berubat enggau physiotherapy ulih gerai baru nuan ila dih,"ku Sulan.Ai mata Ethan lalu dikendas iya enggau penuh pengasih.

"Amai ulih bejalai baru aku ila?"ku Ethan betanya.

"Ulih, asal nuan rajin berubat,"ku Sulan lalu tuchum.

Baru bisi berasai lantang asai ati Ethan pengudah ninga jaku Sulan.Seput pan nyu ulih disintak iya manah.

"Ni indai dih?"ku Ethan betanya.

"Indai di rumah din mih, enggai aku ngasuh iya ngibun
  nuan ditu.Kasihka iya pedis ka tinduk enti diau ditu."

"Au..enda ngawa nya."

"Nuan ka makai utai?"ku Sulan ga betanya.

Empai sempat Ethan nyaut, jari Sulan lalu ngiga utai kedempa ti bisi ba drawer dia.Ambi iya buah oren sigi, dikupak iya kulit lalu ka disuapka iya ngagai mulut Ethan.Ethan enda ga nulak, buah oren lalu ditegam.

Helen ti dedegi ba luar pintu bilik wad nya ngemataka Sulan enggau Ethan ari tadi.Pintu bilik nya ga bisi cheremin besegi empat mit ba atas.Ba jari Helen mega bisi megai bungai ros bechura urin ti udah dibungkus manah.

"Kasih amai nuan Ethan, tang nama daya aku? Aku
semina berani ngemataka nuan ari jauh aja maya tu," ku
Helen bejaku kediri.

Meda bisi indu ngibun Ethan dia Helen pan lalu mansal kaki nyingkang pulai.Ati berasai berat laban empai betunga mua berandau enggau Ethan.Tang iya sedar sapa diri empu.Iya ukai sapa-sapa ba Ethan.Semina 'secretary'.

Sebulan pengudah nya Ethan pan  dikemendarka pansut ari sepital.Sulan nulung ngasurka kerusi roda Ethan maya hari iya pansut ari wad.Nyu jauh rujut tubuh Ethan sekumbang iya ke lama diau di sepital.Sepengelama timpuh nya mega Sulan nadai kala ninggal tauka ngelakka iya kediri.Endang diibun serta dikemata siang enggau malam.

Di rumah Ethan ba menua.

"Bedau ka mandi nuan?"ku Sulan nanya.

"Emm...legi aku empu mandi,"ku Ethan nyaut.

"Keni nuan ka mandi kediri?"

Enggai tudah Sulan ngelakka Ethan mandi kediri.Ti ba sepital bisi ga nurse lelaki nulung iya mandi.

"Enda ngawa nemu aku mandi kediri legi."

Ethan enggai diberi Sulan mandi.Malu ga asai iya.
Pengawa bukai iya enda kiruh enti Sulan ka nulung, tang enti mandi sigi enggai iya ngasuh.Malam nya  tumu Ethan tama ke bilik peninduk iya.Nadai  mayuh utai ulih digaga sekumbang kaki nyu singkung.

Enda tentu lama pengudah iya tama ke  dalam bilik,  pintu bilik ditatuk indai iya ga.

"Tama mih indai."

"Jang, aku bisi utai ka dikerandau enggau nuan."

"Nama nya indai?"

"Jang, keran amai Sulan nya ke nuan peda aku.Nadai ati
ka ngambi iya ke bini sekali nuan?"

"Empai ka bebini aku tu, ya ga pendiau aku nyau 
timpang."

"Jang, mentas amai Sulan nya.Enti nyema suba iya bisi
ngenelihka ati nuan, ampunka aja meh iya.Kitai ga
mensia ke sigi enda ulih lari ari ngaga penyilap."

Ethan enda bemunyi.Lama ga iya ngenung pengudah ninga jaku indai iya nya tadi.Bisi ga pengamat utai ku indai iya nya.Nama penyalah enti ka meri Sulan peluang baru? Tang penanggul iya diatu, ati iya dia tak nadai asai ka nanggam pengerindu enggau sapa-sapa agi.Pintu ati udah ditutup iya rapit.

"Ila mih ngerunding nya indai, nganti aku udah gerai ila."

"Au mih jang, berunding manah mih nuan.Anang enda
ingatka pemanah sida Sulan  sebilik ngagai  kitai."

Ethan  gegaring tegenung pengudah indai iya pansut.
Ensepi mata empai ka tinduk, iya pan ngangkatka diri begadai-gadai  ngirit kaki nurun ari katil lalu nudukka diri ba kerusi roda ti meruan diengkah  ba sepiak katil.
Kerusi nya mih nyadika kaki iya diatu.

Diasurka iya ngena jari tayar kerusi roda nya deka  ngelawa mija belajar iya kelia.Datai di mija, lalu ditepas-tepas iya debu ba atas mija nya.Balat  debu lekat ba mija laban mija lama udah enda dikena.

Sambil meresi mija dia iya lalu tepedaka bup "Heaven Is For Real." Diambi iya bup nya.Ditela enda lama.Lalu empai kala dibacha,ka ya macha tang suah nyu enda ingat belama.

Malam nya Ethan ngaga pemutus deka macha bup nya abis.Dikerebakka ya belubah-lubah  tiap iti rambar bup nya sampai iya nyau nyinuk.Ati pan berasai lantang maya macha.Datai ba rambar ke-100 dia iya meda bisi utai ditulis ngena pen.

"Haii.. Ethan bup tok ari aku HELEN LIM /2005"

Ethan ngusuk mata maya tebachaka nama Helen dia.
Enda pecaya asai ya, enti Helen meri bup nya suba nama iya enda kala madahka aku ngelama tu? Kenu ku Ethan betanya di dalam ati.Udah nya pengingat iya ti kala meda bup ke sama baka nya ba bilik Helen suba pan tepulai baru.

"Arrhh...nama kebuah Helen enda kala madah?"ku Ethan 
bejaku kediri.

Pengudah macha bup nya sampai abis iya pan lalu betalipun ngagai Helen.

Tut..tut...tut...

Helen?? Hello...

Ethan?? Helen minta ampun laban ngacau nuan maya
                tu.

Helen??Enda ngawa, empai tinduk aku ditu dih.

Ethan??Helen nuan nadai utai ka dipadah ngagai aku
               pasal bup ti bejudul "Heaven Is For Real?"

Lama Helen enda bejaku.Jari iya empu dia pan benung megai bup ti sebut Ethan tadi ga.

Helen??Ermm..udah bacha nuan abis bup nya?

Ethan?? Udah..nama nuan enda madahka diri meri bup
                tu suba dih?

Helen??Laban aku ka nuan macha ya sampai abis.

Ethan ga pulai enda bemunyi.Amat lama endar bup nya udah, tang nyu baru diatu  bup  nya ti dibacha.Berasai besalah ga Ethan dia.

Ethan??Hermmm terima kasih laban udah meri aku bup
               ti chukup berega baka tu.

Helen?? Sama sama.Kati baka nuan deh? Udah okey
                diatu?

Ethan?? Udah ga begi.Enti selalu gi sesais ulih jampat
                agi mih gerai ila.

Helen?? Au bos,aku nganti penatai nuan gawa baru ila.

Senyum Ethan ninga jaku Helen nya.

Ethan?? Okey, nganti aku nuan.Nganti aku meri nuan
                kerja memayuh.

Helen??Au..gd night.

Ethan??Good night too.

Randau seduai iya ngetu naka nya aja.Ethan tuchum kediri.Enda iya nyangka orang ti digiga iya meri bup nya suba semampai di depan mata iya belama.Malam nya mega iya lalu tinduk enggau naka penyenak.

Ethan enchelakka mata lebuh ensepi tubuh ditarit orang.Sulan narit tubuh Ethan damping ngagai  tubuh iya, seduai udah gali berimbai ba tilam.

Sulan chukup gaga diatu laban ba ati iya Ethan sigi enda lama agi nyu ka diempu iya.Ethan nadai kala ngelarika diri ari iya agi.

Sulan narit pegu Ethan begadai, seduai betunga mua.Makin lama makin damping, nyau ka besatup mulut.Ethan lalu ngenyit nguingka mua iya ke tisi.

"Tan!! Anang nulak aku agi. Tu peminta kepenudi aku sebedau seput aku lesi, aku ka nyadi bini sah nuan.Tang aku nemu ati nuan lalu empai ulih nerima aku.Aku minta ka sekali tu aja...ambu mih aku ka bini nuan.Perening mua aku  Tan."

Pegu Ethan dipaut Sulan begadai, perening mata seduai iya lalu besabung.