Bab 6 Cinta terbaik ku
Karya winaple sabahan writer
Cover: winaple sabahan writer
id: winaplesabahanwriter
Gambar google

Dalam jam 2.16 petang begitu, balik sudah dorang apak dari kebun sayur. Selagi perut belum berasa lapar selagi tu lah dorang bertahan di sana pondok kebun sayur.

“akhir balik ni hari kamu oh.. Kerja keras nampak” tegur saya sama dorang.
“begini lah nak kalau mau cari makan, mesti ada usaha baru boleh berjaya dalam hidup walau pun hanya pekebun sayur kecil dan penoreh getah saja” jawan apak.
“betul tu pak. Janji kita kaya kasih sayang dari pada kaya harta tapi tidak bahagia kan pak.. Bah pigi lah kamu makan, saya sama dorang leo sudah makan tadi” jawab saya.
“bah. Kami masuk dulu lah. Kau edon tidak mau masuk makan dulu?” jawab apak. Si amak sudah duluan masuk sebab dia mau cuci tangan sama buka dia bilang tadi.
“duluan saja kamu pak. Karang saya masuk pigi makan” jawab edon sama apak.
“bah duluan apak masuk” jawab apak.
“bah..” jawab si edon.

Bercerita lagi kami empat orang di luar sampai lah dorang si apak siap makan lalu join kami di luar. Telampau siuk bercerita sampai lupa itu masa sudah ni.

“uik bilang mau pigi sungai. Jam 3.25 petang sudah ni” tegur leo sama kami.
“biar betul jam 3 lebi sudah ni?” jawab ariana.
“ya bah kak aria.. Bukan saya menipu pun” jawab leo.
“bah kalau macam tu mari lah kita pigi sungai” jawab ariana.
“don pigi kau makan dulu tu baru ikut pigi sungai” tegur amak sama abang edon.
“bah kejap kamu ar, saya pigi makan dulu ni” jawab edon.

Kami angguk kepala saja. Lepas tu sambung lagi kami bercerita sambil tunggu si abang edon siap makan. Siapa suru tadi apak bawa makan tidak mau, mau juga kunun ikut bercerita di luar sama kami. Kejap saja si abang edon makan terus dia keluar sambil dia bawa itu rambat si apak. Senyum-senyum kunun dia tengok si apak.

“aik merambat kau?” tanya si apak.
“ia pak. Lama sudah tidak pigi merambat ni. Mana tau dapat anak-anak pelian kah, dapat turongu kah. Boleh lah” jawab edon.
“kalau macam tu apak ikut sekali lah. Boleh juga menyalam kita tu di lubuk. Mana tau nasib dapat kocili kan. Bah leo pigi kau ambil itu sinapang ikan sama kantung sekali” bilang apak sama leo.
“bah jap saya pigi ambil dulu” jawab leo.
“nah ramai-ramai kita pigi sungai. Ini rambutan kita bawa sekali lah. Ada juga bikin cuci mulut sambil kita duduk di siring sungai” ariana mencelah.
“bah ngam lah tu aria. Kasih masuk sana di sinaging aunty saja, nanti aunty sikut” jawab amak.
“eh biar lah saya yang bawa. Lagi pun lama betul saya tidak merasa sikut itu sinaging” jawab ariana.
“bah dari kau saja tu ariana. Bukan aunty paksa kau sikut juga” jawab amak.
“ia bah aunty… Saya sendiri juga gia tu mau sikut tadi saya cakap” jawab ariana.

Berketawa terus kami semua tengok gaya si amak sama ariana. Pasal mau sikut sinaging saja pun mau betekak sudah dorang ni. Siap sudah dorang baru kami jalan kaki pigi sungai. Si leo pula pigi singga dulu si eson sama si billy. Dorang ni berkazen lagi bersebelah saja tempat tinggal jadi tidak susa lah mau cari dorang dua.

“hai kak niana hai kak ariana..” sapah eson sama kami dua ariana.
“hai juga eson.. Apa kabar kamu?” jawab ariana.
“kabar baik bah kak. Kakak bila lagi sini ni kampung ni?” tanya billy.
“dari yang minggu lalu lagi kakak sini. Kakak mau tinggal sini sama nenek ni” jawab ariana.
“oh… Bagus lah bah tu kak, tidak juga nenek sunyi di rumah seorang-seorang tu” jawab billy.
“yalah billy. Bah jalan lah kita nanti kepatangan pula di sungai” jawab ariana.

Kami semua pun sambung perjalanan menuju pigi di sungai. Bila sampai di sungai, duluan dorang apak sama dorang abang edon pigi salam yang lubuk-lubuk. Si leo pula sama dorang eson billy pigi merambat sana yang air tuhur tapi deras-deras tu. Sementara tunggu dorang menyelam, kami tiga orang pasang ungun api di siring-siring supaya kurang itu nyamuk sundal mau pigi melakat saja sama kami.

“niana sini bah dulu kau, ada saya mau cakap ni” bisik ariana sama saya.
“ada apa tu aria? Kenapa juga mau main bisik-bisik ni?” jawab saya kehairanan sama dia.
“saya tanya jangan kau marah ar niana. Begini bah, si bryan tu memang couple sama kau kah? Tapi kenapa hari tu saya nampak dia jalan sama perempuan lain. Sweet lagi dorang tu saya nampak” jawab ariana.
“saya tiada apa-apa hubungan sudah sama dia tu aria. Biar lah dia sama kehidupan dia yang memang kaki perempuan” jawab saya.
“astaga! Jadi betul lah dia tu playboy? Eh nasib dia tidak buat macam-macam sama kau kan niana” jawab ariana sambil dia usap bahu saya.
“syukur lah tuhan masih sayang saya ariana. Kalau tidak memang saya sudah hanyut sama setiap ayat-ayat manis dia tu” jawab saya sambil meluah lah bah.
“eh minta lah di jauh kan dari lelaki-lelaki macam tu. Apa pun saya doa kau baik-baik saja dan sentiasa di dalam lindungan tuhan. Amen” jawab ariana.
“amen juga aria. Oya kau apa cerita sekarang? Tidak kan lah abis belajar terus kau membujang kan” tanya saya.
“hihi.. Sebetulnya kan saya masih jomblo lagi bah ni, saya tunggu seseorang tu meluah sama saya dulu. Tapi biar lah rahsia antara saya dan tuhan saja” jawab ariana.
“bah yalah aria. Apa pun yang kau hajat kan dan setiap langlah yang kau jalan saya doa kan semua baik-baik saja. Amen” jawab saya.
“amen amen… Eh malas lah mau cakap pasal cinta-cinta ni, semua pun menyakitkan saja tu. Bagus lagi kita cerita lain” jawab ariana.
“apa di cerita? Kau lah cerita sebab kau kan baru balik dari luar sabah ni” jawab saya.
“tiada yang menarik bei di luar tu. Siuk lagi di sabah banyak lagi kau boleh buat, macam orang lain cakap sabah ni menarik bah” jawab ariana.
“patut lah balik sini kan aria.. Kau rindu suasana kampung bah ni kan?” jawab saya.
“gila tidak rindu sini. Sini lah banyak kenangan kita bersama tau. Sama si ungut lagi, tapi dia tiada kabar sudah kan lepas dia pindah ikut mamy dia tu pigi Sarawak” jawab ariana.
“ia kan si ungut lagi. Walau pun dia tua dari kita berapa tahun tu, tetap dia setia berkawan ni sama kita. Saya harap dapat lah jumpa sama dia lagi satu hari nanti” jawab saya.

Si ungut ni kira kawab baik kami masa budak-budak dulu tapi nama betul dia kami tidak tau sebab dia punya ingkung selalu panggil nama dia si ungut sebab dia mangut betul bah dulu suka lagi main kutur tulah kana kasih nama si ungut.

“harap lah niana. Tidak tau macam mana lah dia sudah tu kan niana. Mungkin bertambah ensom lah tu kan hihi” jawab ariana.
“eh semua pun kau cakap ensom. Jadi buah hati kau tidak ensom kah?” jawab saya.
“eh.. Ensom bah tapi kau kenal juga tu siapa” jawab ariana.
“nanti kasih kenal-kenal sama saya ar aria. Mana lah tau saya kenal tu orang” jawab saya.
“bah sudah-sudah lah kamu bergosib sana tu.. Mari sini tolong siang ni ikan yang dorang dapat” amak mencelah.
“ok amak… bah aria mari kita pigi sana dekat amak, banyak kali ikan tu dorang dapat” bilang saya sama ariana.
“bah mari lah” jawab ariana.

Kami dua ariana pun terus jalan pigi tempat amak sana siring air sambil si amak siang itu pelian besar macam telapak tangan ni. Besar-besar juga lah dorang dapat campur yang dorang apak dapat ni.
“huiyoo besar-besar oh ikan…” bilang ariana.
“ni lah pendapatan kalau lama tiada orang salam ni lubuk” jawab edon.
“kau yang dapat kah bang? Besar oh” jawab ariana.
“bukan semua saya yang dapat bah ni. Ada juga dorang leo yang dapat masa merambat tadi” jawab edon sambil tu dia senyum saja tengok ariana.
“oh… Ingat kau yang dapat semua ni ikan hihi” jawab ariana.

Di sini baru saya perasan yang si ariana macam suka sama abang edon. Patut lah dia cakap saya kenal tu orang rupanya si abang bah pula jadi pujaan hati dia selama ni.

“bah siap siang ni mana mau simpan?” tanya saya sama amak.
“biar saja lah dulu sana tu, nanti amak mau kasih bagi-bagi sama dorang untuk bawa pulang. Sama bagi ariana lagi sikit ni” jawab amak.
“wow saya pun dapat oh.. Terima kasih ar aunty” ariana mencelah.
“sama-sama bah aria. Lagi pun kau kan baru balik sini, mesti kau ketiakan juga bah ni kan” jawab amak.
“is mesti lah aunty. Tapi kama-kama lah dulu sebab kita di sungai ni” jawab ariana.
“kama-kama” jawab amak.
“mak kami mandi dulu ar. Kalau mau balik panggil saja kami” saya mencelah.
“bah ongoi noh..” jawab amak.

Apa lagi sama saya ariana terus meluruh ke arah sungai. Kami naik tu batu terus kami terjun ni. Beranak keseronokan pula kami dua ariana, tidak lama datang dorang abang edon sama dorang leo join mandi. Nah sana dorang si abang bermain siram-siram air ni sama ariana. Saya terus naik pigi darat bila sudah rasa sejuk tu badan.

“niana kenapa kau ni pucat?” tegur apak sama saya.
“telampau berendam kali ni. Apak jangan risau lah” jawab saya.
“bah pigi kau panas kan badan sana dekat ungun api. Nanti kau sakit kama” jawab apak.
“ok apak…” Jawab saya.