Seminggu pengudah nya,

Tegenung Ethan ba pala tangga ngenang nama penyadi nasib seduai meindai udah tu ila.Apai ti dikesayau udah ngejang ketegal ti bebadi dilantak lori ba jalai alun.

Seminggu pengelama Ethan udah enda nurun ke sekula.Ati iya kelalu berasai puang.Lebih agi ti lebuh meda mua indai iya ati pan lalu belabuh sinu.kemaya mih indai enggau apai iya kala beserara ngelama tu.Ke kebun begulai belama. Enda kala betinggal pangan diri lebuh ngereja pengawa,enda ngira nya di tanah tauka di rumah sigi enda kala jauh seduai nya melaki bini.

"Jang, pagila anang enda nurun sekula nuan.Ingat
jaku pesan niang apai nuan suba.Iya semampai
nyuruh nuan belajar bebendar,"Ku indai Ethan.

Seraya ti bejaku bisi neritik seleka dua ga ai mata indai iya dia.Semampai baka nya mih indai Ethan sekumbang apai Ethan udah nadai.Bangat gerah amai ga ai mata tudah tuai.Dia dih Ethan angkat lalu mansang nudukka diri ngimbai indai iya.

"Umbas nyabak indai.Anang kelalu tusah ati nuan,
pagila mih aku nurun ke sekula nitihka peminta
nuan,"ku Ethan nyaut indai iya.Tang mih di dalam
ati iya din tak nadai pengingin sekali deka ke
sekula.

??

Pagi hari Satu, Ethan nurun ke sekula.Jaku niang apai nyu semampai didinga pending belama.Dia dih iya nurun ngemai ati ransing,serta bedanji ngagai diri empu udah tu iya deka belajar beamat-amat serta badu lelanyah.

Baka selama Ethan sigi bejalai kaki nurun ke sekula.Datai iya di dalam kelas, sida sekelas lalu nadai tentu bemunyi sepengudah meda Ethan tama.Laban ti nemu Ethan bisi penusah,kira bebasa ke iya meh sida sekelas nya dia.

"Sabar Ethan,sigi dah diatur Petara jalai pengidup
kitai mensia.kitai nadai kuasa deka nagang utai ti
udah diatur Petara,"ku Asun ngerandau Ethan pagi
nya.

Bisi nambah agi ga pengering ati Ethan pengudah ninga jaku Asun.Berasai negu ati pementas Asun ti nyadi kaban iya lebuh maya tusah enggau senang.

Urung pukul 9:45 pagi jam luching sekula bemunyi nandaka udah datai ba jam endur nembiak sekula ngetu pagi .Ethan enda pansut ari kelas,iya duduk lelengu aja dia.Panjai Ethan tegenung lebuh semua nembiak di dalam kelas nya udah pansut.

Asun ti bisi pansut meli utai ke dempa lalu nyuaka Ethan sebungkus asi lemak lebuh iya udah nudukka diri ngimbai Ethan.Ethan ngenung bungkus asi lemak ba jari Asun.Perut pan nyu lapar tekala nya,belubah-lubah Ethan nyambut pemeri Asun.Bungkus asi lemak dibuka begadai,Ethan lalu belabuh nyuap sesuap dua.

Benung seduai iya sama makai,enda memukai Asun ti duduk di sepiak Ethan ngenyit angkat ari bangku lebuh ninga orang ngangauka iya ba mua pintu kelas.Asun lalu bejalai ngelawa orang nya.

Orang ti ngangauka Asun nya nyuaka Asun siti sampul surat.Ethan nengkila ari jauh aja.Lebuh Asun duduk ke bangku baru iya lalu senyum lelinsum meda sampul surat ba jari.

"Surat nama nya Asun? Baka surat cinta gaya
nya,"Ku Ethan nundi.

Sebedau nyaut Ethan,Asun dulu mantaika tuchum.

"Pama mih aku dah bc tawing," Ku Asun madahka
Ethan.

"Eh,kemaya nuan bulih tawing?" Ku Ethan nanya.

"Maya kem hari Enam lebuh nya aku bekelala
enggau siku indu benama Chumang.Pemuas ke
suah betundi berandau enda berasai nyau labuh
pengerindu,"Ku Asun beterus terang.

Asaika diruntun dada Ethan ninga mulut Asun nyebut nama Chumang.Ngetu iya nyuap asi lemak,ngenung enda lama mata iya merening nuju ke papan tulis sida ba depan dia.Perening puang!

Ukai nya iya enda nemu, ukai nya iya enda meda kaul Asun enggau Chumang lebuh kem sehari nya.Tang Ethan enda nyangka ngenyampat nya ga Asun seduai Chumang lalu besulu.Sintak Ethan dalam-dalam seput di dada,udah nya iya lalu angkat pansut ari kelas.Singkang kaki Ethan belubah-lubah bejalai nuju ke jamban sekula.

Datai di jamban Ethan tegenung baru.Diatu ati iya nyu makin puang,pengudah ninga jaku terus terang ari Asun tadi lalu tekala nya mih iya ngasaika pengerindu iya ngagai Chumang nyu lela.

Nama daya aku? Diatu Chumang nyu besulu enggau Asun.Ethan nyintak seput iya dedalam baru.Dikesuhka belubah.Nyu berasai makin pedis di kandang dada dia.

Salah aku empu mega laban enda kala madah ngagai Asun aku bc nyimpan ati ngagai Chumang!
Salah aku empu mega enda kala berterus-terang ngagai Chumang! Tang mih Chumang ukai nya enda nemu,tauka iya ngaga diri enda nemu…! Ku Ethan betelai di dalam ati.

Ethan semina selalu meratika Chumang ari jauh.
Diatu ayas Chumang nyau makin jauh ninggalka iya.Kada nya ulih dijapai iya agi.Nyu petang mih dunya pengerindu Ethan dia.

Pulai sekula ngalih hari nya Asun nyeretaika diri enggau Ethan.

"Aku ka ke rumah nuan legi,"Kenu ko Asun.

"Ya nama pejalai nuan ka ke rumah aku?" Ku Ethan
betanya alit ati.

"Ehh,ya nama nuan enggai mai aku ke rumah nuan
pia?" Asun bejaku lalu mayuk tandan bahu Ethan.

Seduai iya pan lalu seretai pansut ari kelas.Datai di jalai pengudah pansut ari pagar sekula,Asun ngemai Ethan nepan kereta apai iya.

Di dalam kerita,

"Tu kaban aku Ethan,"Kenu ku Asun madahka apai
enggau indai iya.

Apai Asun senyum lalu bejaku,

"Padahka aku ni jalai nuju ke rumah nuan Ethan."

Ethan pan madahka tunga jalai nuju ke rumah iya.Datai di tengah laman iya terus ngelaluka sida Asun sebilik tama.Indai Ethan lalu ngenahka temuai iya ai kupi.Sida duduk betunga ba bilik besai.

"Aku tu apai Asun, tu bini aku.Anak aku Asun nya
bekaling rapat amat enggau Ethan di sekula din.
Ensana iya nusi ke Ethan ditinggang penusah.
Nama gaga enda madah tumu gi ku aku nanya
iya,udah nya Asun tu madahka diri enda nemu
jalai kitu,nya mih kebuah kami tu laun datai,"Kenu
ku apai Asun madahka tuju pejalai sida sebilik
ngagai Indai Ethan.

"Kiruh amai ga kita ngenusah diri datai kitu,"ku
indai Ethan.

"Asun kami tu keran amat mai kitu,kasih ke kaban
aku kenu ku iya,nyadi tu pemeri ari kami sebilik
wai,"Ku indai Asun nyuaka sampul keretas.Di
dalam sampul nya bisi ditepu iya duit tulung
Rm500.

"Terima kasih wai,"Kenu ku Indai Ethan seraya iya
ngulurka jari betabi enggau Indai Asun.

Makin lama betunga nyu makin mayuh mih randau sida ke tuai.Ethan enggau Asun duduk berimbai mendingka randau orang tuai seduai iya.

"Manah amat jala nuan nya Tan,"Ku Asun ngelara
jala ti diengkah Ethan ba tisi pintu penama.

"Jala gaga niang apai aku suba nya,"Kenu Ku Ethan
nyaut.

"Aram tua nyala,"Kenu ku Asun.

Ethan lalu nagunka pala tanda setuju deka dibai Asun nyala.Apai indai Asun ti ninga Asun deka nyala lalu mesan,

"Anang lama endar seduai enggai ke kitai nyu laun
pulai legi,"Kenu ku Apai Asun.

"Gari sekula nuan buka dulu Asun,enggaika nyu
kamah,"Kenu ku Indai Asun ga.

Buka Asun gari sekula iya,udah nya lalu minjau gari Ethan.Nyau mih seduai iya nurun nyala pengudah ke beradu.Datai di sungai Asun enggau Ethan lalu bemain mih belah tebing ai sungai.

Nibar penibar jala.Mayuh diri ikan ulih seduai iya,ni ke undang galah bisi meh kena jala.Sekeda ikan ti diulih nya tadi lalu ditunu seduai di tebing sungai dia.Ke dempa seduai iya seraya ke duduk dedugau berandau.

"Ethan,nuan kala ngasai labuh pengerindu?"Ku
Asun betanya.

"Enda kala,"Saut Ethan pandak aja sambil jari iya
nyukir rangkang kayu api ti dikena nunu ikan.

"Aku enda mih kala,tak baru ya ngasaika pemanis
labuh pengerindu sekumbang aku udah ngelala
Chumang,"Kenu ku Asun bejaku lalu lelinsum.

Ethan nyu bertarit seput dalam-dalam lebuh ti ninga Asun beterus terang.

"Arapka seduai mujur mih ila,"Kenu ku Ethan
sambil jari iya nempap tandan bahu Asun
begadai.

Pengudah nyu kenyang makai ikan tunu,udah puas bemain ba ai enda berasai hari pan nyu lemai seduai iya pan lalu mupuk mulaika diri.

??

Malam nya Ethan tegenung di dalam bilik peninduk iya.

Udah tu aku mutus ati deka ngemajuka diri empu aja! Pia ku Ethan meransang ati diri malam nya sebedau ti ngelelapka mata.

Hari siti nurun sekula baka selama mih Ethan, nurun mai ati ti puang.Tang iya mesti nurun ke sekula.Taun siti nyu deka ngambik peresa SPM,juluk ati iya mesti lulus peresa nya ila.Iya deka ngubah pengidup seduai iya meindai.Diatu apai iya udah nadai,semina iya aja ke dikeandalka indai iya ngemajuka pengidup seduai iya udah tu.

Penusah ti udah nuntung nya semina penguji.Aku mesti napi penguji enggau ati ti kering.Ku Ethan dalam ati.

Datai di dalam kelas,Ethan nadai meda Asun tumu pagi nya.Tang beg sekula Asun bisi diengkah ba bangku nandaka Asun sigi udah dulu datai di dalam kelas.

"Kini ke penunga Asun? Enda kala iya bejalai
tetumu pagi baka tu,"ku Ethan bejaku kediri.

Ngenangka sida Asun sebilik ti datai ke rumah iya kemari ngasuh iya berasai berutang budi amai ga ngagai Asun.Dini ka bulih kaban mentas baka Asun? Jauh ba sukut ati Ethan berasai beruntung bulih kaban baka Asun.

Ethan nudukka diri ba bangku.Disandihka iya beg sekula ba bangku,udah nya iya lalu mantaika bup mata pelajar ti deka dikena pagi nya.Dibantaika bup nya ari beg tang ka ditaruh iya ba desk baruh mija dia dulu,maya ka nepu bup ke dalam desk iya bisi ngasaika bup nya tepantup enggau utai bukai di dalam desk dia.Ethan lalu nilik ke dalam desk deka meda nama utai ti nekul bup nya tadi.

Peda iya bisi bungkus utai besegi empat bechura kuning di dalam nya.Bungkus keretas nya dijengkau Ethan lalu dibuka iya,peda iya ayan siti bup tebal. Bup nya bejudul "HEAVEN IS SO REAL !"
NUJU NUAN ETHAN,

ARAPKA NUAN KERING ATI NAPI PENGUJI TI
BARU UDAH DATAI NUNTUNG BA PENGIDUP NUAN,ARAPKA NUAN SABAR SERTA ANANG PUTUS PENGARAP DI DALAM PENGIDUP,BACHA MIH BUP TU MAYA NUAN LEPA..

Pengudah macha utai ti ditulis ba siti keretas mit begulai enggau bup nya Ethan tegenung lalu berasai alit ati.Sapa mih ke meri aku bup tu? Engka mih Asun.Laban ti enggai mayuh runding iya lalu nyimpan bup nya ke dalam beg sekula.